އެފްއޭ ކަޕް: ވުލްވްސް އަތުން މޮޅުވެ ލިވަޕޫލް ކުއާޓާ ފައިނަލް އަށް

އެފްއޭ ކަޕްގެ ގަދަ 16 ވަނަ ބުރުގައި ވުލްވްސްއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން މުބާރާތުގެ ކުއާޓާ ފައިނަލްގެ ޖާގަ ހޯދައިފި އެވެ. 

ހުކުރު ދުވަހުގެ ރޭ ކުޅުނު މެޗުގައި ލިވަޕޫލް އިން ވަނީ 3-1 އިން ވުލްވްސް ބަލިކޮށްފަ އެވެ. މެޗުގައި ދެ ޓީމުން ވެސް ލަނޑުތައް ޖެހީ މެޗުގެ ދެ ވަނަ ހާފުގަ އެވެ. 

މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި ލިވަޕޫލް އަށް ލީޑު ނަގައިދިނީ އެންޑީ ރޮބާޓްސަން އެވެ. އެއީ ކާޓިސް ޖޯންސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ދެ މިނެޓު ފަހުން މިޞްރުގެ ފޯވާޑު މުޙައްމަދު ޞަލާޙު ވަނީ ލިވަޕޫލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ 74 ވަނަ މިނެޓުގައި ލިވަޕޫލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ ކާޓިސް ޖޯންސް އެވެ. އެއީ ރަޔަން ގްރެވެންބާޗް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި ލިވަޕޫލް އިން ތިން ލަނޑު ޖެހި ފަހުން، ވުލްވްސްގެ ހަމައެކަނި ލަނޑު ޖެހީ ހްވާން ހީޗާން އެވެ.

ލިވަޕޫލް އިން އެފްއޭ ކަޕްގެ ކުއާޓާ ފައިނަލްގެ ޖާގަ ހޯދާފައިވާއިރު، މި ސީޒަންގައި އެ ޓީމުގެ ނަތީޖާތައް ދަށްވުމުގެ ސަބަބުން ކޯޗު އާން ސްލޮޓް އަށް އޮންނަ ޕްރެޝަރު ވަނީ ބޮޑުވެފަ އެވެ. ޚާއްސަކޮށް އިނގިރޭސި ޕްރިމިއާ ލީގުގައި ލިވަޕޫލްގެ ނަތީޖާތައް ދަށްވެ، ސްލޮޓް އަށް އަންނަނީ ފާޑު ކިޔުން އިތުރު ވަމުންނެވެ.