އިރާނާއި އެމެރިކާގެ ނިއުކްލިއާ މަޝްވަރާތައް "ރަނގަޅު ފެށުމެއް" ކަމަށް އީރާނުގެ ޚާރިޖީ ވަޒީރު ވިދާޅުވެއްޖެ

އިރާނާއި އެމެރިކާއާ ދެމެދު އޮމާންގައި ހުކުރު ދުވަހު ބޭއްވި ނިއުކްލިއާ މަޝްވަރާތަކަކީ ރަނގަޅު ފެށުމެއް ކަމަށާއި، އެ މަޝްވަރާތައް ކުރިއަށްދާނެ ކަމަށް އިރާނުގެ ފޮރިން މިނިސްޓަރު ވިދާޅުވެއްޖެ އެވެ.

ހަ ގަޑީއިރުގެ ދިގު މި މަޝްވަރާތައް ބާއްވާފައި މިވަނީ، މުހިންމު މި ނިންމުންތަކުގައި ނާކާމިޔާބީއާ ކުރިމަތިލާން ޖެހިއްޖެ ނަމަ މެދުއިރުމަތީގައި އިތުރު ހަނގުރާމައެއް ފެށިދާނެ ކަމުގެ ބިރު ބޮޑުވެފައިވާ ދަނޑިވަޅެއްގަ އެވެ.

އިރާނުގެ ދައުލަތުގެ ޓީވީއަށް ދެއްވި ބަސްދީގަތުމެއްގައި ފޮރިން މިނިސްޓަރު އައްބާސް އަރަގްޗީ ވިދާޅުވީ، މިއީ މަޝްވަރާތަކަށް ލިބުނު ރަނގަޅު ފެށުމެއް ކަމަށާއި، ވާހަކަތައް ކުރިއަށް ގެންދިއުމާ މެދު ދެފަރާތުގެ މެދުގައި މިހާރު ވަނީ އެއްބަސްވުމަކަށް އާދެވިފައި ކަމަށެވެ. އަދި ކުރިއަށްދާނެ ގޮތުގެ އިތުރު ކަންކަން ނިންމާނީ ދެ ގައުމުގެ ވެރިރަށްތަކުގައި ކަމަށް އޭނާ ވިދާޅުވި އެވެ.

އަރަގްޗީ އިތުރަށް ވިދާޅުވީ، މި މަރުހަލާ މިގޮތަށް ކުރިއަށްދާ ނަމަ، ދެފަރާތުން އެއްބަސްވާ ފަދަ ރަނގަޅު އޮނިގަނޑަކަށް ވާސިލުވެވޭނެ ކަމަށް ގަބޫލުކުރައްވާ ކަމަށެވެ.

އޮމާންގެ ވެރިރަށް މަސްކަޓުގައި އެ ގައުމުގެ މެދުވެރިކަމާއެކު ނުސީދާކޮށް ކުރިއަށްދިޔަ މި މަޝްވަރާތަކަށްފަހު، ދެ ގައުމުގެ އޮފިޝަލުން ވެސް އިތުރު ލަފާ ހޯދުމަށް އެނބުރި ގައުމަށް ވަޑައިގަންނަވާނެ ކަމަށް އަރާގްޗީ ވިދާޅުވި އެވެ.

އިރާނުގެ ނިއުކްލިއާ މައްސަލައިގައި ހުޅަނގާއެކު އުފެދިފައިވާ ދިގުލީ ދެބަސްވުންތަކަށް ހައްލެއް ހޯދުމަށް ޑިޕްލޮމެޓިކް މަގުން މަސައްކަތް ކުރުމަށް ދެފަރާތުން ވެސް ތައްޔާރަށް ތިބިކަން ހާމަކޮށްފައިވީ ނަމަވެސް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ބުދަ ދުވަހު ވިދާޅުވީ، އިރާނުގެ ބެލިސްޓިކް މިސައިލްތަކާއި، ސަރަހައްދީ ހަނގުރާމަވެރި ޖަމާއަތްތަކަށް ދޭ އެހީތެރިކަމާއި، އެ ގައުމުގެ ރައްޔިތުންނާ މެދު އަމަލުކުރާ ގޮތުގެ މައްސަލަ ވެސް މި މަޝްވަރާތަކުގެ ތެރޭގައި ހިމަނަން ވޮޝިންޓަނުން ބޭނުންވާ ކަމަށެވެ.

