ދެ އިންތިހާބު އެއްކޮށްލަން އަހާ ސުވާލު އޮތީ ޤާނޫނުއަސާސީގެ ތެރެއިން އަދި ރެފަރަންޑަމަކަށް ވޯޓަށް އެހޭ ކަހަލަ ގޮތަކަށް ވެސް ނޫން: ބިގޭ

ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލަން ރައްޔިތުންނަށް އަހާ ސުވާލު އޮތީ ޤާނޫނުއަސާސީގެ ތެރެއިން އަދި ރެފަރަންޑަމަކަށް ވޯޓަށް އެހޭ ކަހަލަ ގޮތަކަށް ވެސް ނޫން ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެ އެވެ. 

ރާއްޖެޓީވީގެ ނޫނެކޭ ޕްރޮގްރާމުގައި ބިގޭ ވިދާޅުވީ ޤާނޫނުއަސާސީގެ ބާރުތައް ވަރަށް ބޮޑަށް ވަކިވަކިން އޮންނަން ހުރިހާ ބޭފުޅުންގެ ވިސްނުމުގައި ހުރި ނަމަވެސް މިހާރު މި ދަނީ އެ ޤާނޫނުއަސާސީގެ ރޫހާ ވެސް މުޅިން ޚިލާފަށް ކަމަށެވެ. އޭނާ ވިދާޅުވީ މިހާރު ވޯޓު ކަރުދާހުގައި އޮތް ސުވާލުގެ މާނަ ވެސް އޮޅޭ ގޮތަށް ކަމަށާއި، އެއީ ދެ އިންތިހާބު އެއް ދުވަހެއްގައި ބާއްވާނީތޯ ނޫނީ އެހެން ދުވަހެއްގައި ބާއްވާނީތޯ ސުވާލުކުރާ ގޮތަކަށް ވެސް ނޫން ކަމަށެވެ.

ބިގޭ ވިދާޅުވީ އޭނާ ފެރިދޫއަށް ކުރެއްވި ޒިޔާރަތުގައި ފެރިދޫއިން ދިމާވި މީހަކު ބުނީ މިއީ އެއްގޮތަކަށް ވެސް ވޯޓުދޭންވާނެ އެއްޗެއް ނޫން ކަމަށް ބުނެފައިވާ ކަމަށެވެ. އޭނާ ވިދާޅުވީ ދެ އިންތިހާބު އެއްކޮށްލައިފި ކަމަށް ވަންޏާމު ފަސް އަހަރު އެއް ފަހަރު ނޫނީ ސަރުކާރުގެ ވެރިން ލޮލުކޮޅަށް ވެސް ނުފެންނާނެ ކަމަށް އެމީހާ ބުނި ކަމަށެވެ. 

މިހާރު އަހަރުން ގާތަށް އެބަ އާދޭ، މަޖިލީހުގެ އިންތިޚާބުގައި ވެސް، ރިޔާސީ އިންތިޚާބުގައި ވެސް، އަދި ކައުންސިލު އިންތިޚާބުގައި ވެސް. ރައްޔިތުން ގާތަށް ސަރުކާރުގެ ވެރިން އެބަ އާދޭ. އައިސް، ކަންތައްތަކެށް ކޮށްދޭން އެބަ ވިދާޅުވޭ. އަދި ނުކުރެވި ހުރި ކަންތައް އޮތް ކަމަށް ވަންޏާމު، ދެން އަންނަ ޖެހިގެން އަންނަ އިންތިޚާބަށް އައިސް އަނެއްކާ އެ ކަންތައްތައް ފަށައިދޭން އެބަ މަސައްކަތްކުރޭ ކޮންމެވެސް ވަރަކަށް. މިކަން ކޮށްފި ކަމަށް ވަންޏާމު، ދެ އިންތިޚާބު އެއްކޮށްލައިފި ކަމަށް ވަންޏާމު، ދެން ފަސް އަހަރު، އެއް ފަހަރު ނޫނީ މިއިން މީހަކު ލޮލުކޮޅަށް ވެސް ނުފެންނާނެ. މިއީ ހަމަ އެ ބޭފުޅުން ދެއްކި ރާގުގައި އެގޮތަށް އަޅުގަނޑު މި ދެންނެވީ އިނގޭތޯ. ޙަޤީޤަތަކީ އެއީ.

އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)

އެމަނިކުފާނު ވިދާޅުވީ މިކަމުން ސަލާމަތްވުމަށްޓަކައި މި ވޯޓުގައި ހަމަ ނޫނެކޭ ބުނުން ނޫން ގޮތެއް ނެތް ކަމަށެވެ.

ބިގޭ ވިދާޅުވީ ލާމަރުކަޒީ ގާނޫނުގެ ތެރެއިން ރައްޔިތުން ގާތުގައި ތިބަ ޖަވާބުދާރީކުރުވާނެ ވެރިންތަކެއް ރައްޔިތުން އަމިއްލައަށް އިންތިހާބުކުރަން ރަށްރަށުގައި ކަތީބުގެ ދައުރު ނިންމައިލާފައި ކަނޑައެޅި ނަމަވެސް މިހާރު މި ދަނީ އެ ބާރު ޤާނޫނުއަސާސީގެ ތެރެއިން ނަންގަވަމުން ކަމަށެވެ.

އޭނާ ވިދާޅުވީ އަތޮޅު އޮފީސްތައް އުވާލުމާއި ރަށްތަކުގެ އިހްތިސާސްގެ ތެރޭގައި ހިމެނޭ ބާރުވެރިކަމުގެ ތެރެއިން އެތައް ބައެއް ގެއްލިގެންދިޔަ ކަމަށެވެ. ބިގޭ ވިދާޅުވީ ލޯކަލް ކައުންސިލް މި ދައުރުގައި ފަސް އަހަރުގެ ޓާމްގެ ތެރޭގައި އެ ބޭފުޅުންނަށް ލިބުނީ ސާފު ދެ އަހަރު ވެރިކަން ކުރަން ކަމަށާއި، އެ ދެ އަހަރު ދިޔައީ ކޮވިޑާ ގުޅިގެން ގެއްލުން ކަމަށެވެ.

ބިގޭ ވިދާޅުވީ ސަރުކާރުން އުޅެނީ ހަމައެކަނި ދެ އިންތިހާބެއް  އެއްކުރަން ނޫން ކަމަށާއި، ބާރުތައް އެއްކުރަމުން ގޮސްފައި އެހެން އެއްވެސް މީހަކަށް ހިންދެމިނުން ލެވޭވަރަށް ރައްޔިތުން އަޅުވެތިކޮށްފައި ރައްޔިތުން ބިކަ ކުރުން ނޫން އެހެން ކަމެއް މި ސަރުކާރުން ކުރާ ތަނެއް ނުފެންނަ ކަމަށެވެ.