ބިރު ދެއްކިޔަސް އީރާން އޮތީ ބިރަކުން ނޫން، ހަމަލާ ދިނަސް އަވަހަށް ހައްލު ހޯދާނެ

އީރާންގެ ކަރަންޓުގެ ސިސްޓަމް ތަކަށް ހަމަލާ ދޭން އުޅޭ ފަރާތްތައް ދެކެ އެ ޤައުމުން ބިރު ނުގަންނަ ކަމަށް، އީރާންގެ އެނާޖީ މިނިސްޓަރު އައްބާސް އަލީއާބާދީ ވިދާޅުވެއްޖެ އެވެ.

އަލިއާބާދީ ވިދާޅުވީ، އީރާންގެ ކަރަންޓު އުފެއްދުމުގެ ނިޒާމު ވަނީ ތަފާތު ސަރަހަައްދު ތަކަށް ބަހާލެވިފައި ކަމަށެވެ. އަދި އެއްވެސް ބަޔަކު ދޭ ހަމަލާ ތަކެއްގައި އީރާންގެ ކަރަންޓުގެ ނިޒާމަށް ގެއްލުން ތަކެއް ލިބިއްޖެ ނަމަ، ވަރަށް އަވަހަށް އެކަން ޙައްލު ކުރެވޭނެ ގޮތް ތަކެއް ރާވާާފައި އޮތް ކަމަށް ވެސް އޭނާ ވިދާޅުވި އެވެ. 

މީގެ އިތުރުން މިނިސްޓަރު ވިދާޅުވީ، އީރާންގެ ކަރަންޓުގެ ނިޒާމު ވަނީ ޒަމާނީ ގޮތެއްގައި ރާވާލާފައި ކަމަށެވެ. ޚާއްސަކޮށް ރަނގަޅު ނިޒާމަކާއި، ސިޔާސަތެއްގެ ދަށުން އެކަން ބިނާ ކޮށްފައި އޮތުމުން، ގެއްލުން ތަކެއް ނުލިބޭނެ ކަމަށް ވެސް އޭނާ ވިދާޅުވި އެވެ. އެހެން ކަމުން، ކަރަންޓުގެ ނިޒާމަށް ހަމަލާ ދޭނެ ކަމަށް ބުނެ ދެމުން އަންނަ އިންޒާރު ތަކަށް އީރާން ނުސިހޭނެ ކަމަށް ވެސް އޭނާ ވިދާޅުވެފައިވެ އެވެ. 

އީރާންގެ ކަރަންޓުގެ ނިޒާމުގެ ބާރު އިތުރު ކުރުމަށް ކުރަމުންދާ މަސައްކަތްތަކާ ގުޅިގެން މިނިސްޓަރު ވިދާޅުވީ، ޤައުމުގެ އެކި ސަރަހައްދު ތަކުގައި ކަރަންޓު އުފައްދާ ތަންތަން އިތުރު ކުރުމުގެ މަސައްކަތް ވެސް ކުރަމުން އަންނަ ކަަމަށެވެ. އެގޮތުން ކަރަންޓު އުފެއްދުން ތަފާތު ސަރަހައްދު ތަކަށް ބަހާލުމުން، ހަމަލާއެއްގައި އެއް ސަރަހައްދަކަށް ގެއްލުމެއް ލިބިއްޖެ ނަމަ، އެހެން ސަރަހައްދު ތަކުން ކަރަންޓު އުފެއްދުން ކުރިއަށް ދާނެ ކަމަށް ވެސް އޭނާ ވިދާޅުވި އެވެ. 

މީގެ އިތުރުން މިނިސްޓަރު ވަނީ ކަރަންޓުގެ ސިސްޓަމް ތަަކަށް ހަމަލާއެއް ލިބިއްޖެ ނަަމަ، އެކަން އަވަހަށް ރަނގަޅު ކުރުމަށް ބޭނުންވާ ވަސީލަތްތަކާއި، ތަކެތި އީރާންގައި ހުރި ކަމަށް ފާހަގަ ކުރައްވައިފަ އެވެ. އަދި އެފަދަ ޙާލަތް ތަކުގައި އަވަހަރަށް ހަރަކާތްތެރި ވުމަށް ތަމްރީނު ލިބިފައިވާ ޓީމު ތަކެއް ތައްޔާރު ކޮށްފައިވާ ކަމަށް ވެސް އޭނާ ވިދާޅުވި އެވެ.