އީރާނަށް ހަމަލާތައް ދެމުންދާއިރު އިލްމުވެރިން ހަނު ތިއްބަވާތީ، ކީރީތި ރަސޫލާގެ ހަޔާތްޕުޅުގެ މައްޗަށް ފިލްމް އުފެއްދި އެވޯޑް ހާސިލް ކޮށްފައިވާ އީރާނުގެ މަޝްހޫރު ފިލްމު އުފެއްދުންތެރިޔާ މަޖީދު މަޖީދީ ވަރަށް ބޮޑަށް ފާޑުކިޔައިފި

އީރާނާ ދެކޮޅަށް އިޒްރޭލާއި އެމެރިކާއިން ކުރަމުންދާ ހަނގުރާމައާ ގުޅިގެން، މިސްރުގެ އަލް-އަޒްހަރު ޔުނިވާސިޓީގެ އިލްމުވެރިން ހަނުތިއްބަވާތީ ކީރިތި ރަސޫލާގެ ހަޔާތްޕުޅުގެ މައްޗަށް ފިލްމް އުފެއްދި އަދި އޮސްކާ އެވޯޑަށް ނޮމިނޭޓްވި އީރާނުގެ މަޝްހޫރު ފިލްމު ޕްރޮޑިއުސަރު މަޖީދު މަޖީދީ ވަރަށް ބޮޑަށް ފާޑުކިޔައިފިއެވެ.

އީރާނުގެ ޕްރެސް ޓީވީން ރިޕޯޓްކޮށްފައިވާ ގޮތުގައި، މަޖީދީ ވަނީ ޣައްޒާއިން ފެށިގެން އީރާނާ ހަމައަށް މުސްލިމުންނަށް އަމާޒުކޮށް ދެމުންދާ ހަމަލާތަކާ ދެކޮޅަށް އަޑުއުފުލުމުގައި އިލްމުވެރިންގެ "ވާޖިބު އަދާނުކޮށް ދޫކޮށްލާފައިވާ" ކަމަށް ބުނެފައެވެ.

މަޖީދީ ބުނި ގޮތުގައި، އެއްޒަމާނެއްގައި ސުންނީ މުސްލިމުންގެ އަޑު އެންމެ އިސްކޮށް އިއްވަމުން ގެންދިޔަ، އަދި ހުރިހާ މުސްލިމުންގެ އެއްބައިވަންތަކަމާއި އެކުވެރިކަމުގެ ޝިއާރު އުފުލި މިސްރުގެ އަލް-އަޒްހަރު ޔުނިވާސިޓީގެ އިލްމުވެރިންނާއި ޕްރޮފެސަރުންގެ އަމަލުތަކާ މެދު އޭނާ ހުރީ "މާޔޫސްވެ އަދި ރުޅިގަދަވެފައެވެ".

މުސްލިމުންގެ ބިންތައް "ފޭރިގަނެގެން އުޅޭ އިޒްރޭލުގެ ދައުލަތުން އިސްލާމީ ގައުމަކަށާއި މުސްލިމް ރައްޔިތުންނަށް ދެމުންދާ އުދުވާނީ ހަމަލާތަކާއި އޮހޮރުވަމުންދާ ލޭ ލޮލަށް ފެންނަމުންދާއިރު، އެބޭފުޅުން ހަނުތިއްބަވަނީ ކީއްވެގެންތޯ؟" އޭނާ ސުވާލު ކޮށްފައިވެއެވެ.

"ބާރުގަދަ އެމެރިކާއިން ދެމުންދާ އަނިޔާވެރި ހަމަލާތަކާއި، އެއްވެސް ދިފާއެއް ނެތް އެތައް ސަތޭކަ ކުޑަކުދިންނާއި، ފިރިހެނުންނާއި އަންހެނުން ގަތުލުކުރަމުންދާ މަންޒަރު ފެންނައިރު، އެއްވެސް ކަމެއް ނުކޮށް ހަނުތިއްބަވަނީ ކިހިނެއްތޯ؟"

މަޖީދު މަޖީދީއަކީ އޮސްކާ އެވޯޑަށް ނޮމިނޭޓްވި މަޝްހޫރު ފިލްމު "ޗިލްޑްރަން އޮފް ހެވަން" ގެ ޑައިރެކްޓަރެވެ. އާދިއްތަ ދުވަހު އޭނާ ފޮނުވި ވަރުގަދަ މެސެޖެއްގައި، އީރާނު ހިމެނޭހެން މުސްލިމް ގައުމުތަކާ ދެކޮޅަށް އިޒްރޭލާއި އެމެރިކާއިން ހިންގާ އުދުވާނާ މެދު އަލް-އަޒްހަރު ޔުނިވާސިޓީގެ އިލްމުވެރިން ހަނުތިއްބަވާތީ އޭނާ ވަނީ ވަރަށް ބޮޑަށް ނުރުހުން ފާޅުކޮށްފަ އެވެ.

