އީރާންއާ ދެމެދު ނުތަނަވަސްކަން އުފެދިފައި ވަނިކޮށް، ރޫބިއޯ އިޒްރޭލް އަށް ވަޑައިގަންނަވަނީ

އެމެރިކާ އާއި އީރާންއާ ދެމެދު ނުތަނަވަސްކަން އިތުރުވެ، ހަމަލާ ދީފާނެ ކަމުގެ ނުރައްކާތެރިކަން ބޮޑުވެފައި ވަނިކޮށް، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އިޒްރޭލް އަށް ވަޑައިގަންނަވަން ނިންމަވައިފި އެވެ. 

އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޓޮމީ ޕިގޮޓް ހާމަ ކުރެއްވި ގޮތުގައި، މާޗު މަހުގެ ދެ ވަނަ ދުވަހުން ފެށިގެން، ތިން ވަނަ ދުވަހުގެ ނިޔަލަށް ރޫބިއޯ އިޒްރޭލް އަށް ވަޑައިގަންނަވާނެ އެވެ. މި ދަތުރުފުޅުގައި ލުބުނާން އާއި، ޣައްޒާ އަށް އެމެރިކާގެ ރައީސް ޑޮނަލްޑް ޓްރަމްޕްގެ ވިހި ނުކުތާގެ ސުލްޙައިގެ ޕްލޭން ތަންފީޒު ކުރުމުގެ މަސައްކަތްތައް ހިމެނޭ ގޮތުން، ސަރަހައްދީ މުހިންމު ކަންކަމާ މެދު މަޝްވަރާ ކުރައްވާނެ ކަމަށް ވެސް ޕިގޮޓް ވިދާޅުވި އެވެ. 

ރޫބިއޯ އިޒްރޭލް އަށް ވަޑައިގަންނަވާ މި ދަނޑިވަޅަކީ، އީރާން އާއި އެމެރިކާއާ ދެމެދު ނުތަނަވަސްކަން އިތުރުވެފައިވާ ވަގުތެކެވެ. އީރާންގައި އެ ޤައުމުގެ ސަރުކާރާ ދެކޮޅަށް ފެށުނު މުޒާހަރާތައް މައިތިރި ކުރުމަށް ބާރުގެ ބޭނުން ކުރުމާއި، ނިއުކްލިއާ މައްސަލައިގައި އެމެރިކާ އިން އަންނަނީ އީރާން އަށް އިންޒާރު ދެމުންނެވެ. އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް، އެމެރިކާ އިން ވަނީ މެދު އިރުމަތީގައި އަސްކަރީ ބާރުވެރިކަން އިތުރު ކޮށްފަ އެވެ. 

އީރާން އާއި އެމެރިކާއާ ދެމެދު ނިއުކްލިއާ އެއްބަސްވުމެއް ޤާއިމު ކުރުމަށް މަޝްވަރާތައް އަންނަނީ ކުރިއަށް ގެންދަމުންނެވެ. އެގޮތުން އަލުން މަޝްވަރާތައް ފަށާފައިވާއިރު، މިހާތަނަށް ވަނީ ތިން ބުރެއްގެ މަތިން މަޝްވަރާތައް ކުރިއަށް ގެންގޮސްފަ އެވެ. އޮމާން މެދުވެރިވެގެން ކުރިއަށް ގެންދާ މަޝްވަރާ ތަކާ މެދު ހިތްހަމަ ނުޖެހޭ ކަމަށް ވެސް އެމެރިކާ އިން އޮތީ ހާމަ ކޮށްފަ އެވެ. ނަމަވެސް އޮމާން އިން ބުނެފައި ވަނީ މަޝްވަރާތައް ކުރިއަށް ދަނީ ރަނގަޅު މިސްރާބެއްގައި ކަމަށެވެ. 

މިއީ މިއަހަރުގެ ތެރޭގައި ރޫބިއޯ އިޒްރޭލް އަށް ވަޑައިގަންނަވާ ފުރަތަމަ ފަހަރެވެ. ނަމަވެސް، މިދިޔަ އަހަރުގެ ތެރޭގައި ރޫބިއޯ ވަނީ އެކި ފަހަރު މަތިން އިޒްރޭލް އަށް ވަޑައިގެންފަ އެވެ. އެމެރިކާ އާއި އިޒްރޭލްއާ ދެމެދު ގޮތް ގުޅުމެއް އޮންނައިރު، ޓްރަމްޕްގެ ރިޔާސީ ދެ ވަނަ ދައުރުގައި އެ ގުޅުން އިތުރުވެފައިވާކަން ފާހަގަ ކުރެވެ އެވެ.