އީރާނުން އެފް-15 ހަނގުރާމަމަތީ ބޯޓަކަށް މިސައިލް ހަމަލާދީފި
އީރާނުގެ ދެކުނުގެ ވައިގެ ސަރަހައްދަށް ހުއްދަނެތި ވަން ދުޝްމަނުންގެ އެފް-15 މަރުކާގެ ބޯޓަކަށް އެ ގައުމުގެ ދިފާއީ ބާރުތަކުން މިސައިލް ހަމަލާއެއް ދީފި. މި ހަމަލާއަކީ އެމެރިކާ އާއި އިޒްރޭލުން އީރާނާ ދެކޮޅަށް ފަށާފައިވާ އަސްކަރީ ކެމްޕޭނާ ގުޅިގެން، އެ ގައުމުގެ ސަލާމަތާއި ރައްކާތެރިކަން ކަށަވަރުކުރުމަށް ދިން ރައްދު ހަމަލާއެއް. އީރާނުން ދަނީ އެ ގައުމަށް ދެމުންދާ ހަމަލާތަކުގެ ބަދަލުހިފުމުގެ ގޮތުން ސަރަހައްދީ ގައުމުތަކުގައި ހުރި އެމެރިކާގެ މަރުކަޒުތަކަށް އަމާޒުކޮށް މިސައިލާއި ޑްރޯން ހަމަލާތައް ދެމުން.
އިޒްރޭލުގެ ދެކުނުގައިވާ ބީރް ޝެވާ ކައިރީގައި އޮންނަ ހަޓްޒެރިމް އެއަރ ފޯސް ބޭސްގައި، 2010 ވަނަ އަހަރުގެ ޑިސެމްބަރު މަހުގެ 30 ވަނަ ދުވަހު ބޭއްވި އިޒްރޭލު ސިފައިންގެ ޕައިލެޓުންގެ ދަސްވެނިވުމުގެ ރަސްމިއްޔާތުގެ އެއަރ ޝޯއެއްގެ ތެރެއިން، އެ ގައުމުގެ އެފް-15 މަރުކާގެ ޖެޓަކުން މިސައިލުން ދިފާއުވުމަށް ބޭނުންކުރާ ފްލެއާސްތަކެއް ފޮނުވާލަނީ. | ގެޓީ އިމޭޖަސް
އީރާނުގެ ދެކުނުގެ ސަރަހައްދުން އެ ގައުމުގެ ވައިގެ ދިފާއީ ބާރުތަކުން ދުޝްމަނުންގެ އެފް-15 މަރުކާގެ ހަނގުރާމަމަތީ ބޯޓަކަށް ހުރަސް އަޅައި، އެ ބޯޓަށް އަމާޒުކޮށް މިސައިލް ހަމަލާއެއް ދީފިއެވެ.
އީރާނުގެ އެއަރ ޑިފެންސް ޖޮއިންޓް ހެޑްކުއާޓާރޒުން އާދީއްތަ ދުވަހު ހާމަކޮށްފައިވާ ގޮތުގައި، އެ ގައުމުގެ ދެކުނުގެ ސަރަހައްދަށް ވަތް ދުޝްމަނުންގެ ހަނގުރާމަމަތީ ބޯޓަށް ވަނީ ހަމަލާދީފައެވެ.
އެ އިދާރާއިން ބުނި ގޮތުގައި، އީރާނުގެ ދެކުނު އައްސޭރިފަށުގެ ހޮރްމޫޒް ރަށުގެ ވައިގެ ސަރަހައްދަށް ހުއްދަނެތި ވަތް ދުޝްމަނުންގެ އެފް-15 މަރުކާގެ ބޯޓެއް ވަނީ ފާހަގަކުރެވިފައެވެ. އަދި އެއާއެކު އީރާނުގެ އަސްކަރިއްޔާގެ އެއަރ ޑިފެންސްގެ ބިމުން ވައިގެ ތެރެއަށް ފޮނުވާލާ މިސައިލް ސިސްޓަމްތަކުން އެ ބޯޓަށް އަމާޒުކޮށް މިސައިލް ހަމަލާއެއް ފޮނުވާލާފައިވާ ކަމަށް ވެސް އެ އިދާރާއިން ބުނެފައިވެއެވެ.
ފެބްރުއަރީ މަހުގެ 28 ވަނަ ދުވަހު، އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީގެ އިތުރުން އަސްކަރިއްޔާގެ އިސް ކޮމާންޑަރުންތަކަކާއި އާންމު ރައްޔިތުންތަކެއް ޝަހީދު ކޮށްލުމަށް ފަހު، އެމެރިކާ އާއި އިޒްރޭލުން ވަނީ އެއްވެސް އުދުވާނަކާ ނުލައި އީރާނާ ދެކޮޅަށް ފުޅާދާއިރާއެއްގައި އަސްކަރީ ކެމްޕޭނެއް ފަށާފައެވެ.
އެމެރިކާ އާއި އިޒްރޭލުން ދެމުންދާ މި ހަމަލާތަކުގައި އީރާނުގެ އެކި ސަރަހައްދުތަކުގައި ހުރި އަސްކަރީ މަރުކަޒުތަކަށާއި އާންމުން ދިރިއުޅޭ ތަންތަނަށް ވައިގެ މަގުން ގިނަ ހަމަލާތަކެއް ދީފައިވާއިރު، މި ހަމަލާތަކުގެ ސަބަބުން ގިނަ ބަޔަކު މަރުވެ، ގައުމުގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.
މި ހަމަލާތަކުގެ ރައްދުގައި އީރާނުގެ ސަފުތަކުން ވަނީ ބަދަލުހިފުމުގެ އޮޕަރޭޝަންތަކެއް ފަށާފައެވެ. އެގޮތުން އިޒްރޭލުން ހިފާފައިވާ ފަލަސްތީނުގެ ބިންތަކުގައި ހުރި މަރުކަޒުތަކަށާއި ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް އީރާނުން ދަނީ ގިނަ އަދަދެއްގެ މިސައިލާއި ޑްރޯން ހަމަލާތައް ދެމުންނެވެ.
