މުރައިދޫއަށް ޖެންސެންޓް ގެނައި މަންޒަރު ލައިވްކުރި އެރަށުގެ ކައުންސިލްގެ ނައިބު ރައީސް އަށް ޕީއެންސީގެ އެކްޓިވިސްޓުން ފުރައްސާރަކޮށް ހަމަލާ ދިނުމަށް މަސައްކަތް ކޮށްފި

ހއ. މުރައިދޫ އަށް އައު ޖެންސެންޓް ގެނައި މަންޒަރު ސޯޝަލް މީޑިއާއިން ލައިވް ކުރުމުގެ މަސައްކަތް ކުރަމުން ދިޔަ އެރަށުގެ ކައުންސިލްގެ ނައިބު ރައީސް އަބްދުލްކަރީމް އަލީ އަށް ސަރުކާރުގެ ޕާޓީ ޕީއެންސީގެ އެކްޓިވިސްޓުން ފުރައްސާރަކޮށް ހަމަލާ ދިނުމަށް މަސައްކަތް ކޮށްފި އެވެ. 

ހޮނިހިރު ދުވަހުގެ ވަގުތެއްގައި ފެނަކައިން މުރައިދޫގެ ކަރަންޓުގެ ޚިދުމަތް ރަނގަޅު ކުރުމަށްޓަކައި ކަމަށް ބުނެ، 250 ކިލޯވޮޓުގެ އައު ޖެންސެޓް އެ ރަށަށް ގެންގޮސް ބޭލުމުގެ މަސައްކަތް ވަނީ ކޮށްފަ އެވެ. އަދި މިމަސައްކަތް ކުރަމުންދިޔަ މަންޒަރު އެރަށުގެ ކައުންސިލްގެ ނައިބު ރައީސް އަބްދުލްކަރީމް ސޯޝަލް މީޑިއާގައި ލައިވް ކޮށްފައިވެ އެވެ. އަދި ޕީއެންސީގެ ޓީޝާޓު ލައިގެން ހުރި އެކްޓިވިސްޓަކު ވީޑީއޯކުރުމަށް ހުރަސްއަޅާ މަންޒަރު ފެނެ އެވެ.

މި ހާދިސާ ހިނގާ ދިޔަ ގޮތް އާދިއްތަ ދުވަހުގެ ފަށާއިރު ޕްރޮގްރާމަށް އޭނާ ވަނީ ވަރަށް ތަފްސީލް ކޮށް ކިޔައިދެއްވާފަ އެވެ. 

އަބްދުލްކަރީމް ވިދާޅުވީ އެރަށަށް ދިމާވެފައިވާ ކަރަންޓުގެ މައްސަލަ ހައްލު ކުރުމަށް މަސައްކަތް ކުރާތާ ދެ އަހަރަށް ވުރެ ގިނަ ދުވަސްވެފައިވާ ކަމަށާއި، މިއީ ޕީޕީއެމް، ޕީއެންސީ މީހުން ކުރި މަސައްކަތެއް ނޫން ކަމަށެވެ. އަދި 2024 ވަނަ އަހަރުގެ ރަމަޟާން މަހުގެ ކުރިން އައު ޖެންސެންޓެއް ގެނެސްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީ އެކަމުގެ އެންމެފަހުގެ މައުލޫމާތު ހޯދުމަށް ވެސް ފާއިތުވި ދުވަސްތަކުގައި ވަރަށް ގިނަ މަސައްކަތްތައް ކޮށްފައިވާ ކަމަށެވެ. 

އެގޮތުން ޕީއެންސީގެ ބޭފުޅުންނާ ސުވާލުކޮށް، ދާއިރާގެ މެންބަރު އިބްރާހިމް ސުޖާއު އަށް ޕްރެޝަރ ކުރާ ކަމަށާއި، ކަރަންޓު ކެނޑޭއިރަށް އެކަން ވެސް ސޯޝަލް މީޑިއާގައި ހިއްސާކޮށް އަޑު އުފުލާފައިވާ ކަމަށް އޭނާ ވިދާޅުވި އެވެ. މިގޮތަށް މަސައްކަތް ކުރާތީ، އައު ޖެންސެޓް ގެންނައިރު އެކަން ހާމަނުކުރާނެ ކަމަށާއި، ލައިވް ކުރަން ނުކެރޭނެ ކަމަށް ބުނެ ޕީއެންސީއަށް ތާއީދު ކުރާ މީހުން ފުރައްސާރަ ކުރި ކަމަށް އޭނާ ވިދާޅުވި އެވެ. 