އިރާނުގެ ދައުލަތުގެ ނިއުސް އެޖެންސީ "އިރްނާ" އަށް ދެއްވި ބަޔާނެއްގައި އަރަގްޗީ ވިދާޅުވީ، މަޝްވަރާތަކުގައި ބިރުދެއްކުމާއި ފިއްތުންތަކުން ދުރުވާންޖެހޭނެ ކަމަށެވެ. އަދި ތެހެރާނުން އެމެރިކާއާއެކު މަޝްވަރާ ކުރާނީ ހަމައެކަނި ނިއުކްލިއާ މައްސަލައިގައި ކަމަށާއި، އެ ނޫން އެއްވެސް މައްސަލައެއްގައި ވާހަކަ ނުދައްކާނެ ކަމަށް އޭނާ ވިދާޅުވި އެވެ.

އިރާނުގެ އޮފިޝަލުން ތަކުރާރުކޮށް ވިދާޅުވަމުން ގެންދަވަނީ، އެ ސަރަހައްދުގައި އޮތް އެންމެ ބޮޑު އެއް މިސައިލް އާސެނަލް ކަމަށްވާ އިރާނުގެ މިސައިލް ޕްރޮގްރާމާ ގުޅޭގޮތުން އެއްވެސް މަޝްވަރާއެއް ނުކުރާނެ ކަމަށެވެ. އަދި ޔުރޭނިއަމް މުއްސަނދި ކުރުމުގެ ހައްގު އިރާނަށް އޮތްކަން ބަލައިގަތުމަށް ތެހެރާނުން ބޭނުންވާއިރު، އިރާނުގެ އެތެރޭގައި ޔުރޭނިއަމް މުއްސަނދި ކުރުމަކީ ވޮޝިންޓަނުން ގަބޫލުކުރާ ކަމެއް ނޫނެވެ.

އަރަގްޗީ ވިދާޅުވީ، މަޝްވަރާތަކުގައި އޮތް އެންމެ ބޮޑު ގޮންޖެހުމަކީ އިތުބާރު ނެތުން ކަމަށާއި، އެކަން ހައްލުކުރަން ޖެހޭ ކަމަށެވެ.

އިރާނުން ވަނީ އެ ގައުމުގެ "ދިފާއީ ގާބިލުކަމާއި، މިސައިލްތަކާއި އޭގެ ރޭންޖާ" ގުޅޭގޮތުން މަޝްވަރާ ކުރުމަށް ސާފުކޮށް އިންކާރުކޮށްފަ އެވެ.

އިރާނުގެ ބާރު ދައްކާލުމުގެ ގޮތުން، މަޝްވަރާތައް ފެށުމުގެ މަދު ގަޑިއިރުތަކެއް ކުރިން އެ ގައުމުގެ ދައުލަތުގެ ޓީވީން ވަނީ، އިސްލާމިކް ރިވޮލިއުޝަނަރީ ގާޑް ކޯޕްސްގެ ބޮޑު ބިންގަރާސް "މިސައިލް ސިޓީ" އެއްގައި، އެ ގައުމުގެ އެންމެ ޒަމާނީ ދުރު ރޭންޖުގެ ބެލިސްޓިކް މިސައިލް ކަމަށްވާ "ޚުއްރަމްޝަހަރު-4" ބަހައްޓާފައިވާ މަންޒަރު ދައްކާފަ އެވެ.

އެހެންނަމަވެސް، ޔުރޭނިއަމް މުއްސަނދި ކުރުމުގެ މައްސަލައިގައި ދޫދިނުމަށް ތެހެރާން ތައްޔާރަށް އޮތް ކަމަށާއި، އޭގެ ތެރޭގައި 400 ކިލޯގެ މަތީ ދަރަޖައަށް މުއްސަނދިކޮށްފައިވާ ޔުރޭނިއަމް ހަވާލުކުރުމާއި، ކޮންސޯޓިއަމް އެއްގެ ދަށުން ނޫނީ ޔުރޭނިއަމް މުއްސަނދި ކުރުން ހުއްޓާލުމަށް ތައްޔާރަށް އޮތް ކަމަށް އިރާނުގެ އޮފިޝަލުން މިދިޔަ ހަފުތާގައި ރޮއިޓާސްއަށް މައުލޫމާތު ދީފައިވެ އެވެ.

މީގެ އިތުރުން، 2015 ވަނަ އަހަރު ދުނިޔޭގެ ބާރުތަކާއެކު ވެފައިވާ ނިއުކްލިއާ އެއްބަސްވުމުން 2018 ވަނަ އަހަރު ޓްރަމްޕް ވަކިވެވަޑައިގަތުމާ ގުޅިގެން އަލުން އަޅާފައިވާ ދަތިކުރުމުގެ ފިޔަވަޅުތައް އުވާލުމަށް ވެސް އިރާނުން ދަނީ ޑިމާންޑް ކުރަމުންނެވެ.