އެމެރިކާ ރައްޔިތުން އީރާނާއެކު ހަނގުރާމައަކަށް ބޭނުން ނުވާކަމަށް ސެނެޓުގެ މައިނޯރިޓީ ލީޑަރު ވިދާޅުވެއްޖެ

އެމެރިކާގެ ސެނެޓުގެ މައިނޯރިޓީ ލީޑަރު ޗަކް ޝޫމަރ ބުދަ ދުވަހު ވިދާޅުވީ، މެދުއިރުމަތީގައި ހަނގުރާމައެއް ކުރަން އެމެރިކާގެ ރައްޔިތުން ބޭނުންނުވާ ކަމަށެވެ. އަދި އެމެރިކާ ސިފައިންގެ ތެރެއިން މަރުވާ މީހުންނާއި އަނިޔާވާ މީހުންގެ އަދަދު އިތުރުވަމުންދާތީ، ޓްރަމްޕްގެ ސަރުކާރުން އެކަމުގެ ޖަވާބުދާރީވުމަށް ރައްޔިތުން ގޮވާލަމުންދާކަމަށް އޭނާ ވިދާޅުވިއެވެ.

ސެނެޓުގައި ވާހަކަދައްކަވަމުން ޝޫމަރ ވިދާޅުވީ، ފެބްރުއަރީ މަހުގެ 28 ވަނަ ދުވަހުން ފެށިގެން މިހާތަނަށް އެމެރިކާ ސިފައިންގެ 140 މީހަކަށް އެކިވަރުގެ އަނިޔާ ލިބިފައިވާ ކަމަށެވެ. މީގެ ތެރޭގައި ސީރިއަސް އަނިޔާ ލިބުނު އަށް މީހަކު ހިމެނޭއިރު، ޚިދުމަތުގައި އުޅެނިކޮށް އަށް ސިފައިން މަރުވެފައިވާކަން އޭނާ ފާހަގަކުރެއްވިއެވެ.

މީގެ އިތުރުން، މެދުއިރުމަތީގައި ހިނގަމުންދާ ކުރިމަތިލުންތަކުގައި އެތައް ހާސް ބަޔަކު މަރުވެފައިވާ ކަމަށާއި، އޭގެ ތެރޭގައި އަންހެން ކުދިންގެ އެލެމެންޓްރީ ސްކޫލެއްގައި ތިބި 170 ކުދިން ހިމެނޭ ކަމަށް ޝޫމަރ ވިދާޅުވިއެވެ.

"އެންމެ ފުރަތަމަ ލިބުނު ރިޕޯޓުތަކުން އެނގޭ ގޮތުގައި، އެ ހާދިސާއަކީ އެމެރިކާގެ އަސްކަރީ އޮޕަރޭޝަނެއްގެ ނަތީޖާއަކަށް ވެދާނެ،" ޝޫމަރ ވިދާޅުވިއެވެ. އޭނާ ވަނީ އެ ސްކޫލަށް ދިން ހަމަލާއާ ގުޅޭގޮތުންނާއި، އެހާ ގިނަ އަދަދެއްގެ އާންމުން މަރުވާން މެދުވެރިވި ސަބަބު ދެނެގަތުމަށް ފުރިހަމަ، ދެފުށް ފެންނަ، އަދި މިނިވަން ތަހުގީގެއް ހިންގުމަށް ގޮވާލައްވާފައެވެ.

ނިއު ޔޯކަށް ނިސްބަތްވާ ޑިމޮކްރެޓިކް ޕާޓީގެ މި މެންބަރު ވިދާޅުވީ، ހަނގުރާމައިގައި މަރުވާ މީހުންގެ އަދަދު އިތުރުވުމާއި، މަސްރަހު ނުތަނަވަސްވުމުގެ އިތުރުން އެމެރިކާގެ އެތެރޭގެ އިގްތިސާދީ ކަންބޮޑުވުންތަކާ ހުރެ، މި ހަނގުރާމައިގެ ބޭނުމަކީ ކޮބައިތޯ ގިނަ ރައްޔިތުން ސުވާލު އުފައްދަމުންދާ ކަމަށެވެ.

