ގަލްފް ސަރަހައްދުގެ ސަލާމަތީ ކަންކަމާ ބެހުމަށް މަސައްކަތް ނުކުރުމަށް، އެ ސަރަހައްދުން ބޭރުގެ ގައުމުތަކަށް އިރާނުގެ އެންމެ މަތީ އޮޕަރޭޝަނަލް ކޮމާންޑް ޔުނިޓުން އިންޒާރު ދީފި

ޕާޝިއަން ގަލްފް ސަރަހައްދުގެ ސަލާމަތީ ކަންކަމާ ބެހުމަށް މަސައްކަތް ނުކުރުމަށް، އެ ސަރަހައްދުން ބޭރުގެ ގައުމުތަކަށް އިރާނުގެ އެންމެ މަތީ އޮޕަރޭޝަނަލް ކޮމާންޑް ޔުނިޓުން އިންޒާރު ދީފިއެވެ. އިރާނުން ބުނެފައިވަނީ އެކުވެރި ސަރަހައްދީ ގައުމުތަކާ ގުޅިގެން އެ ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމުގެ ފުރިހަމަ ގާބިލުކަން އިސްލާމީ ޖުމްހޫރިއްޔާއަށް ލިބިގެންވާ ކަމަށެވެ.

މި އިންޒާރު ހޯމަ ދުވަހު ނެރުނީ، އިރާނުގެ އަސްކަރިއްޔާއާއި އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ އޮޕަރޭޝަންތައް ވިލަރެސްކުރާ ޚާތަމް އަލް-އަންބިޔާ ސެންޓްރަލް ހެޑްކުއާޓާޒް އިންނެވެ.

އެ އިދާރާގެ ތަރުޖަމާނު ލެފްޓިނަންޓް ކާނަލް އިބްރާހީމް ޒުލްފަގާރީ ވިދާޅުވީ، އިރާނުގެ އިސްލާމީ ޖުމްހޫރިއްޔާއިން ދަނީ ފުރިހަމަ ބާރާއެކު ޕާޝިއަން ގަލްފް ސަރަހައްދާއި އޮމާންގެ ކަނޑުގެ ސަރަހައްދުގައި ނުފޫޒު ފަތުރަމުން ކަމަށާއި، ހޮރްމޫޒް ކަނޑުއޮޅީގެ މައްޗަށް ބާރުގަދަ އަދި ބުއްދިވެރި ކޮންޓްރޯލެއް އެ ގައުމުން ގެންގުޅޭ ކަމަށެވެ.

އޭނާ އިތުރަށް ވިދާޅުވީ، މިފަދަ ބާރާއި ގާބިލުކަން ހުރިއިރު، ޕާޝިއަން ގަލްފުގައި މައިން ވަޅުލުމުގެ އެއްވެސް ބޭނުމެއް ނެތް ކަމަށާއި، ނަމަވެސް ސަލާމަތީ ކަންކަން ކަށަވަރުކުރުމަށްޓަކައި ބޭނުންވެއްޖެ ކޮންމެ ވަސީލަތެއްގެ ބޭނުންވެސް ހިފާނެ ކަމަށެވެ.

ޒުލްފަގާރީ ވިދާޅުވި ގޮތުގައި، އެމެރިކާއާއި ޒަޔަނިސްޓް ދުޝްމަނުންގެ މައްޗަށް އޮތް ބާރާއި، ސަރަހައްދީ ގައުމުތަކާ އޮތް ގުޅުމުގެ އެހީގައި ޕާޝިއަން ގަލްފުގެ ސަލާމަތްތެރިކަން ކަށަވަރުކުރުމުގެ ގާބިލުކަން އިރާނުގެ ހަތިޔާރުއެޅި ބާރުތަކަށް ލިބިގެންވެއެވެ. އަދި މި ދާއިރާގެ ތެރެއަށް ވަނުމުގެ އެއްވެސް ހައްގެއް ސަރަހައްދުން ބޭރުގެ ގައުމުތަކަށް ނޯންނާނެ ކަމަށްވެސް އޭނާ ވިދާޅުވިއެވެ.

