ހަނގުރާމައިގެ ސަބަބުން ހަކަތައިގެ 40 ވަސީލަތަކަށް ގެއްލުން ލިބިފައިވާ ކަމަށް ހާމަ ކޮށްފި
ބިރޯލް ފާހަގަ ކުރެއްވި ގޮތުގައި މެދު އިރުމަތީގެ މިހާރުގެ މައްސަލައިގެ ސަބަބުން ކުރިމަތި ވަމުންދާ އަސަރުތައް، 1970ގެ އަހަރު ތަކުގައި ކުރިމަތިވި ތެލުގެ ބޮޑު މައްސަލަ އާއި، ރަޝިޔާ-ޔޫކްރެއިން ހަނގުރާމައިގެ ސަބަބުން ގޭސް މާކެޓަށް ކުރިމަތިވި ލޮޅުމަށް ވުރެ ވެސް މާ ބޮޑު.
އިންޓަނޭޝަނަލް އެނާޖީ އެޖެންސީ (އައިއީއޭ) ގެ އެގްޒެކެޓިވް ޑައިރެކްޓަރު ފާތިހް ބިރޯލް | ރޮއިޓާސް
އެމެރިކާ އާާއި އިޒްރޭލް އިން އީރާާންއާ ދެކޮޅަށް މިހާރު ކުރިއަށް ގެންދާ ހަނގުރާމައިގެ ސަބަބުން މެދު އިރުމަތީގެ މަސްރަހު ހޫނުވެފައިވާއިރު، އެ ސަރަހައްދުގެ ނުވަ ޤައުމެއްގައި ހުރި ހަކަތައާ ގުޅޭ ތަންތަނުގެ ތެރެއިން މަދު ވެގެން 40 ވަސީލަތަކަށް ބޮޑެތި ގެއްލުން ތަކެއް ލިބިފައިވާ ކަމަށް، އިންޓަނޭޝަނަލް އެނާޖީ އެޖެންސީ (އައިއީއޭ)ގެ އިސްވެރިޔާ ފާތިޙް ބިރޯލް ވިދާޅުވެއްޖެ އެވެ.
އޮސްޓްރޭލިއާގެ ވެރި ރަށުގައި ހުންނަ ޕްރެސް ކުލަބުގައި ވާހަކަ ދައްކަވަމުން ހޯމަ ދުވަހު ބިރޯލް ވިދާޅުވީ، މެދު އިރުމަތީގެ މަަސްރަހު މިހާރު އޮތް ގޮތުން، ދުނިޔޭގެ އިޤްތިޞާދަށް ވަރަށް ބޮޑު ނުރައްކަލެއް ކުރިމަތިވެފައިވާ ކަމަށެވެ. އަދި މި ހަމަ ނުޖެހުންތައް މިހާރުގެ މިސްރާބުގައި ކުރިއަށްދާ ނަމަ، އޭގެ ނޭދެވޭ އަސަރު ނުކުރާނެ އެއްވެސް ޤައުމެއް ދުނިޔޭގައި ނޯންނާނެ ކަމުގެ އިންޒާރު ވެސް އޭނާ ދެއްވި އެވެ.
ބިރޯލް ފާހަގަ ކުރެއްވި ގޮތުގައި މެދު އިރުމަތީގެ މިހާރުގެ މައްސަލައިގެ ސަބަބުން ކުރިމަތި ވަމުންދާ އަސަރުތައް، 1970ގެ އަހަރު ތަކުގައި ކުރިމަތިވި ތެލުގެ ބޮޑު މައްސަލަ އާއި، ރަޝިޔާ-ޔޫކްރެއިން ހަނގުރާމައިގެ ސަބަބުން ގޭސް މާކެޓަށް ކުރިމަތިވި ލޮޅުމަށް ވުރެ ވެސް މާ ބޮޑެވެ. އޭނާ މިހެން ވިދާޅުވެފައި މި ވަނީ، ހޯމަ ދުވަހުގެ ފަތިހުގެ ވަގުތެއްގައި އިޒްރޭލް އިން އީރާންގެ ވެރި ރަށް ތެހެރާން އަށް އަމާޒުކޮށް އައު ހަމަލާ ތަކެއް ވެސް ދީފައިވާ ދަނޑިވަޅެއްގަ އެވެ.
މާކެޓުގައި ތެލުގެ އަގު ކޮންޓްރޯލް ކުރުމަށްޓަކައި، ޤައުމު ތަކުން ރައްކާ ކޮށްފައި ހުރި ތެޔޮ ބާޒާރަށް ނެރުމާ ގުޅޭ ގޮތުން ޔޫރަޕާއި އޭޝިއާގެ ސަރުކާރު ތަކާ އެކު މަޝްވަރާ ކުރަމުން އަންނަ ކަމަށް ވެސް ބިރޯލް ވިދާޅުވި އެވެ. އޭނާ ވިދާޅުވީ، މާކެޓުގެ ޙާލަތަށް ބަލައި، މެމްބަރު ޤައުމު ތަކާ އެކު އެނަލައިޒް ކުރުމަށް ފަހު، ކޮންމެހެން ބޭނުން ވެއްޖެ ޙާލަތެއްގައި އިތުރު ތެޔޮ ބާޒާރަށް ނެރޭނެ ކަމަށެވެ.
އައިއީއޭގެ ވެރިޔާ މިހެން ވިދާޅުވެފައިވާއިރު، އީރާން އިން ހޮރްމޫޒް ކަނޑު އޮޅި ބަންދު ކޮށްފައި އޮތް އޮތުމާ ގުޅޭ ގޮތުން، އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ ވަރުގަދަ އިންޒާރެއް ދެއްވައިފަ އެވެ. އެގޮތުން 48 ގަޑިއިރުގެ ތެރޭގައި އީރާން އިން ހޮރްމޫޒް ކަނޑު އޮޅި މުޅިން އެއްކޮށް ހުޅުވައި ނުލައިފި ނަަމަ، އީރާންގެ އިންޖީނުތައް އެއްކޮށް ސުންނާފަތި ކޮށްލާނެ ކަމަށް ވެސް ޓްރަމްޕް ވަނީ ވިދާޅުވެފަ އެވެ.
މަސްދަރު: ރޮއިޓާސް