"މި ހުރިހާ ބަދަލުތަކާއި، ހަލަބޮލިކަމާއި، ތެލުގެ އަގު އުފުލުމާއި، މަރުވާ މީހުންގެ އަދަދު އިތުރުވުމާއި، ދެކޮޅުވެރިކަން ބޮޑުވަމުންދާއިރު، އެމެރިކާގެ ރައްޔިތުން ކުރަނީ ވަރަށް އާދައިގެ ސުވާލެއް. އެއީ ކީއްވެގެންތޯ؟ އެމެރިކާ ހަނގުރާމައެއް ކުރަނީ ކީއްވެގެންތޯ؟ އެމެރިކާ ރައްޔިތުން ހަމަޔަގީނުންވެސް ހަނގުރާމައަކަށް ބޭނުމެއް ނުވޭ. މިއީ ރައްޔިތުން އެދިގެން ކުރާ ކަމެއް ނޫން،" ޝޫމަރ ވިދާޅުވިއެވެ.

އެމެރިކާގެ ރައްޔިތުންނަށް ޖަވާބު ލިބެންޖެހޭ

އީރާނާ ދެކޮޅަށް ހިންގާ އޮޕަރޭޝަންތަކާ ގުޅޭގޮތުން ރައީސް ޑޮނަލްޑް ޓްރަމްޕް ދައްކަވަނީ އެކި ފަހަރު އެކި ކަހަލަ ވާހަކަތައް ކަމަށް ވިދާޅުވެ ޝޫމަރ ވަނީ ރައީސަށް ތުހުމަތުތަކެއް ކުރައްވާފައެވެ.

"ފުރަތަމަ ވިދާޅުވީ މިއީ ވެރިކަން ބަދަލުކުރަން ކުރާ ކަމެއް ކަމަށް. ދެން ވިދާޅުވީ މިއީ އީރާނުގެ ނިއުކްލިއާ ޕްރޮގްރާމާ ގުޅޭ ކަމެއް ކަމަށް. އޭގެ ފަހުން ވިދާޅުވީ އީރާނުގެ ކަނޑުގެ ސިފައިން ނައްތާލަން ކުރާ ކަމެއް ކަމަށް. އަނެއްކާވެސް ވިދާޅުވީ ވެރިކަން ބަދަލުކުރާ ވާހަކަ. ދެން ވިދާޅުވަނީ މިއީ ދިފާއީ ކަމެއް ކަމަށް. ސުވާލުކުރާ މީހެއްގެ ގޮތުން ލިބޭ ޖަވާބު ތަފާތު. ބައެއް މީހުން ބުނަނީ ހަނގުރާމަ ނިމެނީއޭ، އަނެއް ބަޔަކު ބުނަނީ މިއީ އަދި ފެށުމޭ،" ޝޫމަރ ވިދާޅުވިއެވެ.

ހަނގުރާމަ ކުރިއަށްދާ ގޮތާ މެދު ވައިޓް ހައުސްއިން ދެމުންދާ ދެކޮޅު ނުޖެހޭ މެސެޖުތަކަށް އޭނާ ވަނީ ވަރަށް ބޮޑަށް ފާޑުވިދާޅުވެފައެވެ.

"މިއީ ހަނގުރާމައިގެ ނިމުންތޯ ނުވަތަ ފެށުންތޯ ޑޮނަލްޑް ޓްރަމްޕް ގާތު އަހައިފިނަމަ، އޭނާ ވިދާޅުވަނީ އެއީ ދެގޮތްވެސް ކަމަށް. މި މޮޔަ ކަންތައްތައް ހުއްޓެންޖެހޭ،" ޝޫމަރ ވިދާޅުވިއެވެ.

ޝޫމަރ ވިދާޅުވީ، ހަނގުރާމައިގެ ސިޔާސަތާއި މަގްސަދުތަކާ ގުޅޭގޮތުން ސަރުކާރުގެ އިސް އޮފިޝަލުންނާ ސުވާލުކުރުމަށް ސެނެޓުގައި އާންމުކޮށް ހުޅުވާލައިގެން އަޑުއެހުންތަކެއް ބާއްވަންޖެހޭ ކަމަށެވެ.

ޚާއްސަކޮށް، ސެކްރެޓަރީ އޮފް ސްޓޭޓް މާކޯ ރޫބިއޯ އާއި ޕެންޓަގަންގެ ވެރިޔާ ޕީޓް ހެގްސެތު، ގާނޫނު ހަދާ މަޖިލީހަށް ހާޒިރުވެ ހުވާގެ މަތީގައި ތިބެ ބަޔާން ދިނުމަށް އޭނާ ގޮވާލެއްވިއެވެ.

"އެމެރިކާގެ ރައްޔިތުންނަށް މިކަމުގެ ހަގީގީ ޖަވާބު ލިބެންޖެހޭ،" އޭނާ އިތުރަށް ވިދާޅުވިއެވެ.