ލިވަޕޫލް އާއެކު 100 ވަނަ މެޗަށް ނިކުންނައިރު، ސްލޮޓް ހުރީ ވަރަށް ބޮޑު އުންމީދެއްގައި

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި ގަލަތަސަރާއީއާ ދެކޮޅަށް ނިކުންނައިރު، އޭނާ ހުރީ ވަރަށް ބޮޑު އުންމީދެއްގައި ކަމަށް ލިވަޕޫލްގެ ކޯޗު އާން ސްލޮޓް ބުނެފި އެވެ.

އަންގާރަ ދުވަހުގެ ރޭ ގަލަތަސަރާއީއާ ދެކޮޅަށް އެ ޓީމުގެ ދަނޑުގައި ނިކުންނައިރު، މިއީ ސްލޮޓްގެ އިރުޝާދުގެ ދަށުން ލިވަޕޫލް ކުޅޭނެ 100 ވަނަ މެޗެވެ. މި ސީޒަންގައި ސްލޮޓްގެ އިރުޝާދުގެ ދަށުން ލިވަޕޫލް އަށް އެކަށީގެންވާ ނަތީޖާއެއް ނުނެރެވޭ ކަމަށް ބުނެ، އޭނާ އަށް އަންނަނީ ފާޑު ކިޔުން ވެސް އަމާޒުވަމުންނެވެ.

އެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާާހަކަ ދައްކަމުން ސްލޮޓް ބުނީ، އަނެއްކާ ވެސް ގަލަތަސަރާއީއާ ދެކޮޅަށް ނިކުންނައިރު، ލިވަޕޫލް އަށް އެ ޓީމު ވަރަށް ރަނގަޅަށް އިނގޭ ކަމަށެވެ. ޚާއްސަކޮށް އެ ޓީމާ ދެކޮޅަށް މީގެ ކުރިން ކުޅެފައިވުމަކީ، އެ ޓީމުގެ ވައްޓަފާޅި ދަންނަ ސަބަބެއް ކަަމަަށް ސްލޮޓް ބުންޏެވެ.

މީގެ އިތުރުން ގަލަތަސަރާއީ އާއި، އެ ޓީމުގެ ކޯޗަކަށް ފުރިހަމަ އިޙުތިރާމް އޮތްކަން ފާހަގަކޮށް ސްލޮޓް ބުނީ، އޯކަން ބުރުކްގެ އިރުޝާދުގެ ދަށުން ގަލަތަސަރާއީ އިން ރަނގަޅަށް ކުޅެމުން އަންނަ ކަަމަށެވެ. އޭނާ ބުނީ އެ ޓީމަކީ ފެންވަރު ރަނގަޅު، ހުނަރުވެރި އަދި މޮޅެތި ކުޅުންތެރިންގެ މައްޗަށް އެކުލެވިގެން އޮތް ޓީމެއް ކަމަށެވެ. 

ލިވަޕޫލްއާ ގުޅޭ ގޮތުން ވާހަކަ ދައްކަމުން ސްލޮޓް ބުނީ، އޭނާ ހުރީ ޓީމާ މެެދު ވަރަށް ބޮޑަށް ހިތްހަަމަ ޖެހިގެން ކަމަށެވެ. ޚާއްސަކޮށް ކުޅުންތެރިންގެ މަސައްކަތާއި، ޓީމުގެ ތައްޔާރީތަކާ މެދު ހިތްހަމަ ޖެހޭ ކަމަށް ސްލޮޓް ބުންޏެވެ. މީގެ ކުރިން މުބާރާތުގެ ގުރޫޕް ސްޓޭޖުގައި މި ދެ ޓީމު ބައްދަލު ކުރި މެޗު ގަލަތަސަރާއީ އިން ކާމިޔާބު ކުރިއިރު، ސްލޮޓް ބުނީ މިފަހަރުގެ އަމާޒަކީ ލިވަޕޫލް ކޮޅަށް މެޗު އެނބުރުން ކަމަށެވެ.

މުބާރާތުގެ ގަދަ 16 ވަނަ ބުރުގައި މި ދެ ޓީމު ބައްދަލު ކުރާ މެޗު އޮތީ އަންގާރަ ދުވަހުގެ ރޭ ރާއްޖެ ގަޑިން 22:45 ގައެވެ.