އީރާނަށް ހަމަލާ ދިނުމަށް ޗާގޯސް ބޭނުން ކުރުމުގެ ހުއްދަ ނުދޭނެ ކަމަށް އިނގިރޭސިން ބުނެފައިވަނިކޮށް އިނގިރޭސި ޚާރިޖީ ވަޒީރު އެމެރިކާގެ ސެކްރެޓަރީ އޮފް ސްޓޭޓާ ބައްދަލުކުރައްވަނީ
ޗާގޯސް ޖަޒީރާގެ ސިޔާދަތީ ބާރު މޮރިޝަސްއާ ހަވާލުކުރުމަށް އިނގިރޭސިވިލާތުން ނިންމި ނިންމުމަށް އެމެރިކާގެ ރައީސް ޑޮނަލްޑް ޓްރަމްޕް އަނެއްކާވެސް ވަރަށް ބޮޑަށް ފާޑުވިދާޅުވެއްޖެ. ޓްރަމްޕް މި އެއްބަސްވުމާ ދެކޮޅު ހައްދަވަނީ އީރާނާ ދެކޮޅަށް ހިންގާފާނެ އަސްކަރީ އޮޕަރޭޝަންތަކުގައި ފޯޅަވަހީގެ އަސްކަރީ މަރުކަޒު ބޭނުންކުރުމުގެ ހުއްދަ އިނގިރޭސިވިލާތުން ނުދީފާނެތީ ކަމަށް ރިޕޯޓްތައް ބުނޭ. މި މައްސަލައިގައި ޚިޔާލުތަފާތުވުންތައް އުފެދިފައިވާ ދަނޑިވަޅެއްގައި، އިނގިރޭސި ޚާރިޖީ ވަޒީރު އެމެރިކާގެ ސެކްރެޓަރީ އޮފް ސްޓޭޓާ ބައްދަލުކުރައްވައި ދިފާއީ ކަންކަމާ ގުޅޭގޮތުން މަޝްވަރާކުރެއްވުމަށް ވަނީ ހަމަޖެހިފައި.
އަފްޣާނިސްތާނަށް ހަމަލާދިނުމަށް ހިންގި "އޮޕަރޭޝަން އެންޑިއުރިން ފްރީޑަމް" ގެ ތެރެއިން، 2001 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު، ހަމަލާދޭ މިޝަންއަކަށް ފުރުމަށްޓަކައި ޑިއޭގޯ ގާސިއާގައި ބީ-52އެޗް ސްޓްރެޓޯފޯޓްރެސް ބޮންއަޅާ ބޯޓު ދުއްވާފައި ދިޔައިރު، އެމެރިކާގެ އެއާފޯސް ގްރައުންޑް ކުރޫގެ މެންބަރުން އެ ބޯޓަށް އަތުން އިޝާރާތްކޮށް ހަނާއަޅަނީ. | ގެޓީ އިމޭޖަސް
އެމެރިކާ އާއި އިނގިރޭސިވިލާތުގެ އަސްކަރީ މަރުކަޒެއް ގާއިމުކޮށްފައިވާ ޗާގޯސް ޖަޒީރާގެ ސިޔާދަތީ ބާރު ދޫކޮށްލުމަށް އިނގިރޭސިވިލާތުން ނިންމި ނިންމުމަށް، އެމެރިކާގެ ރައީސް ޑޮނަލްޑް ޓްރަމްޕް އަލުން ފާޑުވިދާޅުވެފައި ވަނިކޮށް، އިނގިރޭސި ޚާރިޖީ ވަޒީރު އިވެޓް ކޫޕާ ހުކުރު ދުވަހު އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ ބައްދަލުކުރައްވާ ގޮތައް ހަމަޖެހިފައިވާ ކަމަށް ރޮއިޓާސް އިން ބުނެފި އެވެ.
އިންޑިއާ ކަނޑުގައި އޮންނަ މި ޖަޒީރާތަކުގެ ސިޔާދަތީ ބާރު މޮރިޝަސްއާ ހަވާލުކުރުމަށް އިނގިރޭސި ބޮޑުވަޒީރު ކިއަރ ސްޓާމަރ އެއްބަސްވެވަޑައިގަތީ މިދިޔަ އަހަރުގެ ތެރޭގައެވެ. ނަމަވެސް، އެ އެއްބަސްވުމުގެ ދަށުން އެމެރިކާގެ އަސްކަރީ އޮޕަރޭޝަންތައް ކުރިއަށްގެންދާ ފޯޅަވަހި (ޑިއޭގޯ ގާސިއާ) 99 އަހަރުގެ ކުއްޔަކަށް އިނގިރޭސިވިލާތުގެ ބާރުގެ ދަށުގައި ބޭއްވުމަށް ވަނީ ނިންމާފައެވެ.
މި އެއްބަސްވުމަށް މިދިޔަ އަހަރު އެމެރިކާ ސަރުކާރުން ތާއީދުކުރި ނަމަވެސް، އޭގެ ފަހުން ޓްރަމްޕް ވަނީ އެކި ފަހަރު މަތިން އެކަމާ މެދު އެކި ގޮތައް ވާހަކަ ދައްކަވާފަ އެވެ. އެގޮތުން މިދިޔަ ޖެނުއަރީ މަހު ޓްރަމްޕް އެ އެއްބަސްވުން ސިފަކުރެއްވީ "ވަރަށް ބޮޑު މޮޔަކަމެއް" ގެ ގޮތުގައެވެ. ނަމަވެސް، މި މަހުގެ ކުރީކޮޅު އޭނާ ވިދާޅުވީ އެއީ ބޮޑުވަޒީރު ސްޓާމަރަށް ހެއްދެވޭނެ އެންމެ ރަނގަޅު އެއްބަސްވުން ކަމަށް ގަބޫލުކުރައްވާ ކަމަށެވެ. އެހެންނަމަވެސް، މި ހަފުތާގައި ޓްރަމްޕް ވަނީ އަނެއްކާވެސް އެ ނިންމުމަށް ވަރަށް ބޮޑަށް ފާޑުވިދާޅުވާން ފައްޓަވާފައެވެ.
