އިރާނުގެ އަސްކަރިއްޔާއިން ބެލިސްޓިކް މިސައިލާއި ސުއިސައިޑް ޑްރޯން ބޭނުންކޮށްގެން، އެމެރިކާ އާއި އިޒްރޭލުގެ އަމާޒުތަކަށް ރައްދުގައި ދޭ ހަމަލާތަކުގެ އާ ބުރެއް ކުރިއަށް ގެންގޮސްފި

އިރާނުގެ އަސްކަރިއްޔާއިން އާދީއްތަ ދުވަހު ބެލިސްޓިކް މިސައިލާއި ސުއިސައިޑް ޑްރޯން ބޭނުންކޮށްގެން، އެމެރިކާ އާއި އިޒްރޭލުގެ އަމާޒުތަކަށް ރައްދުގައި ދޭ ހަމަލާތަކުގެ އާ ބުރެއް ކުރިއަށް ގެންގޮސްފި އެވެ.

އިރާނުގެ އަސްކަރިއްޔާއިން މާރިޗު މަހުގެ 22 ވަނަ ދުވަހު އިއުލާނުކުރި ގޮތުގައި، "އޮޕަރޭޝަން ޓްރޫ ޕްރޮމިސް 4" ގެ ދަށުން ދިން 74 ވަނަ ބުރުގެ މި ހަމަލާތައް އަމާޒުކޮށްފައިވަނީ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށާއި، އިޒްރޭލުން ހިފާފައިވާ ފަލަސްތީނުގެ މެދުތެރެއާއި ދެކުނުގެ ސަރަހައްދުތަކުގައި ހުރި އަމާޒުތަކަށެވެ. މި ހަމަލާތަކަކީ ކުރިން ރޭވިފައިވާ ސިނާރިއޯތަކެއްގެ ދަށުން، އާ އުކުޅުތަކާއި ތަރައްގީކޮށްފައިވާ ނިޒާމުތައް ބޭނުންކޮށްގެން ދީފައިވާ ހަމަލާތަކެއް ކަމަށް އެ ގައުމުން ބުނެއެވެ.

އިރާނުން ނެރުނު ބަޔާނެއްގައި ބުނެފައިވަނީ، އެމެރިކާގެ ޕްރިންސް ސުލްތާން އެއާ ބޭސްއަށާއި، އެމެރިކާގެ ފިފްތު ފްލީޓް (ފަސްވަނަ ކަނޑުގެ ފައުޖު) އަދި ކޯމަލާ ޓެރަރިސްޓް ގްރޫޕްގެ މަރުކަޒުތަކަށް އިރާނުގެ "އިމާދު"، "ފާތިހު" އަދި "ގިޔާމް" މަރުކާގެ މިސައިލްތަކާއި ހަނގުރާމަވެރި ޑްރޯންތަކުން ހަމަލާދީފައިވާ ކަމަށެވެ.

މީގެ އިތުރުން، އާދިއްތަ ދުވަހުގެ ހެނދުނު އިޒްރޭލުގެ އަސްކަރީ މަރުކަޒުތަކާއި ސަލާމަތީ މަރުކަޒުތަކަށް "ގަދަރު"، "ޚައިބަރު-ޝެކަން" އަދި "ޚޯރަމްޝަހަރު 4" މަރުކާގެ ބަރު މިސައިލްތަކުން ސީދާ ހަމަލާދީ، އެ ތަންތަން ވަރަށް ބޮޑަށް ހަލާކުކޮށްލާފައިވާ ކަމަށްވެސް އެ ބަޔާނުގައިވެއެވެ.

އިރާނުގެ އަސްކަރިއްޔާއިން ދިން ހުޝިޔާރު އަދި ހުނަރުވެރި ހަމަލާތަކުގެ ސަބަބުން، އެމެރިކާގެ ސެންޓްރަލް ކޮމާންޑަށް  އޮޅުންބޮޅުންތަކެއް އަރައި، ހުޅަނގު އޭޝިއާ ސަރަހައްދުގައި އެމެރިކާއާއި ޒަޔަނިސްޓުން ގާއިމުކޮށްފައިވާ ގިނަ ފަންތީގެ ވައިގެ ދިފާއީ ނިޒާމުތައް ހަލާކުވެ، އެމެރިކާގެ ހަތިޔާރުގެ އެހީތެރިކަން ފޯރުކޮށްދޭ ނިޒާމަށް ބުރޫއަރާފައިވާ ކަމަށް އެ ގައުމުން ބުނެއެވެ. މީގެ ސަބަބުން ހަނގުރާމައިގެ މިސްރާބު އިރާނަށް ފަހިވާ ގޮތަށް ބަދަލުވެފައިވާ ކަމަށްވެސް ބަޔާނުގައިވެއެވެ.

އެމެރިކާއާއި ޒަޔަނިސްޓު ހަނގުރާމަވެރިންގެ މެދުގައި އުފެދިފައިވާ ރުޅި އާއި މާޔޫސްކަމަކީ ކުރިންވެސް ލަފާކުރެވުނު ކަމެއް ކަމަށާއި، ހަނގުރާމައިގެ ތެރެއަށް އެމެރިކާއާއި ޒަޔަނިސްޓު ރެޖީމް ގެނބިގެންދާނެ ކަމުގެ އިންޒާރާއި، ސަރަހައްދީ ފެންވަރުގައި ބޮޑު ހަނގުރާމައެއް ފެށިދާނެ ކަމުގެ އިންޒާރު މީގެ ކުރިންވެސް ދީފައިވާނެ ކަމަށް އެ ބަޔާނުގައި ފާހަގަކޮށްފައިވެއެވެ.

އިރާނުގެ އަސްކަރިއްޔާއިން އަލުން އިންޒާރު ދެމުން ބުނެފައިވަނީ، ދުޝްމަނުން އިރާނުގެ އިންސާނީ ވަސީލަތްތަކާއި ހަކަތައިގެ މަރުކަޒުތަކަށް ދޭ ހަމަލާތައް ތަކުރާރުކޮށްފިނަމަ، އިސްލާމީ ޖުމްހޫރިއްޔާގެ ރައްދު ހުންނާނީ އުންމީދު ނުކުރާ ފަދަ މިންވަރަކަށް، އަދި މިހާރުގެ އުސޫލުތަކާ މުޅިން ތަފާތު ގޮތަކަށް ކަމަށެވެ.