ދުނިޔޭގެ ފެންވަރުގައި ބަލައިގަނެވިފައިވާ، ހަގީގީ ދިރިއުޅުމުގެ މައްޗަށް ބިނާކޮށް މަޝްހޫރު ފިލްމުތައް އުފައްދާ މަޖީދީ ބުނި ގޮތުގައި، ޣައްޒާއިން ފެށިގެން އީރާނާ ހަމައަށް މުސްލިމުންނަށް ކުރިމަތިވަމުންދާ އަނިޔާވެރިކަމާ ދެކޮޅަށް އަޑުއުފުލުމުގެ މަސްއޫލިއްޔަތު އަލް-އަޒްހަރުގެ އިލްމުވެރިން ވަނީ ދޫކޮށްލާފައެވެ.

"މުހައްމަދު: ދަ މެސެންޖަރ އޮފް ގޯޑް" ފިލްމުގެ ޑައިރެކްޓަރު، މިސްރުގެ އަލް-އަޒްހަރު ޔުނިވާސިޓީގެ އިލްމުވެރިންނަށް އެންމެ ބޮޑަށް ފާޑުކިޔާފައިވަނީ، އެ ޔުނިވާސިޓީއަކީ މުސްލިމުންގެ އެއްބައިވަންތަކަމަށް ވަކާލާތުކުރާ ސުންނީ އިސްލާމީ ދުނިޔޭގެ އެންމެ ނުފޫޒުގަދަ މަރުކަޒަށް ވާތީއެވެ.

"އަޅުގަނޑު މިހުރީ މިސްރުގެ އަލް-އަޒްހަރު ޔުނިވާސިޓީގެ އިލްމުވެރިންނާއި ޕްރޮފެސަރުންނާ މެދު މާޔޫސްވެ އަދި ރުޅިގަދަވެފައި. އެއީ ފާތިމަތުގެފާނުގެ ނަންފުޅަށް ނިސްބަތްވާ، އެއްޒަމާނެއްގައި ސުންނީ  މުސްލިމުންގެ ފަރާތުން އެންމެ އިސް ބަސް ބުނި، އަދި ހުރިހާ މުސްލިމުންގެ އެއްބައިވަންތަކަމާއި އެކުވެރިކަމުގެ ޝިއާރު އުފުލި މަރުކަޒެއް،" މަޖީދީގެ މެސެޖުގައި ލިޔެފައިވެއެވެ.

މަޖީދީ ވަނީ "ތެލުގެ މުއްސަނދިކަން ލިބިފައިވާ އަނިޔާވެރިންގެ" އެހީތެރިކަމަށް ބަރޯސާވާ އިލްމުވެރިންނާއި، އިސްލާމީ އުސޫލުތައް ނަގަހައްޓާ ކަމަށް ބުނާ އިލްމުވެރިންނާ ދެމެދު ހުރި ތަފާތު ފާހަގަކޮށްފައެވެ.

ފުރަތަމަ ބުނި ފަދަ އިލްމުވެރިންގެ ފަރާތުން އެއްވެސް އުންމީދެއް ނެތް ކަމަށް ބުނެ، އޭނާ އިތުރަށް ބުނެފައިވަނީ އަނިޔާ ލިބޭ މީހުންގެ ފަރާތުން ވަކާލާތު ކުރުމުގެ ބަދަލުގައި "މިޒަމާނުގެ އަބޫ ޖަހުލުން" އިލްމުވެރިން ދިފާއުކުރަމުން ދާ ކަމަށެވެ.

"ގިޔާމަތް ދުވަހެއް ނާންނާނެ ކަމާއި، މާތްﷲ އާއި ރަސޫލާ އަދި ފާތިމަތުގެފާނުގެ ކުރިފުޅުމަތީގައި ހުއްޓެން ނުޖެހޭނެކަމުގެ އިލްމު އެބޭފުޅުންނަށް ލިބިވަޑައިގެންފައިވާ ނަމަ، އަޅުގަނޑުމެންނަށްވެސް އެކަން އަންގަވައިދެއްވާ،" އާޚިރަތް ދުވަހު ޖަވާބުދާރީވާން ޖެހޭނެ ކަމުގެ މައްޗަށް އިޝާރާތްކޮށް މަޖީދީ ބުންޏެވެ.

ސުންނީ މުސްލިމް ދުނިޔޭގެ އެންމެ ދުވަސްވީ އަދި އެންމެ ޝަރަފުވެރި އެއް މަރުކަޒު ކަމަށްވާ އަލް-އަޒްހަރު ޔުނިވާސިޓީން، އީރާނާ ދެކޮޅަށް ކުރަމުންދާ ހަނގުރާމައިގައި މިހާތަނަށް އެއްވެސް އެއްޗެއް ބުނަން ވަނީ ދެކޮޅު ހަދާފައެވެ.