ޕަބްލިކް ވޯކްސް ޔުނިޓްތަކަށް 516 މުވައްޒަފުން ނަގައި، 9.1 މިލިއަން ޑޮލަރުގެ ތަކެތި ގެންނަނީ

ޕަބްލިކް ވޯކްސް ޔުނިޓް ތަރައްގީ ކުރުމަށްޓަކައި 4 މޮބައިލް ޔުނިޓަށް ޖުމްލަ 516 މުވައްޒަފުން ނެގުމަށް ނިންމާފައިވާ ކަމަށް ރައީސް ޑރ. މުހައްމަދު މުއިއްޒުގެ ސިޓީސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ. 

އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ ރާއްޖޭގެ އެކި ސަރަހައްދުތަކުގައި ޕަބްލިކް ވޯކްސް ޔުނިޓްތައް ތަރައްގީ ކުރުމަށް ބޭނުންވާ އިމާރާތްތަކާއި މެޝިނަރީ ހޯދުމަށް ބޭނުންވާ ބަޖެޓުގެ ތަފްސީލުތައް ފިނޭންސް މިނިސްޓްރީ އަށް މިހާރު ހުށަހަޅާފައިވާ ކަމަށެވެ. 

އެގޮތުން މި ޔުނިޓްތައް ގާއިމް ކުރަން ނިންމާފައި ވަނީ 19 ރަށެއްގައި ކަމަށާ މި މަޝްރޫއަކީ ރަށްރަށުގައި ދެވޭ އާންމު ޚިދުމަތްތަކުގެ މެއިންޓެނަންސް މަސައްކަތްތަކަށް ހިނގާ ޚަރަދު ކުޑަކުރުމުގެ މަގްސަދުގައި ފަށާ މަސައްކަތެއް ކަމަށް މިނިސްޓަރު ވިދާޅުވި އެވެ. 

ކޮންމެ ޔުނިޓަކަށް 9 ބާވަތެއްގެ މެޝިނަރީ އެބަ ހޯދަން. 19 ޕަބްލިކް ވޯކް ޔުނިޓްގެ އިތުރުން، 4 މޮބައިލް ޔުނިޓް ހިމެނޭ. ބަނދާރާއި މަގުތައް މަރާމަތުކުރުމާއި ބެލެހެއްޓުމުގެ މަސައްކަތް ކުރާނެ. 9.1 މިލިއަން ޑޮލަރުގެ ތަކެތި ގެނައުމަށް ފިނޭންސް އަށް ވާނީ ހުށައަޅާފައި، 

ރައީސް ޑރ. މުހައްމަދު މުއިއްޒުގެ ސިޓީސް މިނިސްޓަރު އާދަމް ޝަރީފް އުމަރު

މިނިސްޓަރު ވިދާޅުވީ މި ވަޒީފާތަކަކީ ސީދާ ސިވިލް ސަރވިސް ގެ ތެރެއިން ހަމަޖެހިގެންދާ ވަޒީފާތަކެއް ކަމަށެވެ. އެހެންކަމުން މުވައްޒަފުން ނެގުމާއި އެކަމާ ގުޅޭ އެންމެހައި ކަންކަން ކުރާނީ ވެސް ސީއެސްސީ އިން ކަމަށް މިނިސްޓަރު ވިދާޅުވި އެވެ. 

މިނިސްޓަރު އެހެން ވިދާޅުވި އިރު އިންތިޚާބާ ދިމާކޮށް ރޯޑް ޑިވޮލޮޕްމަންޓް ކޯޕަރޭޝަން (އާރްޑީސީ)ގެ  ސައިޓުތަކަށް 140ށް ވުރެ ގިނަ މުވައްޒަފުން ހޯދަން ސަރުކާރުން އިއުލާނު ކޮށްފައި ވެ އެވެ. އަދި އެފްއެސްއެމްއާއި އެމްޓީސީސީ އިން ވެސް ވަޒީފާތައް އިއުލާނު ކޮށްފައިވާއިރު މިކަމާ ގުޅިގެން ގިނަ ބަޔަކު ދަނީ މި ސަރުކާރަށް ވަރަށް ބޮޑަށް ފާޑުކިޔަމުންނެވެ. ޚާއްސަކޮށް އިދިކޮޅު އެމްޑީޕީ އިން މިކަމަށް ވަރަށް ބޮޑަށް ފާޑުކިޔާ، ކަންބޮޑުވުން ފާޅު ކޮށްފައި ވެ އެވެ. 

އެ ޕާޓީ އިން ވަނީ މި ސަރުކާރުން ވޯޓު ހޯދުމަށްޓަކައި ހަމައެކަނި ކުރަމުންދާ ކަމަކީ ސަރުކާރުގެ ކުންފުނިތަކުން ވަޒީފާތައް ދިނުން ކަމަށް ބުނެ އެކަން އެޗްއާރްސީއެމް ގެ ސަމާލު ކަމަށް ވެސް ގެނަސްފަ އެވެ. އެމްޑީޕީ އިން ބުނެފައި ވަނީ ވަޒީފާތައް ދެމުންގޮސް ސަރުކާރުގެ ޔުޓިލިޓީ ކުންފުނިތަކުގައި މިއަދު 15،000ށް ވުރެ ގިނަ މުވައްޒަފުން އެބަތިބި ކަމަށެވެ.