ޞަލާޙުގެ ލަނޑާ އެކު ބްރައިޓަން ބަލިކޮށް، ލިވަޕޫލް ގަދަ 16 އަށް
އެންފީލްޑުގައި ހޮނިހިރު ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 3-0 އިން. މެޗުގެ ފުރަތަމަ ހާފުގައި ލިވަޕޫލް އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގައި.
މެޗުގައި ލަނޑު ޖެހުމަށް ފަހު ލިވަޕޫލްގެ ޞަލާޙު އުފާ ފާޅު ކުރަނީ | ރޮއިޓާސް
އިނގިރޭސި އެފްއޭ ކަޕްގެ ހަތަރު ވަަނަ ބުރުގައި ބްރައިޓަންއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން މުބާރާތުގެ ގަފަ 16 ވަނަ ބުރުން ޖާގަ ހޯދައިފި އެވެ.
ލިވަޕޫލްގެ އަމިއްލަ ދަނޑު، އެންފީލްޑުގައި ހޮނިހިރު ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ލިވަޕޫލް އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.
މެޗުގެ ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް، ލިވަޕޫލް އަށް ލީޑު ނަގައިދިނީ ކާޓިސް ޖޯންސް އެވެ. އެއީ މިލޯސް ކާކެޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
މެޗުގެ ދެ ވަނަ ހާފު ފަށައިގެން އެގާރަ ވަނަ މިނެޓުގައި ޑޮމިނިކް ސޮބޮސްލާއީ ވަނީ ލިވަޕޫލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މިޞްރުގެ ފޯވާޑު މުޙައްމަދު ޞަލާޙު އެވެ. އޭގެ ފަހުން މެޗުގެ 68 ވަނަ މިނެޓުގައި ލިވަޕޫލް އަށް ލިބުނު ޕެނަލްޓީ ކާމިޔާބުކޮށް ޞަލާޙު ވަނީ އެ ޓީމުގެ ތިން ވަނަ ލަނޑު ޖަހައިފަ އެވެ.
މެޗުން މޮޅުވެ ލިވަޕޫލް އިން މުބާރާތުގެ ގަދަ 16 އިން ޖާގަ ހޯދިއިރު، މި ސީޒަންގައި ލިވަޕޫލްގެ ނަތީޖާތަށް ދަށްވުމުގެ ސަބަބުން އެ ޓީމުގެ ކޯޗު އާން ސްލޮޓް އަށް އަންނަނީ ޕްރެޝަރު ބޮޑު ވަމުންނެވެ. ޚާއްސަކޮށް އިނގިރޭސި ޕްރިމިއާ ލީގުގައި ލިވަޕޫލްގެ ނަތީޖާތައް ދަށްވެ، ސަޕޯޓަރުންގެ ނުރުހުން ވެސް އޭނާ އަށް ވަނީ އަމާޒުވެފަ އެވެ.
