އެމްޑީޕީ ޕިކަޕް ޖަލްސާ: "ވެރިކަމަށް އާދެވުނީ އޮޅުވާލައިގެން ކަމަށް ވާތީ ރައީސް މުއިއްޒަށް ހީފުޅުވަނީ ކޮންމެ ކަމެއްވެސް ރައްޔިތުންނަށް އޮޅުވާލެއްވޭނެ ކަމަށް"
ރައީސް ޑރ. މުއިއްޒުގެ ސަރުކާރުން ރައްޔިތުންނަށް ކަންކަން އޮޅުވާލަމުންދާ ކަމަށް ތުހުމަތުކޮށް، އެމްޑީޕީގެ ޕިކަޕް ޖަލްސާގައި ބަންޑާރަ ނައިބުގެ މިނިވަންކަމާ މެދު ސުވާލު އުފައްދައިފި. މި ޖަލްސާގައި ވާހަކަދެއްކެވި މެންބަރުން ވަނީ ރައީސް މުއިއްޒު އާއިލީ ވެރިކަމެއް ގާއިމުކުރައްވަން އުޅުއްވާ ކަމަށް ބުނެ، ރެފަރެންޑަމްގައި "ނޫނެކޭ" ބުނުމަށް ރައްޔިތުންނަށް ގޮވާލާފަ. ސަރުކާރުގެ އަމަލުތައް ހުރީ ރަސްކަމެއް ކުރާ އުސޫލުން ކަމަށާއި، ނަމަވެސް ރައްޔިތުން އެކަމަށް ޖާގަ ނުދޭނެ ކަމަށް އެ ޕާޓީން ބުނޭ.
އެމްޑީޕީ ގައުމީ މަޖިލީހުގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން | ރާއްޖެ އެމްވީ
ރައީސް ޑރ. މުހައްމަދު މުއިއްޒަށް މި ސަރުކާރާ ހަވާލުވެވަޑައިގެންނެވުނީ އެތައް ބަޔަކަށް، ޚާއްސަކޮށް އެމަނިކުފާނު ގެ އަމިއްލަ ޕާޓީ އަށް ވެސް އޮޅުވާލައިގެން ކަމަށްވާތީ ކޮންމެ ކަމެއް ވެސް ރައްޔިތުންނަށް އޮޅުވާލެއްވޭނެ ކަމަށް އެމަނިކުފާނަށް ހީފުޅުކުރެވޭ ކަމަށް އެމްޑީޕީގެ ގައުމީ މަޖިލީހުގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން ވިދާޅުވެއްޖެ އެވެ.
އާދިއްތަ ދުވަހުގެ އެމްޑީޕީގެ ޕިކަޕް ޖަލްސާގައި ވާހަކަދައްކަވަމުން ޝާތިރު ވިދާޅުވީ ރައީސް މުއިއްޒަށް މި ރާއްޖޭގެ ވެރިކަން ލިބިވަޑައިގަތީ ވެސް އެތައް ބަޔަކަށް އޮޅުވާލައިގެން ކަމަށެވެ. އެހެންކަމުން މިއަދު އެހެން ހުރިހާ ކަމެއްގައި ވެސް ރައްޔިތުންނަށް އޮޅުވާލެވިދާނެ ކަމަށް އެމަނިކުފާނާއި، އެމަނިކުފާނުގެ ޓީމުން ހީފުޅު ކުރައްވާ ކަމަށް ޝާތިރު ވިދާޅުވި އެވެ.
އެގޮތުން ރާއްޖޭގެ ބަންޑާރަ ނައިބު އަހުމަދު އުޝާމް ވެސް މިއަދު ހުންނެވީ ފިޔަކޮށާލާފައިވާ ދޫންޏެއް ފަދައިން ކަމަށާ އެމަނިކުފާނު ވެސް ކުރައްވާހާ ކަމަކީ ރައީސް މުއިއްޒު ވިދާޅުވާހާ ގޮތަކަށް ރައްޔިތުންނަށް އޮޅުވާލުމަށް ނޫސް ބަޔާން ނެރުއްވުން ކަމަށް ޝާތިރު ވިދާޅުވި އެވެ.
ރައީސް މުއިއްޒާއި މި ރާއްޖޭގެ ބަންޑާރަ ނައިބަށް އެކަން ވަރަށް ރަނގަޅަށް ސާފުވާނެ. ބަންޑާރަ ނައިބުވެސް ހުރީ މިހާރު ފިޔަ ކޮށާލާފަ. ރައީސް މުއިއްޒު ވިދާޅުވި ގޮތަކަށް ނޫސް ބަޔާން ނެރެމުން އެ ދަނީ.އެމްޑީޕީ ގައުމީ މަޖިލީހުގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން
އެ ޖަލްސާގައި ވާހަކަދައްކަވަމުން އެމްޑީޕީގެ ގައުމީ މަޖިލީހުގެ މެންބަރު އަހުމަދު ސަލީމް (މާޒް ސަލީމް) ވިދާޅުވީ ރައީސް މުއިއްޒު އުޅުއްވަނީ ރާއްޖޭގައި ރަސްކަމެއް ކުރައްވަން ކަމަށެވެ. އެގޮތުން އާއިލާ ބޭފުޅުންނާ އަރިސް ބޭފުޅުންނަށް މުޅި ދައުލަތް ބަހަމުން ދާއިރު އެމަނިކުފާނުގެ ވިސްނުންފުޅު ހުރީ މި ގައުމުގައި ގިނަ ދުވަސްތަކެއް ވަންދެން އެ ރަސްކަން ދެމެހެއްޓުމަށް ކަމަށް ވެސް މާޒް ވިދާޅުވި އެވެ. އެހެން ނަމަވެސް މިއަދު ރައްޔިތުން ތިބީ ހޭލާ ކަމަށާ ރައްޔިތުން އެކަމަށް ޖާގަ ނުދޭނެ ކަމަށް އޭނާ ވިދާޅުވި އެވެ.
އާދިއްތަ ދުވަހުގެ ޕިކަޕް ޖަލްސާގައި ވާހަކަދެއްކެވި ހުރިހާ ބޭފުޅުން ވެސް ވަނީ ރެފަރެންޑަމްގައި ނޫނެކޭ ބުނުމަށް ގޮވާލާފަ އެވެ.
