ގާނޫނުގައި ވަކިގޮތަކަށް ބަޔާންކޮށްފައި އޮންނަ ކަމެއް "އުސޫލު" ކިޔާއެއްޗެއް ބޭނުންކޮށްގެން ބަދަލު ކުރުމަކީ ހަމަޖެހޭ ކަމެއް ނޫން: އަލީ ހުސައިން

ގާނޫނުގައި ވަކިގޮތަކަށް ބަޔާންކޮށްފައި އޮންނަ ކަމެއް، ގާނޫނު ނުދަންނަ އަދި ގާނޫނު އަސާސީވެސް ނުދަންނަ "އުސޫލު" ކިޔާއެއްޗެއް ބޭނުންކޮށްގެން ބަދަލު ކުރުމަކީ ހަމަޖެހޭ ކަމެއް ނޫން ކަމަށް ގާނޫނީ ވަކީލު އަލީ ހުސައިން ވިދާޅުވެއްޖެ އެވެ. 

އަލީ ހުސައިން މިފަދައިން ވިދާޅުވީ ސަރުކާރުގެ އާއިލީ ބޯހިޔާވަހިކަން ޕްރޮގްރާމުގެ ދަށުން ފްލެޓާއި ބިމަށް ކުރިމަތިލާ މީހުންގެ ތެރެއިން 400 އަކަފޫޓަށް ވުރެ ބޮޑު ކުޑަ ބިމެއް އޮންނަ މީހުން، އެ ބައި ދައުލަތަށް ދޫކޮށްލަންޖެހޭ ގޮތަށް އުސޫލުގައި އޮތް ބައި އިސްލާހުކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވުމާއި ގުޅިގެންނެވެ. 

ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ މިހާރު އޮންނަ ގޮތުން ގޯތި ނުވަތަ ފުލެޓް ލިބިއްޖެ ނަމަ، އެމީހަކަށް 400 އަކަފޫޓަށް ވުރެ ކުޑަ ބިންކޮޅެއް އޮންނަ މީހަކު އެ ބިން ދައުލަތަށް ދޫކޮށްލަންޖެހޭ ގޮތަށް އޮންނަ ކަމަށެވެ. އެހެންނަމަވެސް އެ އުސޫލު ބަދަލު ކުރާނެ ކަމަށެވެ. 

ބަދަލުކޮށްފައި އެމީހާގެ އަނބިމީހާ ނުވަތަ ފިރިމީހާ ނުވަތަ ދަރިން ނުވަތަ އެއްބަނޑު އެއްބަފާ މީހުންގެ ތެރެއިން އެމީހާ ބޭނުންވާ މީހަކަށް ބިންކޮޅު ބަދަލުކޮށްލެވޭ ގޮތަށް މި ބަދަލުކުރަނީ. ސަރުކާރަށް ދޫކޮށްލާކަށް ނުޖެހޭނެ. އެހެންވީމާ ސްޕައުސް، ދަރިން އަދި އެއްބަނޑު އެއްބަފާ ފަރާތްތައް.  މީގެ ތެރެއިން އެއް ފަރާތަކަށް އެމީހާ ދައުލަތަށް ދޫކޮށްލަންޖެހޭ ބިން ދޫކޮށްލުމުގެ ބަދަލުގައި ބަދަލުކުރަނީ. އަދި މިއަށް އެޕްލައި ކުރެވޭނެ މިދިޔަ ސަރުކާރުގެ ބިންވެރިޔާ ސްކީމުގެ ތެރެއިން ބިންކޮޅު ދޫކޮށްލަންޖެހޭ ފަރާތްތަކަށް ވެސް. 

ރައީސް ޑރ. މުހައްމަދު މުއިއްޒު

މިކަމާއި ގުޅިގެން ގާނޫނީ ވަކީލު އަލީ ހުސައިން ވިދާޅުވީ ގާނޫނުގައި ވަކިގޮތަކަށް ބަޔާންކޮށްފައި އޮންނަ ކަމެއް، ގާނޫނު ނުދަންނަ އަދި ގާނޫނު އަސާސީވެސް ނުދަންނަ "އުސޫލު" ކިޔާއެއްޗެއް ބޭނުންކޮށްގެން ބަދަލު ކުރުމަކީ ހަމަޖެހޭ ކަމެއް ނޫން ކަމަށެވެ. 

