އީރާނާ އެކު މަޝްވަރާތައް ކުރިއަށްދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުން އީރާނުން ދޮގުކޮށްފި

އީރާނާ އެކު މަޝްވަރާތައް ކުރިއަށްދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުން އީރާނުން ދޮގުކޮށްފިއެވެ. އީރާނުގެ ފޮރިން މިނިސްޓްރީގެ ތަރުޖަމާނު ވިދާޅުވީ، އެއްވެސް އުސޫލެއް ނެތި އެމެރިކާ އާއި އިޒްރޭލުން އީރާނާ ދެކޮޅަށް ފަށާފައިވާ ހަނގުރާމައަށް 24 ދުވަސް ވެފައިވާއިރު، މި މުއްދަތުގެ ތެރޭގައި ވޮޝިންޓަނާ އެކު އެއްވެސް މަޝްވަރާއެއް ބާއްވާފައި ނުވާނެ ކަމަށެވެ.

ހޯމަ ދުވަހު ވާހަކަދައްކަވަމުން އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަޣާއީ ވިދާޅުވީ، ހޮރްމޫޒް ކަނޑުއޮޅިއާ ގުޅޭގޮތުންނާއި، އީރާނުގެ މައްޗަށް މަޖުބޫރުކޮށްފައިވާ މި ހަނގުރާމަ ހުއްޓާލުމަށް ހުށަހަޅާފައިވާ ޝަރުތުތަކަށް އެއްވެސް ބަދަލެއް އައިސްފައި ނުވާ ކަމަށެވެ.

ސްޓްރެޓީޖިކް ގޮތުން މުހިންމު ހޮރްމޫޒް ކަނޑުއޮޅި ހުޅުވާލުމަށް ޓްރަމްޕް ކުރިން ވަނީ އީރާނަށް 48 ގަޑިއިރުގެ މުހުލަތެއް ދެއްވާފައެވެ. އަދި އެ މުއްދަތުގައި އެކަން ނުކޮށްފިނަމަ އީރާނުގެ އިންޖީނުގެތަކަށް ހަމަލާދޭނެ ކަމުގެ އިންޒާރު ވެސް ދެއްވިއެވެ. ނަމަވެސް، ހޯމަ ދުވަހު ޓްރަމްޕް ވަނީ އެ ނިންމެވުމުން ފަހަތަށް ޖެހިވަޑައިގެން، އީރާނަށް ހަމަލާދިނުމަށް ރާވާފައިވާ ހުރިހާ ރޭވުންތަކެއް މަޑުޖައްސާލުމަށް ޕެންޓަގަނަށް އަމުރުކުރައްވާފައިވާ ކަމަށް ވިދާޅުވެފައެވެ. އަދި އީރާނާ އެކު މަޝްވަރާތައް ކުރިއަށްދާ ކަމަށް ވެސް ޓްރަމްޕް ވަނީ ވިދާޅުވެފައެވެ.

ޓްރަމްޕްގެ އިންޒާރުތަކަށް ރައްދު ދެމުން އީރާނުން ބުނެފައިވަނީ، އިޒްރޭލުގެ ހަކަތަ އުފައްދާ ވަސީލަތްތަކަށާއި، އީރާނާ ދެކޮޅަށް އަސްކަރީ ހަމަލާދިނުމަށް ބޭނުންކުރާ ސަރަހައްދީ ކޮންމެ ގައުމަކަށް ވެސް ހަމަލާދޭނެ ކަމަށެވެ.

އަރަބި ގައުމުތަކުގެ އޮފިޝަލުން ވިދާޅުވި ގޮތުގައި، ތެހެރާނާއި ވޮޝިންޓަނާ ދެމެދު އެއްބަސްވުމަކަށް އައުމަށް ކުރަމުންދާ މަސައްކަތްތަކުން މިހާތަނަށް އެދެވޭ ނަތީޖާއެއް ފެނިފައެއް ނުވެއެވެ. ބަޣާއީ ކަށަވަރުކޮށްދެއްވި ގޮތުގައި، ހިނގަމުންދާ ހަނގުރާމަ ހުއްޓާލުމަށް މަޝްވަރާ ކުރުމަށް އެދި އެމެރިކާއިން ފޮނުވި މެސެޖުތަކެއް، އެކުވެރި ބައެއް ގައުމުތައް މެދުވެރިކޮށް ފާއިތުވި ދުވަސްތަކުގައި އީރާނަށް ލިބިފައިވެއެވެ. އަދި އެކަމަށް އީރާނުން ގަބޫލު ކުރާ އުސޫލުތަކުގެ މައްޗަށް ބިނާކޮށް އެކަށީގެންވާ ރައްދެއް ދީފައިވާނެ ކަމަށް އޭނާ ވިދާޅުވިއެވެ.

