"ނިހާއީ ކާމިޔާބީއާ ހަމައަށް": އީރާނުން ދުޝްމަނުންގެ އަމާޒުފަތްތަކަށް މިސައިލާއި ޑްރޯންގެ 77 ވަނަ ހަމަލާގެ ރާޅު ފޮނުވާލައިފި
އީރާނުގެ އިސްލާމިކް ރިވަލިއުޝަނަރީ ގާޑް ކޯޕްސް (އައިއާރްޖީސީ) އިން އިޒްރޭލުގެ އެކި ސަރަހައްދުތަކަށާއި މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ވަރުގަދަ މިސައިލް އަދި ޑްރޯން ހަމަލާތަކެއް ދީފި. މި ހަމަލާތަކަކީ އިޒްރޭލާއި އެމެރިކާއިން އީރާނަށް ދިން ހަމަލާތަކުގެ ބަދަލުހިފުމުގެ ގޮތުން ކުރިއަށްގެންދާ "އޮޕަރޭޝަން ޓްރޫ ޕްރޮމިސް 4" ގެ ބައެއް ކަމަށާއި، އެމެރިކާގެ ރައީސް ޑޮނަލްޑް ޓްރަމްޕްގެ އިންޒާރުތަކަށް ފަސްނުޖެހި "ނިހާއީ ކާމިޔާބީ" އާ ހަމައަށް މި މަސައްކަތް ކުރިއަށްދާނެ ކަމަށް އައިއާރްޖީސީން ބުނެފައިވޭ. އީރާނުން ބުނި ގޮތުގައި މި އޮޕަރޭޝަނަކީ ދުޝްމަނުންގެ ރޭވުންތަކާ ދެކޮޅަށް އެ ގައުމުން ދައްކަމުންދާ ސާބިތުކަމުގެ ހެއްކެއް.
2026 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހު، އެމެރިކާ އާއި އިޒްރޭލުގެ އަމާޒުތަކަށް ރައްދު ހަމަލާ ދިނުމަށް އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ފެށި "އޮޕަރޭޝަން ޓްރޫ ޕްރޮމިސް 4" ގެ ތެރެއިން ދިން ވަރުގަދަ ހަމަލާއެއްގެ މަންޒަރު ފެންނަ ވީޑިއޯއަކުން ނަގާފައިވާ އިމޭޖެއް. | ސްކްރީން އިމޭޖް
އިސްލާމިކް ރިވަލިއުޝަނަރީ ގާޑް ކޯޕްސް (އައިއާރްޖީސީ) އިން "އޮޕަރޭޝަން ޓްރޫ ޕްރޮމިސް 4" ގެ ދަށުން އިޒްރޭލާއި އެމެރިކާގެ އަމާޒުފަތްތަކަށް ދޭ ހަމަލާތަކުގެ 77 ވަނަ ރާޅު ހޯމަ ދުވަހުގެ ރޭ ފޮނުވާލައިފިއެވެ. މި ހަމަލާތަކުގައި އަމާޒަށް ވާސިލްވުމުގެ ގާބިލުކަން ލިބިފައިވާ "ޚައިބަރު ޝަކަން" މިސައިލް ސިސްޓަމްތަކާއި، ސޮލިޑް ފިއުލް ބޭނުންކުރާ "ޒުލްފިގާރު" މިސައިލްތަކުގެ އިތުރުން ގޮވާތަކެތި ހަރުކޮށްފައިވާ ޑްރޯންތައް ބޭނުންކޮށްފައިވެއެވެ.
އައިއާރްޖީސީން ނެރުނު ބަޔާނެއްގައި ބުނެފައިވަނީ، އެންމެ ފަހުން ދިން މި ހަމަލާތަކުގައި އިޒްރޭލުން ހިފާފައިވާ ފަލަސްތީނުގެ ބިންތަކުގެ އުތުރާއި، މެދުތެރެ އަދި ދެކުނުގެ ސަރަހައްދުތަކަށް އަމާޒުކޮށް "ސުޕަރ-ހެވީ، ޕްރެސިޝަން-ގައިޑަޑް ޚައިބަރު ޝަކަން" ސިސްޓަމްތަކާއި ހަމަލާދޭ ޑްރޯންތައް ބޭނުންކޮށްފައިވާ ކަމަށެވެ.
