އިޒްރޭލްގެ މަސްހަލަތު ހިމާޔަތް ކުރުމަށް، ނަތަންޔާހޫ އާއި ޓްރަމްޕް މަޝްވަރާ ކުރައްވައިފި

އެމެރިކާ އާއި އިޒްރޭލްގެ ސިފައިން އީރާންއާ ދެކޮޅަށް ހޯދި ކާމިޔާބީތައް އިޒްރޭލްގެ މަސްލަހަތު ރައްކާތެރިކުރާ އެއްބަސްވުމަކަށް ބަދަލު ކުރެވިދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ޤަބޫލުފުޅު ކުރައްވާ ކަމަށް، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ. 

ސޯޝަލް މީޑިއާގައި އާންމު ކުރި ވީޑިއޯ ބަޔާނެއްގައި ނަތަންޔާހޫ ވިދާޅުވީ، ޓްރަމްޕް ޤަބޫލުފުޅު ކުރައްވަނީ އިޒްރޭލްގެ ދިފާއީ ބާރުތަކާއި، އެމެރިކާގެ އަސްކަރީ ސިފައިންގެ ވަރުގަދަ ކާމިޔާބީތައް ބޭނުން ކޮށްގެން ހަނގުރާމައިގެ ލަނޑު ދަނޑިތައް އެއްބަސްވުމެއްގެ ތެރެއިން ޙާސިލު ކުރެވިދާނެ ކަމަށެވެ. އަދި އެއީ އިޒްރޭލްގެ މަސްލަޙަތުތައް ރައްކާތެރި ކުރާ އެއްބަސްވުމެއް ކަމަށް ވެސް ނަތަންޔާހޫ ވިދާޅުވި އެވެ. 

ނަތަންޔާހޫ ވިދާޅުވީ ކޮންމެ ޙާލަތެއްގައި ވެސް، އިޒްރޭލްގެ މުހިންމު މަސްލަހަތުތައް ރައްކާތެރި ކުރާނެ ކަމަަށާއި، އެއާ އެކު އީރާން އާއި ލުބުނާންގައި ހަމަލާތައް ދިނުން ކުރިއަށް ދާނެ ކަމަށެވެ. ނަތަންޔާހޫގެ ވީޑިއޯގައި އޭނާ ވަނީ، އެކަމާ ގުޅޭ ގޮތުން ހޯމަ ދުވަހު ޓްރަމްޕްއާ މަޝްވަރާ ކުރައްވާފައިވާ ކަަމަށެވެ. 

އެ ވީޑިއޯގައި ތަކުރާރުކޮށް ނަތަންޔާހޫ ވިދާޅުވެފައި ވަނީ، މިހާރު ދެމުން އަންނަ ހަމަލާ ތަކުގެ ސަބަބުން އީރާންގެ މިސައިލް ޕްރޮގްރާމް އާއި، ނިއުކްލިއާ ޕްރޮގްރާމް ހަލާކުވަމުން އަންނަ ކަމަށާއި، ހިޒްބުﷲ އަށް ވެސް ބޮޑެތި ގެއްލުން ތަކެއް ލިބެމުން އަންނަ ކަމަށެވެ. އަދި އެނާ ވިދާޅުވީ މީގެ ދުވަސް ކޮޅެއް ކުރިން އީރާންގެ އިތުރު ނިއުކްލިއާ ދެ ސައިންޓިސްޓުން މަރާލާފައިވާ ކަމަށާއި، އެއީ އަދި ނިމުމެއް ނޫން ކަމަށެވެ. 

ނަތަންޔާހޫ މިހެން ވިދާޅުވެފައި މި ވަނީ، އީރާން އާއެކު ވަރަށް ރަނގަޅު މަޝްވަރާ ތަކެއް ކޮށްފައިވާ ކަމަށް ޓްރަމްޕް ވިދާޅުވެފައި ވަނިކޮށެވެ. އީރާން އާއެކު މަޝްވަރާ ކުރަމުން އަންނަ ކަމަށް ޓްރަމްޕް ވިދާޅުވި ނަމަވެސް، އީރާން އިން ވަނީ އެ ވާހަކަތައް ދޮގު ކޮށްފަ އެވެ. އެގޮތުން ހަނގުރާމަ ފެށުނު ފަހުން މިހާތަނަށް އެމެރިކާ އާއެކު އެއްވެސް މަޝްވަރާއެއް ކޮށްފައި ނުވާނެ ކަމަށް އީރާން އިން ވަނީ ބުނެފަ އެވެ.