ހުޅަނގު އޭޝިއާގެ ހަމަނުޖެހުންތަކާ ގުޅިގެން އިންޑިއާގެ ޖައިޝަންކަރާއި، ރޫބިއޯ މަޝްވަރާ ކުރައްވައިފި

އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަން ޖައިޝަންކަރާއި، އެމެެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ފޯނުން ގުޅުއްވައި، ހުޅަނގު އޭޝިއާގެ މަސްރަހާއި ހަކަތައިގެ ރައްކާތެރިކަމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވައިފި އެވެ. 

ޖައިޝަންކަރާއި ރޫބިއޯ މަޝްވަރާ ކުރައްވާފައި ވަނީ ހޯމަ ދުވަހު އެވެ. އެ ފޯނު ކޯލާ ގުޅޭ ގޮތުން ޖައިޝަންކަރު ވިދާޅުވީ، ދެ ބޭފުޅުން ދެމެދުގައި މައިގަނޑު ގޮތެއްގައި މަޝްވަރާ ކުރެވުނީ ހުޅަނގު އޭޝިއާގައި މިހާރު ހިނގަނުންދާ ހަމަނުޖެހުންތަކާއި، އޭގެ ސަބަބުން ދުނިޔޭގެ އިޤްތިޞާދަށް ކުރަމުންދާ އަސަރުތަކާ ގުޅޭ ގޮތުން ކަމަށެވެ. މީގެ އިތުރުން ބައިނަލްއަޤުވާމީ ބާޒާރުގައި ހަކަތައިގެ ރައްކާތެރިކަން ކަށަވަރު ކުރުމަށް ހުރި ގޮންޖެހުންތަކާ ގުޅޭ ގޮތުން ވެސް ދެ ބޭފުޅުން ވަނީ މަޝްވަރާ ކުރައްވައިފަ އެވެ. 

ސޯޝަލް މީޑިއާގައި ކުރެއްވި ޕޯސްޓެއްގައި ޖައިޝަންކަރު ވިދާޅުވީ، ހުޅަނގު އޭޝިއާގެ ހަމަނުޖެހުން ތަކުގެ ސަބަބުން ބައިނަލްއަޤުވާމީ މާކެޓު ތަކަށް ކުރާނެ ނޭދެވޭ އަސަރުތަކާ މެދު އިންޑިއާ އިން ކަންބޮޑުވާ ކަމަށެވެ. އަދި މި ހަމަ ނުޖެހުން ތަކުގެ ސަބަބުން ދުނިޔޭގެ އިޤްތިޞާދީ ދުވެއްޔަށް މަޑު ޖެހުމެއް އަތުވެދާނެތީ، އެކަމަށް ދުރާލައި ތައްޔާރުވުމުގެ މުހިންމުކަން ވެސް ދެ ބޭފުޅުންގެ ވާހަކައިގައި ވަނީ ފާހަގަ ކުރައްވައިފަ އެވެ. 

މި މަޝްވަރާ ތަކުގައި ހަކަތައިގެ ރައްކާތެރިކަމަށް ހުރި ނުރައްކާ ތަކަށް އަލި އަޅުއްވާލައްވަމުން، ދުނިޔޭގެ ބާޒާާރުގައި ތެލާއި ގޭހުގެ އަގުތައް ހިފެހެއްޓުމަށާއި، ސަޕްލައި ޗެއިން މެދު ނުކެނޑި ކުރިއަށް ގެންދިޔުމަށް ކުރެވިދާނެ ކަންކަމާ ގުޅޭ ގޮތުން ވެސް މަޝްވަރާ ކުރެވުނު ކަމަށް ޖައިޝަންކަރު ވިދާޅުވި އެވެ. 

އެމެރިކާ އާއި އިންޑިއާ އިން ގެންދަނީ ދެ ޤައުމުގެ ދެ މެދުގައި އޮތް ގުޅުން ރަނގަޅު ކުރުމާ އެކު، އެ ގުޅުން އިތުރަށް ވަރުގަދަ ކުރުމަށް ގިނަ މަސައްކަތް ތަކެއް ކުރަމުންނެވެ.