މީގެ އިތުރުން، މި ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ވެސް ހަމަލާދީފައިވާ ކަމަށް އެ ބަޔާނުގައިވެއެވެ. އޭގެ ތެރޭގައި ކުވެއިތުގައި ހުންނަ އަލީ އަލް ސާލިމް ބޭސްއާއި، ސައުދީ އަރަބިއްޔާގައި ހުންނަ އަލް-ޚަރްޖް ބޭސްގެ އިތުރުން އެކުވެރި އަރަބި އިމާރާތުގައި ހުންނަ އަލް-ދަފްރާ ބޭސް ހިމެނެއެވެ. މި މަރުކަޒުތަކަށް ހަމަލާދިނުމަށް ބޭނުންކޮށްފައިވަނީ އަމާޒަށް ވާސިލްވުމުގެ ގާބިލުކަން ހުރި ސޮލިޑް ފިއުލް "ޒުލްފިގާރު" ސިސްޓަމްތަކާއި "ކަމިކާޒޭ" ޑްރޯންތަކެވެ.
މި އޮޕަރޭޝަން ކުރިއަށް ގެންގޮސްފައިވަނީ "ފުރިހަމަ ކާމިޔާބީއާއެކު" ކަމަށް އެ އިދާރާއިން ސިފަކޮށްފައިވެއެވެ.
އެމެރިކާގެ މެސެޖުތަކަށް އިންކާރުކުރުން
އީރާނުގެ ހަކަތަ އުފައްދާ މަރުކަޒުތަކަށް ދޭން ރާވާފައިވާ ހަމަލާތައް ފަސް ދުވަހަށް މެދުކަނޑާލުމަށް އަމުރުކުރެއްވި ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަފުޅުތަކަށް ވެސް އައިއާރްޖީސީން ވަނީ ރައްދުދީފައެވެ. އައިއާރްޖީސީން ބުނީ ޓްރަމްޕްގެ "ދެކޮޅުވެރި އަމަލުތަކުގެ" ސަބަބުން، ބަދަލުހިފުމުގެ ގޮތުން އީރާނުން ކުރިއަށްގެންދާ ހަރަކާތްތަކަށް އެއްވެސް މަޑުޖެހުމެއް ނާންނާނެ ކަމަށެވެ.
"ޓްރަމްޕްގެ ނަފްސާނީ ހަނގުރާމައިގެ އުކުޅުތައް މިހާރު ވަނީ ބާވެ، ބޭނުންނުކުރެވޭ ހިސާބަށް ގޮސްފައި،" ކަމަށް އެ ބަޔާނުގައިވެއެވެ. އައިއާރްޖީސީގެ ބަޔާނުގައިވާ ގޮތުން، "އިސްތިއުމާރީ ދުޝްމަނުންގެ" ރޭވުންތަކަށް ހުރަސް އެޅި، އެމީހުން ފަސްޖެހެން ޖެހުނީ އީރާނުގެ "ކެރޭ، ސާބިތުކަމާއެކު ދައްކަމުންދާ ދެކޮޅުވެރިކަމުގެ" ސަބަބުންނެވެ.
ކުރިއަށް ހުރި އޮޕަރޭޝަންތަކާ މެދު ދެކޭގޮތް
އައިއާރްޖީސީގެ ބަޔާން ނިންމާލަމުން ބުނެފައިވަނީ، ދުޝްމަނުން ފަހަތަށް ޖެހުމާއި، އީރާނުގެ އިސްލާމީ ނިޒާމަށް ތާއީދުކޮށް އަދި އަސްކަރީ އޮޕަރޭޝަންތައް ކުރިއަށް ގެންދިއުމަށް ގޮވާލައި އެ ގައުމުގެ މަގުތަކަށް ނުކުމެ ތިބި "ކެރޭ ރައްޔިތުންގެ" ސަބަބުން، "ނިހާއީ ކާމިޔާބީ ލިބެންދެން" މި މަސައްކަތް ހުއްޓުމެއް ނެތި ކުރިއަށްދާނެ ކަމަށެވެ.
"އޮޕަރޭޝަން ޓްރޫ ޕްރޮމިސް 4" ފަށާފައިވަނީ، މިދިޔަ މަހުގެ ފަހުކޮޅު އިޒްރޭލާއި އެމެރިކާއިން އެއްވެސް އުސޫލެއް ނެތި އީރާނަށް ދޭން ފެށި ހަމަލާތަކާ ގުޅިގެންނެވެ.