ވޮޝިންގޓަންގައި ކޫޕާ، ރޫބިއޯއާ ބައްދަލުކުރައްވަނީ ދިފާއީ އަދި ސަލާމަތީ ކަންކަމާ ގުޅޭގޮތުން މަޝްވަރާކުރެއްވުމަށެވެ. މި ބައްދަލުވުން މި ބާއްވަނީ، އީރާނުގެ ނިއުކްލިއަރ ޕްރޮގްރާމާ ގުޅޭގޮތުން ކުރިއަށް އޮތް 10 ނުވަތަ 15 ދުވަހުގެ ތެރޭގައި އެއްބަސްވުމަކަށް އަންނަންޖެހޭނެ ކަމަށާއި، އެހެން ނޫންނަމަ "ވަރަށް ގޯސް ކަންތައްތަކެއް" ހިނގާފާނެ ކަމަށް ވިދާޅުވެ، ޓްރަމްޕް އީރާނަށް ދެއްވާ އިންޒާރުތައް ވަރުގަދަކުރައްވާފައިވާ ދަނޑިވަޅެއްގައެވެ.
ފޯޅަވަހީގައި އޮންނަ އަސްކަރީ މަރުކަޒަކީ ފަހަކަށް އައިސް މެދުއިރުމަތީގައި ޔަމަނުގެ ހޫޘީންނާ ދެކޮޅަށް ހިންގާ އޮޕަރޭޝަންތަކުގައާއި، ޣަޒާއަށް އިންސާނީ އެހީ ފޯރުކޮށްދިނުމުގެ މަސައްކަތްތަކުގައި ބޭނުންކުރަމުންދާ މަރުކަޒެކެވެ.
ޗާގޯސް އެއްބަސްވުމަށް ތާއީދުކުރާ ކަމަށް ރޫބިއޯގެ ސްޓޭޓް ޑިޕާޓްމަންޓުން މިދިޔަ އަންގާރަ ދުވަހު ބުނި ނަމަވެސް، އޭގެ ޖެހިގެން އައި ދުވަހު ޓްރަމްޕް ވިދާޅުވީ އިނގިރޭސިވިލާތުން ހަދަނީ ވަރަށް ބޮޑު ގޯހެއް ކަމަށެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ކުރެއްވި ޕޯސްޓެއްގައި "ޑިއޭގޯ ގާސިއާ ދޫކޮށްނުލާ!" ލިޔުއްވާފައިވެ އެވެ. އަދި އީރާނުން ދީފާނެ ހަމަލާއެއް ހުއްޓުވުމަށް ކުރިއަށް އޮތް ތަނުގައި ހިންގާ އެއްވެސް އަސްކަރީ އޮޕަރޭޝަނެއްގައި އެ މަރުކަޒުގެ ބޭނުން ހިފަން ޖެހިދާނެ ކަމަށް ވެސް އޭނާ ވިދާޅުވިއެވެ.
މި ދެ ގައުމު ގުޅިގެން ބޭނުންކުރާ އަސްކަރީ މަރުކަޒުގެ އުސޫލުތައް އޮންނަ ގޮތުން، ފޯޅަވަހިން ހިންގާ ކޮންމެ އޮޕަރޭޝަނަކަށް އިނގިރޭސިވިލާތުގެ އިޒުނަ ކުރިން ހޯދަންޖެހެއެވެ.
އިނގިރޭސިވިލާތުގެ "ދަ ޓައިމްސް" ނޫހުން ބުރާސްފަތި ދުވަހު ރިޕޯޓްކޮށްފައިވާ ގޮތުގައި، ޗާގޯސް އެއްބަސްވުމަށް ޓްރަމްޕް އެންމެ ފަހުން ފާޑުވިދާޅުވީ، އީރާނަށް ދޭ ހަމަލާތަކުގައި އެ މަރުކަޒު ބޭނުންކުރުމުގެ ހުއްދަ އިނގިރޭސިވިލާތުން އަދި ދީފައި ނުވާތީއެވެ. އިނގިރޭސިވިލާތުން އެ ހުއްދަ ނުދީ ހިފަހައްޓަނީ، އެފަދަ ހަމަލާތަކަކީ ބައިނަލްއަގުވާމީ ގާނޫނުތަކާ ޚިލާފު ކަމަކަށް ވެދާނެތީ ކަމަށް އެ ނޫހުން ބުނެފައިވެއެވެ.
"ދަ ޓައިމްސް" ގެ މި ރިޕޯޓާ ގުޅޭގޮތުން ސުވާލުކުރުމުން، އިނގިރޭސި ދިފާއީ ވުޒާރާއިން ބުރާސްފަތި ދުވަހު ބުނީ އަސްކަރީ އޮޕަރޭޝަންތަކާ ގުޅޭ ކަންކަމުގައި އެ މިނިސްޓްރީން ވަކި އެއްޗެއް ހާމަނުކުރާނެ ކަމަށެވެ. ނަމަވެސް، އެމެރިކާ އާއި އީރާނާ ދެމެދު މިހާރު ކުރިއަށްދާ ސިޔާސީ މަޝްވަރާތަކަށް އިނގިރޭސިވިލާތުން ތާއީދުކުރާ ކަމަށް އެ ވުޒާރާއިން ބުންޏެވެ.
