އީރާންގެ ވަރުގަދަ އިންޒާރެއް އެމެރިކާ އަށް

އީރާންގެ ކަރަންޓު އުފައްދާ ނިޒާމު އެއްކޮށް ސުންނާފަތި ކޮށްލާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވާފައިވާއިރު، އެކަމާ ގުޅިގެން އީރާން އިން ވެސް ވަރުގަދަ އިންޒާރެއް ދީފި އެވެ.

އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ހޯމަ ދުވަހު ވަނީ، އިޒްރޭލް އާއި އެމެރިކާގެ އަސްކަރީ މަރުކަޒު ތަަކަށް ކަަރަންޓު ފޯރުކޮށްދޭ ތަންތަނަށް ހަމަލާ ދޭނެ ކަމުގެ ވަރުގަދަ އިންޒާރެއް ދީފަ އެވެ. 

އީރާންގެ ދައުލަތުގެ މީޑިއާ މެދުވެރިކޮށް އާންމު ކުރި ބަޔާނެއްގައި ބުނެފައި ވަނީ، އެމެރިކާގެ ރައީސް އަކީ އިތުރުފުޅު ހައްދަވާ ބޭފުޅެއް ކަމަށާއި، އީރާން އިން ސަރަަހައްދީ ޤައުމު ތަކުގެ ފެން ސާފު ކުރާ ނިޒާމު ތަކަށް ހަމަލާ ދޭން އުޅޭ ކަމަށް ވިދާޅުވެ ޓްރަމްޕް ދައްކަވަނީ ދޮގު ވާހަކަ ތަަކެއް ކަމަށެވެ. އަދި އީރާން އިން ރައްދު ދޭނީ ކުރިމަތިވާ ނުރައްކަލާ އެއްވަރުގެ ހަމަލާ ތަކުން ކަމަށާއި، ކަރަންޓުގެ ނިޒާމަށް ހަމަލާ ދީފި ނަމަ ރައްދުގައި ހަމަލާ ދޭނީ ވެސް ކަަރަންޓުގެ ނިޒާމަށް ކަމަށް ބަޔާނުގައި ވަނީ ބުނެފަ އެވެ. 

 މި ނުތަނަވަސްކަން ބޮޑުވެފައި ވަނީ، 48 ގަޑިއިރުގެ ތެރޭގައި ހޮރްމޫޒް ކަނޑު އޮޅިން އެއްކޮށް ހުޅުވައި ނުލައިފި ނަމަ، އީރާންގެ ކަރަންޓު އުފައްދާ މަރުކަޒުތައް ހަލާކު ކޮށްލާނެ ކަމަށް ވިދާޅުވެ ޓްރަމްޕް އިންޒާރު ދެއްވުމުންނެވެ. އެ އިންޒާރުގެ ވަގުތު ހަމަވާނީ ހޯމަ ދުވަހުގެ ރެޔަށެވެ. 

އީރާން އިން ރައްދުގައި އެމެރިކާ އަށް އިންޒާރު ދީފައިވާއިރު، އީރާން އިން އަންނަނީ ރައްދުގައި ދެމުން އަންނަ ހަމަލާތައް ވެސް ވަރުގަދަ ކުރަމުންނެވެ. އެމެރިކާ އާއި އިޒްރޭލް އިން ދެމުން އަންނަ ހަމަލާ ތަކުގެ ސަބަބުން، އީރާންގެ މިސައިލް ޤާބިލުކަން ވަރަށް ބޮޑަށް ދަށްވެފައިވާ ކަމަށް ބުނެފައި ވީ ނަމަވެސް، އީރާން އިން ދަނީ އަދި ވެސް ވަރުގަދަ ރައްދު ހަމަލާ ތަކެއް ދެމުންނެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ސަބަބުން، އީރާން އިން ވަނީ ހޮރްމޫޒް ކަނޑު އޮޅިން ދަތުރު ކުރުން މަނާ ކޮށްފަ އެވެ. ނަމަވެސް، އީރާން އިން ބުނެފައި ވަނީ އެ ކަނޑު އޮޅި ބަންދު ކޮށްފައި ވަނީ އެމެރިކާ އާއި އިޒްރޭލްގެ އިތުރުން، އެ ޤައުމު ތަކުގެ ބައިވެރިންނަށް ކަމަށެވެ. އަދި އެހެން ޤައުމު ތަކަށް ހޮރްމޫޒް ކަނޑު އޮޅިން ދަތުރު ކުރެވޭނެ ކަމަށް އީރާން އިން ބުނެފައިވެ އެވެ.