ގަލަތަސަރާއި އަތުން ބަލިވެ ލިވަޕޫލް ޕްރެޝަރަށް

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި ގަލަތަސަރާާއީއާ ދެކޮޅަށް ކުޅުނު މެޗުން ބަލިވެ، ލިވަޕޫލް ޕްރެޝަރަށް ވެއްޓިއްޖެ އެވެ.

ގަލަތަސަރާއީގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗުގައި އެ ޓީމުން ވަނީ 1-0 އިން ލިވަޕޫލް ބަލިކޮށްފަ އެވެ. މެޗުގެ ހަމައެކަނި ލަނޑު ގަލަތަސަރާއީ އިން ޖެހީ ވެސް މެޗުގެ ފުރަތަމަ ހާފުގަ އެވެ.

އެގޮތުން މެޗު ފަށައިގެން ހަތް ވަނަ މިނެޓުގައި ގަލަތަސަރާއީ އިން ވަނީ ލިވަޕޫލް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މާރިއޯ ލެމިނާ އެވެ. އެއީ ވިކްޓާ އޮސީމެން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގެ ނަތީޖާ ހަމަހަމަ ކުރުމަށް ލިވަޕޫލް އިން މަސައްކަތް ކުރި ނަމަވެސް، އެ ޓީމަށް އެކަން ކާމިޔާބެއް ނުވި އެވެ.

މީގެ ކުރިން މުބާރާތުގެ ގުރޫޕް ސްޓޭޖުގައި މި ދެ ޓީމު ބައްދަލު ކުރިއިރު، އެ މެޗު ވެސް ކާމިޔާބު ކޮށްފައި ވަނީ ގަލަތަސަރާއީ އިންނެވެ. ގަދަ 16 ވަނަ ބުރުގެ ފުރަތަމަ ލެގުން ލިވަޕޫލް ބަލިވެފައިވާއިރު، މުބާރާތުގެ ކުއާޓާ ފައިނަލްގެ ޖާގަ ލިވަޕޫލް އަށް ލިބޭނީ އެ ޓީމުގެ އަމިއްލަ ދަނޑުގައި ކުޅޭ ދެ ވަނަ ލެގުގެ މެޗުން މޮޅުވެގެންނެވެ.

އަނެއްކޮޅުން މިއީ ލިވަޕޫލްގެ ކޯޗު ކަމާ އާން ސްލޮޓް ހަވާލުވީ ފަހުން، އޭނާގެ އިރުޝާދުގެ ދަށުން އެ ޓީމު ކުޅުނު 100 ވަނަ މެޗެވެ. މި ސީޒަންގައި ލިވަޕޫލްގެ ނަތީޖާތައް ދަށްވުމުގެ ސަބަބުން ސްލޮޓް އަށް އަންނަނީ ޕްރެޝަރު ބޮޑު ވަމުންނެވެ.