ފަހު ވަގުތު ފޮރެސްޓް ބަލިކުރުމަށް ފަހު ލިވަޕޫލަށް ހަމަޖެހިލައިފި

އިނގިރޭސި ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުން ފަހު ވަގުތު މޮޅުވެ، ލިވަޕޫލް އިން ހަމަޖެހުމެއް ހޯދައިފި އެވެ. 

ފޮރެސްޓުގެ އަމިއްލަ ދަނޑުގައި ކުޅުނު މެޗު ލިވަޕޫލް އިން ކާމިޔާބު ކުރީ 1-0 އިންނެވެ. މެޗުގައި ލިވަޕޫލުން ޖެހި، ހަމައެކަނި ލަނޑު ޖެހީ މެޗުގެ އެންމެ ފަހު ވަގުތުގަ އެވެ. 

މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ލިވަޕޫލް އަށް ކުޅެމުން އަންނަ އާޖެންޓީނާގެ އަލެކްސިސް މެކް އަލިސްޓާ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަަލައި ނުގަންނަން ނިންމައިފަ އެވެ. އެއީ އޮފްސައިޑުގައި ހުރުމުންނެވެ. 

ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި މެކް އަލިސްޓާ ވަނީ ލަނޑު ޖަހައި މެޗުން ލިވަޕޫލް މޮޅު ކޮށްދީފަ އެވެ. އެ ލަނޑު ބަަލައި ގަންނަން ނިންމީ ވެސް ވީއޭއާރު ބެލުމަށް ފަހު އެވެ. މިއީ މިދިޔަަ އަހަރުގެ ޑިސެމްބަރު މަހުގެ ފަހުން، ލީގުގައި ޖެހި ޖެހިގެން ދެ މެޗުން ލިވަޕޫލް މޮޅުވި ފުރަތަމަ ފަަހަރެވެ.

މި މޮޅާ އެކު ލިވަޕޫލް އޮތީ ލީގުގެ ތާވަލްގެ ހަ ވަނަ މަގާމުގަ އެވެ. މިހާތަނަށް ލީގުގައި ކުޅެފައިވާ 27 މެޗުން ލިވަޕޫލަށް ލިބެނީ 45 ޕޮއިންޓެވެ. ލިވަޕޫލް އަށް ވުރެ އެއް މެޗު މަދުން ކުޅެފައިވާ މެންޗެސްޓަރ ޔުނައިޓެޑަށް ފަސް ވަނައިގައި އޮތްއިރު ލިބެނީ 45 ޕޮއިންޓެވެ. މި ސީޒަންގައި ލިވަޕޫލްގެ ނަތީޖާތައް ވަރަށް ބޮޑަށް ދަށްވެފައިވާއިރު، އެ ޓީމުން އަންނަނީ ލީގު ގަދަ ހަތަރެއްގައި ހިމެނޭތޯ މަސައްކަތް ކުރަމުންނެވެ.