އީރާނުން ދިން ރައްދުގައި، އެ ގައުމުގެ މުހިންމު ވަސީލަތްތަކަށް ހަމަލާދީފިނަމަ ކުރިމަތިވާނެ ނުރައްކާތެރި ނަތީޖާތަކާ މެދު އިންޒާރު ދީފައިވާނެ ކަމަށް ބަގާއީ ވިދާޅުވިއެވެ. އަދި އެފަދަ އެއްވެސް އަމަލެއް ހިންގައިފިނަމަ، އީރާނުގެ ހަތިޔާރު އެޅި ބާރުތަކުން "ވަގުތުން، ވަރުގަދަ އަދި ނަތީޖާ ނެރެދޭ ފަދަ" ރައްދެއް ދޭނެ ކަމަށް ވެސް އޭނާ ފާހަގަކުރެއްވިއެވެ.

އީރާނުގެ ގާނޫނު ހަދާ މަޖިލީހުގެ ރައީސް މުހައްމަދު ބާގިރު ގާލީބާފް ވެސް ވަނީ ހަނގުރާމައިގެ ތެރޭގައި އެމެރިކާއާ އެކު އެއްވެސް މަޝްވަރާއެއް ބާއްވާފައިވާ ކަމަށް ބުނާ ވާހަކަ ދޮގުކުރައްވާފައެވެ.

އެކްސްގައި ކުރެއްވި ޕޯސްޓެއްގައި ގާލީބާފް ވިދާޅުވީ، އެމެރިކާއާ އެކު އެއްވެސް މަޝްވަރާއެއް ބާއްވާފައި ނުވާނެ ކަމަށެވެ. އަދި މިފަދަ ދޮގު ޚަބަރުތައް ފަތުރަނީ މާލީ އަދި ތެލުގެ ބާޒާރަށް ނުފޫޒު ފޯރުވުމަށާއި، އެމެރިކާ އާއި އިޒްރޭލު ތާށިވެފައިވާ އަޑިނޭނގޭ ވަޅުގަނޑުން ސަލާމަތްވާނެ މަގެއް ހޯދުމަށް ކަމަށް އޭނާ ވިދާޅުވިއެވެ.

މީގެ އިތުރުން ގާލީބާފް ވިދާޅުވީ، އީރާނުގެ ރައްޔިތުން ބޭނުންވަނީ އިސްވެ ހަމަލާދިން ފަރާތްތަކަށް، ދުވަހަކުވެސް ހަނދާން ނުނެތޭނެ ފަދަ ހަރުކަށި އަދަބެއް ދިނުމަށް ކަމަށެވެ. އަދި އެ އަމާޒަށް ވާސިލްވަންދެން ހުރިހާ އޮފިޝަލުން ވެސް ލީޑަރާއި ރައްޔިތުންނާ އެކު ސާބިތުކަމާއެކު ތިއްބަވާނެ ކަމަށް އޭނާ ވިދާޅުވިއެވެ.

އީރާނުން ބުނެފައިވާ ގޮތުގައި، އެމެރިކާ އާއި އިޒްރޭލާ ދެކޮޅަށް ދެމުންދާ ރައްދު ހަމަލާތައް ހުއްޓާލާނީ، ދެން ދުވަހަކުވެސް ހަނގުރާމައެއް ނުކުރާނެ ކަމުގެ ޔަގީންކަން ދިނުމުންނާއި، ސަރަހައްދުގައި ހުރި އެމެރިކާގެ އަސްކަރީ މަރުކަޒުތައް ބަންދުކުރުމުންނެވެ. އަދި އީރާނުގެ އަސްކަރީ އަދި މަދަނީ ވަސީލަތްތަކަށް ލިބުނު ގެއްލުމުގެ ބަދަލު ދިނުމަކީ ވެސް ހަމަލާތައް ހުއްޓާލުމުގެ ޝަރުތެކެވެ.

އެމެރިކާ އާއި އިޒްރޭލުން އީރާނާ ދެކޮޅަށް އަސްކަރީ ހަމަލާތައް ފަށާފައިވަނީ ފެބްރުއަރީ މަހުގެ 28 ވަނަ ދުވަހުއެވެ. އެ ހަމަލާތަކުގައި އީރާނުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ އަވަހާރަކޮށްލާފައިވާއިރު، އަސްކަރިއްޔާގެ އިސް ކޮމާންޑަރުންނާއި އާންމު ރައްޔިތުން ވެސް ވަނީ މަރާލާފައެވެ.

މިކަމުގެ ރައްދުގައި އީރާނުގެ ހަތިޔާރު އެޅި ބާރުތަކުން ދަނީ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށާއި، އިޒްރޭލުން ހިފާފައިވާ ބިންތަކަށް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދެމުންނެވެ.