ފެންނަ ނުފެންނަ ވޯޓުގެ ނަތީޖާ އަކީ މަޖިލިސް އުވާލުން ކަމަށް ވެދާނެ، މިއީ ރިޔާސީ ނިޒާމެއްގައި ކުރެވޭނެ ކަމެއް ނޫން: ޖިނާހު
ގައުމީ ބޮޑު މަޝްވަރާއަކާ ނުލައި ގާނޫނުއަސާސީއަށް ބަދަލު ގެނައުމަކީ ރަނގަޅު ގޮތެއް ނޫން ކަމަށް ކުރީގެ އޭސީޕީ މުހައްމަދު ޖިނާހު ވިދާޅުވި. ރިޔާސީ ނިޒާމެއްގައި މަޖިލިސް އުވާލުމަކީ ކުރެވޭނެ ކަމެއް ނޫންކަން ފާހަގަކުރައްވައި، ގާނޫނުއަސާސީގެ މާއްދާތައް ސިޔާސީ ބޭނުމަށް "ސްވިޗެއް" ގޮތަށް ބޭނުންކުރުމާ މެދު އޭނާ ކަންބޮޑުވުން ފާޅުކުރެއްވި.
ކުރީގެ އޭސީޕީ މުހައްމަދު ޖިނާހު ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަނީ. | ސްކްރީން އިމޭޖް
ފެންނަ ނުފެންނަ ވޯޓުގެ ނަތީޖާ އަކީ މަޖިލިސް އުވާލުން ކަމަށް ވެދާނެ ކަމަށާއި މިއީ ރިޔާސީ ނިޒާމެއްގައި ކުރެވޭނެ ކަމެއް ނޫން ކަމަށް ކުރީގެ އޭސީޕީ މުހައްމަދު ޖިނާހު ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި އޮންލައިންކޮށް ބައިވެރިވެވަޑައިގެން ވާހަކަދައްކަވަމުންނެވެ. އޭނާ ވިދަޅުވީ އެޕްރިލް މަހު ނަގާ ފެންނަ ނުފެންނަ ވޯޓުގައި ޤާނޫނީ ގޮތުން ފުރިހަމަ ކުރަން ޖެހޭ އިޖުރާއަތުތައް ފުރިހަމަ ނުވާ ކަމަށެވެ.
މީގެ އިތުރުން، އެޕްރިލް މަހު ބާއްވާ ފެންނަ ނުފެންނަ ވޯޓަކީ ދެ ގަނޑުގެ ޤާނޫނީ ޑްރާފްޓަކަށް އަހާ ވޯޓެއް ކަމަށް އޭނާ ވިދާޅުވި އެވެ. އެއީ ފެންނަ ނުފެންނަ ވޯޓަށް އަހާ ގޮތް ކަމަށް ގަބޫލު ނުކުރެވޭ ކަމަށް އޭނާ ވަނީ ވިދާޅުވެފަ އެވެ.
ކައިރި ކައިރީގައި ޤާނޫނުއަސާސީ އަށް ބަދަލު ގެނައުމަކީ އެއީ ރަނގަޅު ގޮތެއް ނޫން ކަމަށްވެސް އޭނާ ވަނީ ވިދާޅުވެފަ އެވެ. ރައްޔިތުންގެ މަޖިލީހުގެ ދައުރަކީ ޤާނޫނުއަސާސީގައި ބަޔާންކޮށްފައިވާ ކަމަކަށް ވާއިރު ޤާނޫނުއަސާސީ އަށް ބޮޑު ބަދަލު ގެންނަން ވާނީ ޤައުމީ މަޝްވަރާ އަކަށް ފަހުގައި ކަމަށް ޖިނާހު ވަނީ ވިދާޅުވެފަ އެވެ. ދެ އިންތިޚާބު އެއްކޮށްލާ އިރު އެންމެ ބޮޑަށް ކަންބޮޑުވަނީ ޤާނޫނުއަސާސީގެ 79 ވަނަ މާއްދާގެ (ހ) އަކީ ސްވިޗެއް ގޮތަށް ބޭނުން ކުރުން ކަމަށެވެ.
"79 ވަނަ މާއްދާގެ ހ އަކީ ނިވިދިއްލޭ، ބޭނުންވީމަ ނިވާލާ ދިއްލާލަން ހަދަން އޮންނަ މާއްދާ އެއް ނޫން. މިހާރު މި ގެންނެވި ބަދަލާއި ގުޅިގެން ރައްޔިތުންގެ މަޖިލިސް އުވާލުމަކީ އެންމެ ބޮޑު އެއް ކަންބޮޑުވުން." އޭނާ ވިދާޅުވި އެވެ.
މަޖިލިސް އުވާލުމަކީ އެއީ ރިޔާސީ ނިޒާމް ދަންނަ ކަމެއް ނޫން ކަމަށް ޖިނާހު ވަނީ ވިދާޅުވެފަ އެވެ. ރައްޔިތުންގެ މަޖިލީހުގެ ދައުރު ދިގު ކުރެވޭނެ ގޮތްތައް ހުރި ނަމަވެސް މަޖިލީސް ކުރު ކުރެވޭނެ ގޮތެއް ޤާނޫނުއަސާސީގައި ނެތް ކަމަށް އޭނާ ވަނީ ވިދާޅުވެފަ އެވެ. މަޖިލިސް އުވާލުމަކީ ބަރުލަމާނީ ނިޒާމުގެ ސިފަ އެއް ކަމަށް އޭނާ ވަނީ ވިދާޅުވެފަ އެވެ. އެއީ ނޭނގިގެން އޮޅިގެން ކުރެވިފައިވާ ކަމެއް ނޫން ކަމަށާއި، ބޭނުންވީމަ ބޭނުން ބަޔަކު މަޖިލިސް އުވާލުމަކީ ރިޔާސީ ނިޒާމެއްގައި ކުރެވޭނެ ކަމެއް ނޫން ކަމަށް އޭނާ ވަނީ ވިދާޅުވެފަ އެވެ.
