އީރާން އިން އިނގިރޭސިވިލާތަށް ހަމަލާއެއް ދީފާނެ ކަމުގެ އެއްވެސް ހެއްކެއް ނެތް: ބޮޑު ވަޒީރު ސްޓާމާ
23 މާރިޗު 2026 | ހޯމަ 12:57ހޯމަ ދުވަހު ނޫސްވެރިންނާ ވާހަކަ ދައްކަވަމުން ބޮޑު ވަޒީރު ސްޓާމާ ވިދާޅުވީ، ޤައުމުގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އަބަދު ވެސް ކަންކަން ދިރާސާކޮށް، އަދި އެސެސްމެންޓުތައް ހަދަމުންދާ ކަމަށް. ނަމަވެސް، އިނގިރޭސިވިލާތަށް އަމާޒުކޮށް އީރާން އިން ހަމަލާއެއް ދޭން އުޅޭ ކަމުގެ އެއްވެސް އިޝާރާތެއް އަދި އެފަދަ އެސެސްމެންޓެއް މިހާތަނަށް ފެނިފައި ނުވާ ކަމަށް ބޮޑު ވަޒީރު ވަނީ ތަކުރާރުކޮށް ވިދާޅުވެފައި.
އިނގިރޭސިވިލާތުގެ ބޮޑު ވަޒީރު ކިއާ ސްޓާމާ | ގެޓީ އިމޭޖަސް
އިނގިރޭސިވިލާތަށް، ނުވަތަ އެ ޤައުމުގެ މައި އެއްވެސް ސަރަހައްދަކަށް އަމާޒުކޮށް އީރާން އިން ހަމަލާއެއް ދޭން އުޅޭ ކަމުގެ އެއްވެސް ހެއްކެއް ނުވަތަ އެފަދަ އެއްވެސް އެސެސްމަންޓެއް މިހާތަނަށް ލިބިފައި ނުވާ ކަމަށް، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވިދާޅުވެއްޖެ އެވެ.
ބޮޑު ވަޒީރު ސްޓާމާާ މިހެން ވިދާޅުވީ، އިންޑިއާ ކަނޑުގައި އޮންނަ އިނގިރޭސިވިލާތާއި، އެމެރިކާގެ އަސްކަރީ މަރުކަޒެއް ކަމަށްވާ ޑިއޭގޯ ގާސިއާ އަށް އީރާނުން ބެލިސްޓިކް ދެ މިސައިލް ފޮނުވާލި ކަމަށް ދެކެވޭ ވާހަކަތަކާ ގުޅިގެން ނޫސްވެރިން ކުރި ސުވާލު ތަކަށް ޖަވާބު ދެއްވަމުންނެވެ.
ހޯމަ ދުވަހު ނޫސްވެރިންނާ ވާހަކަ ދައްކަވަމުން ބޮޑު ވަޒީރު ސްޓާމާ ވިދާޅުވީ، ޤައުމުގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އަބަދު ވެސް ކަންކަން ދިރާސާކޮށް، އަދި އެސެސްމެންޓުތައް ހަދަމުންދާ ކަމަށެވެ. ނަމަވެސް، އިނގިރޭސިވިލާތަށް އަމާޒުކޮށް އީރާން އިން ހަމަލާއެއް ދޭން އުޅޭ ކަމުގެ އެއްވެސް އިޝާރާތެއް އަދި އެފަދަ އެސެސްމެންޓެއް މިހާތަނަށް ފެނިފައި ނުވާ ކަމަށް ބޮޑު ވަޒީރު ވަނީ ތަކުރާރުކޮށް ވިދާޅުވެފަ އެވެ.
މީގެ އިތުރުން ހޮރްމޫޒް ކަނޑު އޮޅި އަލުން ހުޅުވާލުމަށް ކުރެވޭ ކޮންމެ މަސައްކަތަކީ ވަރަށް ބޮޑަށް ވިސްނައި އަދި ހަރުދަނާ ރޭވުމެއްގެ ދަށުން ކުރަން ޖެހޭ ކަމެއް ކަމަށް ވެސް ބޮޑު ވަޒީރު ސްޓާމާ ފާހަގަ ކުރެއްވި އެވެ. އެގޮތުން ބޮޑު ވަޒީރު ސްޓާމާ ވިދާޅުވީ މިވަގުތު އެންމެ އިސްކަމެއް ދެއްވަނީ އިނގިރޭސިވިލާތުގެ މަސްލަޙަތު ހިމާޔަތް ކުރުމަށާއި، ސަރަހައްދީ މަސްރަހު ފިނި ކުރުމަށް ކަަމަށެވެ.
މިދިޔަ ހަފުތާ ބަންދުގައި ބައިނަލްއަޤުވާމީ މީޑިއާ ތަކުން ރިޕޯޓު ކޮށްފައިވާ ގޮތުގައި، އީރާނުން ވަނީ ޑިއޭގޯ ގާސިއާގައި ހުންނަ އަސްކަރީ މަރުކަޒަށް އަމާޒުކޮށް ދެ މިސައިލް ފޮނުވާލައިފަ އެވެ. މި ހާދިސާއާ ގުޅިގެން އިނގިރޭސިވިލާތުގެ ސަލާމަތީ ކަންކަމާ މެދު ސުވާލު އުފެދިފައި ވީ ނަަމަވެސް، އެ ޤައުމުގެ ސަރުކާރުން ބުނަމުން ދަނީ ޙާލަތު ވަރަށް ގާތުން ބަލަމުން އަންނަ ކަމަށެވެ.
ބޮޑު ވަޒީރު ސްޓާމާގެ ވާހަކަފުޅުގައި ބާރު އެޅުއްވީ، މެދު އިރުމަތީގެ މަސްރަހު ނުތަނަވަސްވެފައިވާ މި ދަނޑި ވަޅުގައި، އިނގިރޭސިވިލާތުގެ ރައްކާތެރިކަން ކަށަވަރު ކުރުމަށް ކުރަން ޖެހޭ ހުރިހާ މަސައްކަތް ތަކެއް ކުރަމުންދާ ކަމަށެވެ. އަދި ބައިނަލްއަޤުވާމީ މުޖުތަމައުއާ ގުޅިގެން ހަމަ ނުޖެހުންތައް ކުޑަ ކުރުމަށް މަސައްކަތް ކުރައްވާ ކަމުގެ ޔަޤީންކަން ވެސް އެމަނިކުފާނު ވަނީ ދެއްވައިފަ އެވެ.
މަސްދަރު: ރޮއިޓާސް
