ވެސްޓް ހޭމް ބަލިކޮށް، ލިވަޕޫލަށް މުހިންމު މޮޅެއް

އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން މުހިންމު މޮޅެއް ހޯދައިފި އެވެ. 

ލިވަޕޫލްގެ އަމިއްލަ ދަނޑު، އެންފީލްޑުގައި ކުޅުނު މެޗު އެ ޓީމުން ކާމިޔާބު ކުރީ 5-2 އިންނެވެ. މެޗުގެ ފުރަތަމަ ހާފުގައި ލިވަޕޫލް އިން ތިން ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ. މި ހާފުގައި ވެސްޓް ހޭމް އިން ވެސް ވަނީ ދެ ލަނޑު ޖަހައިފަ އެވެ.

މެޗު ފަށައިގެން ފަސް ވަނަ މިނެޓުގައި ލިވަޕޫލަށް ލީޑު ނަގައިދިނީ ހޫގޯ އެކިޓީކޭ އެވެ. އޭގެ ފަހުން ފުރަތަމަ ހާފުގެ 24 ވަނަ މިނެޓުގައި ވާޑިލް ވެން ޑައިކް ވަނީ ލިވަޕޫލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. ފުރަތަމަ ހާފު ނިމުމުގެ ކުރިން ލިވަޕޫލްގެ ތިން ވަނަ ލަނޑު ޖެހީ އެލެކްސިސް މެކް އަލިސްޓާ އެވެ. 

މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި ވެސްޓް ހޭމްގެ ފުރަތަމަ ލަނޑު ޖެހީ ތޯމަސް ސޫޝެކް އެވެ. އޭގެ ފަހުން މެޗުގެ 70 ވަނަ މިނެޓުގައި ކޯޑީ ގަކްޕޯ ވަނީ ލިވަޕޫލްގެ ހަތަރު ވަނަ ލަނޑު ޖަހައިފަ އެވެ. އޭގެ ފަސް މިނެޓު ފަހުން ވެސްޓް ހޭމްގެ ދެ ވަނަ ލަނޑު ޖެހީ ޓަޓީ ކަސްޓެޔާނޯސް އެވެ. މެޗުގައި ލިވަޕޫލްގެ ފަހު ލަނޑަކީ ވެސްޓް ހޭމްގެ އެކްސެލް ޑިސާސީ އަތުން ބައި ކޮޅަށް ވަތް ލަނޑެކެވެ.

ވެސްޓް ހޭމް އަތުން ހޯދި ތިން ޕޮއިންޓާ އެކު ލިވަޕޫލް އޮތީ ލީގު ތާވަލްގެ ފަސް ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 28 މެޗުން 48 ޕޮއިންޓާ އެކު އެވެ. މި ސީޒަންގައި ލިވަޕޫލްގެ ނަތީޖާތައް ދަށްވެފައިވާއިރު، މިހާރު އެ ޓީމުން އަންނަނީ ލީގުގެ ގަދަ ހަތަރު ޓީމުގެ ތެރޭގައި އޮތުމަށް މަސައްކަތް ކުރަމުންނެވެ.