އިރާނުން މިފަދަ މޭރުމަކުން ވާހަކަދައްކާފައި މިވަނީ، އެމެރިކާއާއި އިޒްރޭލުން އެ ގައުމާ ދެކޮޅަށް ދެމުންދާ ހަމަލާތަކަށް ރައްދު ދިނުމުގެ ގޮތުން، އިސްލާމީ ޖުމްހޫރިއްޔާއިން ހޮރްމޫޒް ކަނޑުއޮޅި ބަންދުކުރުމާ ގުޅިގެންނެވެ. މި ކަނޑުއޮޅި ބަންދުކޮށްފައިވަނީ ދުޝްމަނުންނާއި އެމީހުންގެ ބައިވެރިން ފިޔަވައި އެހެން ފަރާތްތަކަށެވެ.

މީގެ އިތުރުން، ހޮރްމޫޒް ކަނޑުއޮޅި ހުޅުވުމަށް އިރާނަށް މަޖުބޫރުކުރުވުމުގެ ގޮތުން، އެ ގައުމުގެ ދެކުނުގައި އޮންނަ ޚާރްގް ޖަޒީރާ އަށް ސިފައިން ފޮނުވުމަށް އެމެރިކާއިން ރާވަމުންދާ ކަމަށް ފެތުރިފައިވާ ރިޕޯޓްތަކާ ގުޅިގެންވެސް އިރާނުން ވަނީ އިންޒާރު ދީފައެވެ.

ތެހެރާނުން ވަނީ އެ ބިރުދެއްކުންތަކަށް ފަރުވާލެއް ނެތްކަން ހާމަކޮށްފައެވެ. އިރާނުން ބުނީ އެފަދަ ކޮންމެ ހާލަތަކަށްވެސް ތައްޔާރަށް އޮތް ކަމަށާއި، އެފަދަ ހަމަލާތައް ނާކާމިޔާބުކޮށްލުމުގެ ފުރިހަމަ ގާބިލުކަން އެ ގައުމަށް ލިބިގެންވާ ކަމަށެވެ.

ހޮރްމޫޒް ކަނޑުއޮޅިއާ މެދު އިރާނުން ނިންމި ނިންމުންތަކާއި، އެމެރިކާއާއި އިޒްރޭލުގެ މުހިންމު އަމާޒުތަކަށް ދިން ވަރުގަދަ ރައްދު ހަމަލާތަކުގެ ސަބަބުން، އެމެރިކާގައި ތެލުގެ އަގު ވަނީ އިންތިހާއަށް އުފުލިފައެވެ. މިއީ އެމެރިކާގެ ރައީސުންގެ ސިޔާސީ ކުރިމަގާ ސީދާ ގުޅިފައިވާ ކަމަކަށްވާތީ، މިކަމާ މެދު އެމެރިކާގައި ބޮޑެތި ކަންބޮޑުވުންތަކެއް ހުރިކަން ރިޕޯޓްތަކުން ހާމަވެއެވެ.

މީގެ ކުރިން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އިރާނުގެ ހަކަތަ އުފައްދާ މަރުކަޒުތަކަށް ދިނުމަށް ރާވާފައިވާ ހަމަލާތައް ފަސް ދުވަހަށް މެދުކަނޑާލުމަށް އަމުރުކުރައްވާފައިވާ ކަމަށާއި، ވޮޝިންޓަނާއި ތެހެރާނާ ދެމެދު އަލުން މަޝްވަރާތައް ފެށިފައިވާ ކަމަށެވެ.

ނަމަވެސް، އިސްލާމީ ޖުމްހޫރިއްޔާއިން ވަނީ އެފަދަ އެއްވެސް މަޝްވަރާއެއްގައި ބައިވެރިވާކަން ދޮގުކޮށްފައެވެ. އަދި އައި.އާރް.ޖީ.ސީ އިން ބުނެފައިވަނީ ޓްރަމްޕްގެ އެ ވާހަކަތަކަކީ އިރާނުގެ "ހިތްވަރުގަދަ ކަމާއި ދެކޮޅުވެރިކަމުގެ މައްޗަށް އޮތް ސާބިތުކަމުގެ" ކުރިމަތީގައި އޭނާ ފަހަތަށް ޖެހިވަޑައިގަތުން ކަމަށެވެ.