ނަމަވެސް ހޮނިހިރު ދުވަހު އައު ޖެންސެޓް ބޭލުމުގެ މަސައްކަތް ކުރަމުންދިޔަ މަންޒަރު ލައިވްކޮށް ހިޔާލު ފާޅު ކުރަން ފެށުމުން ޕީއެންސީއަށް ތާއީދު ކުރާ މީހުންގެ ފަރާތުން ވަރަށް ބޮޑަށް ފުރައްސާރައާ ކުރިމަތިލާން ޖެހުނު ކަމަށާއި، މާރާމާރީ ހިންގުމަށް މަސައްކަތް ކުރި ކަމަށް އަބްދުލްކަރީމް ވިދާޅުވި އެވެ. 

މީގެ އިތުރުން އަބްދުލްކަރީމް ވިދާޅުވީ، ޖެންސެޓް ލިބިގެން ދިޔައީ ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް ކަމަށާއި، އެހެން ނޫންނަމަ މި ނުލިބޭނެ ކަމަށެވެ. އަދި އިންތިޚާބުތަކާ ދިމާކޮށް ރައްޔިތުން ބޭނުންވާ ކަންކަން ހާސިލްވާއިރު، މިނަގާ ރެފަރެންޑަމް ވޯޓުގައި ނޫނެކޭ ބުނުމަށް ވެސް އޭނާ ގޮވާލެއްވި އެވެ.

ދެން އަޅުގަނޑު އެ ވާހަކަ ދައްކަނިކޮށް މިއަދު ހއ. މުރައިދޫ ހެލްތު ސެންޓަރާ ހަވާލުވެހުރި ސިޔާސީ ގޮތުން އައްޔަނުކޮށްފައި ހުރި ބޭފުޅާ އައިސްފައި ބުނީ އަޅުގަނޑާ ދިމާލަށް އަޅުގަނޑު މި ދައްކާ މޭރުމުން އަޅުގަނޑު ކުރި މަސައްކަތެކޭ ބުނީމަ އައިސް އަޅުގަނޑާ ދިމާލަށް މި ބުނަނީ ކަލޭ ކުރި ކޮން މަސައްކަތެއް ހޭ ކިޔާ ބަހައްޓާފައި ފޯނާއެކު އަޅުގަނޑު މޫނުމައްޗަށް ހަމަޖަހާނީ. ފޯނުގެ ހިފަނީ. ހިފުނީމަ އަޅުގަނޑުގެ ވީޑިއޯ ޕޯސް ވެގެން ދާ ތަން ފެންނާނެ. ވަރަށް ރަނގަޅަށް ލައިވުން. އަޅުގަނޑު މޫނުމަތީގައި އައިސް ޖެހެނީ. އެބޭފުޅާގެ އަތް ވެސް އަޅުގަނޑުގެ މޫނުމަތީގައި ޖެހުނު. އަޅުގަނޑު މިހާރު މައުލޫމާތު ލިބިފައި އިނީ މި ބޭފުޅުން ފުރަތަމަ އަޅުގަނޑާ ދިމާކުރި ބޭފުޅާ އަޅުގަނޑު ވީޑިއޯކޮށްގެން އެކަމުގެ ދައުވާ ކުރަން ޕޮލިހަށް ދިޔަ ޚަބަރުވެސް އަޅުގަނޑަށް ނުސީދާކޮށް ލިބިފައި އޮތީ. ގޮސްފައި ދެން ފަހުން މިބޭފުޅާއަށް މި ފަހުމް މިވަނީ މި ބޭފުޅާ އެކަން މި މައްސަލައާ ކުރިއަށް ދެވޭކަށް ނެތްކަން. މި ބޭފުޅާ އަޅުގަނޑަށް އިންޒަރު ވެސްދޭކަން ވީޑިއޯގައި. އެކަން އެނގިގެން މި ބޭފުޅާ ބުނެފައި މިވަނީ އަޅުގަނޑު ބޭނުމެއް ނެތޭ މައްސަލަ ޖައްސާކަށް.

ހއ.މުރައިދޫ ކައުންސިލްގެ ނައިބު ރައީސް އަބްދުލްކަރީމް އަލީ 

އަބްދުލްކަރީމް ވިދާޅުވީ އެރަށަށް ގެނައުމަށް ނިންމާފައިވަނީ 400 ކިލޯވޮޓުގެ އައު ޖެންސެޓެއް ކަމަށާއި، ނަމަވެސް ގެނައީ 250 ކިލޯވޮޓްގެ ޖެންސެޓެއް ކަމަށެވެ. އަދި ސަރުކާރުން ބޭނުންވީ އިންތިޚާބުގެ ކުރިން އައު ޖެންސެޓެއް އެރަށަށް އަރުވަން ކަމަށާއި، ކަރަންޓުގެ މައްސަލައަށް ދާއިމީ ހައްލެއް ހޯދައިދޭން ނޫން ކަމަށް އޭނާ ވިދާޅުވި އެވެ.