މިސައިލް ޕްރޮގްރާމްއާ ގުޅޭ ގޮތުން އީރާން އިން ވާހަކަ ނުދެއްކުމަކީ ވަރަށް ބޮޑު ގޯހެއް: ރޫބިއޯ

އީރާން އާއި އެމެރިކާާއާ ދެމެދު ކުރިއަށް ގެންދަމުން އަންނަ މަޝްވަރާ ތަކުގައި، އީރާންގެ މިސައިލް ޕްރޮގްރާމްއާ ގުޅޭ ގޮތުން އެ ޤައުމުން ވާހަކަ ދައްކަން ޖެހޭ ކަމަށާއި، އެ ވާހަކަ ނުދެއްކުމަކީ ވަރަށް ބޮޑު ގޯހެއް ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ. 

އެމެރިކާ އާއި އީރާންއާ ދެމެދު ތިން ވަނަ ބުރުގެ މަޝްވަރާ ތަކެއް ބުރާސްފަތި ދުވަހު ކުރިއަށްދާއިރު، އެ މަޝްވަރާ ތަކުގެ ކުރިން ނޫސްވެރިންނާ ވާހަކަ ދައްކަވަމުން ރޫބިއޯ ވިދާޅުވީ، އީރާން އިން ބެލިސްޓިކް މިސައިލްތަކާ ބެހޭ ގޮތުން ނުދައްކާނެ ކަމަށް އެ ޤައުމުން ބުނެފައި ވުމަކީ ވަރަށް ބޮޑު މައްސަލައެއް ކަމަށެވެ. 

ނަމަވެސް، ޖެނީވާގައި ކުރިއަށް ގެންދާ ވާހަކަ ތަކަކީ އެމެރިކާ އިން އީރާން އަށް ހަމަލާ ދާނެ ކަމެއް ނުވަތަ ނޫން ކަމެއް ނިންމާނެ މަޝްވަރާ ތަކެއްކަން ސާފުކޮށް ރޫބިއޯ ވިދާޅުވެފައި ނުވެ އެވެ. ކެރީބިއަން ކަނޑުގެ ކުޑަ ޤައުމެއް ކަމަށްވާ ސެއިންޓް ކިޓްސް އެންޑް ނެވިސް އަށް ކުރެއްވި ދަތުރުފުޅުގައި ރޫބިއޯ ވިދާޅުވީ، އެމެރިކާގެ ރައީސް ޓްރަމްޕް ބޭނުން ވަނީ ސިޔާސީ ގޮތުން މައްސަލަ ހައްލު ކުރަން ކަމަށެވެ. އަދި އެއީ ޓްރަމްޕް ވަރަށް ބޮަޑަށް ބާރު އަޅުއްވާ ގޮތެއް ކަމަށް ވެސް އޭނާ ވިދާޅުވެފައިވެ އެވެ. 

މަޝްވަރާތަކާ ގުޅޭ ގޮތުން ރޫބިއޯ ވިދާޅުވެފައި ވަނީ، އެ މަޝްވަރާތަކާއި، ވާހަކަ ތަކުން ނަތީޖާއެއް ހޯދޭނެ ކަމަށް އުންމީދު ކުރައްވާ ކަމަށެވެ. ނަމަވެސް، ފަހުން އަދި ނިއުކްލިއަރ ޕްރޮގްރާމް އަށް ވުރެ އިތުރަށް، އެހެން ކަންތައްތަކާ ގުޅޭ ގޮތުން ވެސް ވާހަކަ ދައްކަން ޖެހޭނެ ކަމަށް ރޫބިއޯ ވިދާޅުވެފައިވެ އެވެ. 

އެމެރިކާ އިން އީރާން އަށް ހަމަލާ ދިނުމާ ގުޅޭ ގޮތުން ސުވާލު ކުރުމުން ރޫބިއޯ ވިދާޅުވީ، މިހާތަނަށް އައިއިރު އެމެރިކާގެ ރައީސް ޓްރަމްޕް އެފަދަ ނިންމުމެއް ނިންމަވާފައި ނެތް ކަމަށެވެ. އެހެންކަމުން ބުރާސްފަތި ދުވަހަކީ ވަކި ޚާއްސަ ތާރީޚެއްގެ ގޮތުގައި ފާހަގަވާން ނެތް ކަމަށް ވެސް ރޫބިއޯ ވިދާޅުވެފައިވެ އެވެ. އެކަަމަކު ވެސް، މަޝްވަރާ ތަކުން ކުރިއެރުން ހޯދުމަކީ ވަރަށް މުހިންމު ކަމެއް ކަމަށް އޭނާ ފާހަގަ ކުރެއްވި އެވެ. 

އީރާންގެ ނިއުކްލިއަރ ޕްރޮގްރާމް އާއި، މިސައިލް ޕްރޮގްރާމް އަކީ އެމެރިކާ އިން އިންތިހާ އަށް ކަންބޮޑުވާ މައްސަލައެއް ކަމަށް ބުނެ، އެމެރިކާ އިން ގެންދަނީ އީރާން އަށް އެކި ކަހަލަ އިންޒާރުތައް ދެމުންނެވެ. ނަމަވެސް، އީރާން އިން ބުނަމުން ގެންދަނީ އެ ޤައުމުގެ މިސައިލް ޕްރޮގްރާމް އަކީ އެ ޤައުމުގެ ދިފާއުގައި ހިންގާ ޕްރޮގްރާމެއް ކަމަށެވެ.