އަލީ ހުސައިން ވިދާޅުވީ އުސޫލު ކިޔާ އެއްޗެއް ޤާނޫނު އަސާސީގައި ނޯންނާނެ ކަމަށާއި، އުސޫލަކީ ޤާނޫނު އަސާސީ ދަންނަ އެއްޗެއް ނޫން ކަމަށެވެ. އެހެންނަމަވެސް ޤާނޫނުއަސާސީ ފުރަތަމަ އައުމަށް ފަހުގައި އޭރު ހުންނެވި އެޓަރނީ ޖެނެރަލްގެ އޮފީހުން އުސޫލު ކިޔާ އެއްޗެއް ހަދާފަ އެފަހުން އުސޫލު ހަދަން ފެށި ކަމަށެވެ. އަލީ ހުސައިން ވިދާޅުވީ ޤާނޫނުއަސާސީ ދަންނަނީ ޤާނޫނުއަސާސީއާއި ގާނޫނުތަކާއި ގަވާއިދު ކަމަށެވެ. އެހެންކަމުން އުސޫލު ކިޔާ އެއްޗެހި ޤާނޫނުއަސާސީ ނުދަންނާނެ ކަމަށެވެ. 

އުސޫލަށް ބަދަލުކޮށްގެން އެކަމެއް ނުކުރެވޭނެ. އެއީ ބިމާ ބެހޭ ގާނޫނުގައި ކަނޑައަޅާފައި ހުރި ވާހަކައަކީ ކަނޑައަޅާފައި ހުރި ގާނޫނީ ވާހަކައަކީ ހަމަތަކަށް އެއްގޮތަށް ނޫނީ ބިމެއް އެހެން މީހަކާ ޢައްޔަނުކޮށް ބަދަލުކޮށެއް ނުހެދޭނެ. އެހެންވީމަ ބިމާ ބެހޭ ގާނޫނުގައި އެބަ ބުނޭ މިސާލަކަށް ހިބައިންވިޔަސް އެނޫން ގޮތަކަށްވެސް ދެވޭނެ މީހުން ކެޓަގަރޭސްކޮށްފައި އެބަހުރި ބުނެފަ. އެނޫން މީހަކަށް ނުއެއްދެވޭނެކަން އެކަން ކުރަންޏާ ޖެހޭނީ އެގޮތަށް ދޫކުރެވެންޖެހޭނީ ބިމާ ބެހޭ ޤާނޫނަށް އިޞްލާޙު ގެންނަންޖެހޭނީ. އެމީހުން ހަމައެކަނި އުސޫލަށް ބަދަލުގެނެސްގެން އެ ބިން އެހެން މީހުންނަކަށް އެލޮކޭޓެއް ނުކުރެވޭނެ. 

ގާނޫނީ ވަކީލު އަލީ ހުސައިން

ރާއްޖޭގައި އަމަލުކުރަމުން އަންނަ ގާނޫނީ ހަމައަކީ، އެންމެ މަތިން ތިރިއަށް ހައިރާކީ އޮންނަ ގޮތަށެވެ. އެއީ ގާނޫނު އަސާސީ، ގާނޫނު އަދި އޭގެ ފަހަތުން ގަވާއިދު، އުސޫލު، ދެން ސާކިއުލާ ދެން ސިޓީ ނޯޓެވެ. ނަމަވެސް މި ސަރުކާރުން ކަންކަން ކުރަނީ ގާނޫނެއް ގަވާއިދެއް އޮންނަ ގޮތަކަށް ނޫނެވެ. އުސޫލެއް ގާނޫނަކާއި ގާނޫނުއަސާސީއާ ފުށު އަރާނަމަ އެވާނީ ބާތިލްއެއްޗަކަށެވެ. މި ސަރުކާރުން އެތައް ކަމެއް ކޮށްފައި އެބަހުއްޓެވެ. އެގޮތުން  4000 ހައުސިން ޔުނިޓާއި، ފޭސް3 އަދި ގިރާވަރުން ދިން ގޯތީގެ ރަޖިސްޓްރީ ބާތިލް ކުރީ އުސޫލެއް ހަދައިގެން ކަމަށާއި، އެއީ އެކަން ކުރެވޭނެ ގޮތެއް ނޫނެވެ.