ހަނގުރާމަ އިތުރު 10 ދުވަހަށް ދެމިގެން ހިނގައްޖެ ނަމަ، ސާފު ނުކުރާ ތެޔޮ ފީފާއެއްގެ އަގު 150 ޑޮލަރަށް އުފުލިދާނެ ކަމުގެ އިންޒާރު ދީފި
އީރާނުން ހޮރްމޫޒް ކަނޑުއޮޅި ބަންދުކުރުމާ ގުޅިގެން ދުވާލަކު 21 މިލިއަން ފީފާގެ ތެޔޮ ސަޕްލައިކުރުމަށް ހުރަސްއެޅި، ދުނިޔޭގެ ބާޒާރުގައި ތެލުގެ އަގު ވަނީ 119 ޑޮލަރަށް އުފުލިފައި. ހޮރްމޫޒް ކަނޑުއޮޅި ބަންދުކުރުމުގެ ކުރިން ތެޔޮ ފީފާއެއްގެ އަގު ހުރީ 65 ޑޮލަރުގައި ކަމުގައި ވިޔަސް، ތެލުގެ އަގު ދަށްކުރުމަށް އެމެރިކާއިން ގިނަ މަސައްކަތްތަކެއް ކުރަމުންދަނިކޮށް، މިހާރު ތެލުގެ އަގު ވަނީ 119 ޑޮލަރަށް އަރާފައި.
މާރިޗު 8، 2026 ވީ އާދީއްތަ ދުވަހުގެ ރޭ ތެހެރާންގެ ހުޅަނގު އުތުރުގައި ހުންނަ ޝަހްރާން ތެޔޮ ސާފުކުރާ ކާރުޚާނާއަށް ދިން ވައިގެ ހަމަލާތަކާ ގުޅިގެން ރޯވި އަލިފާންގަނޑު ނިއްވުމުގެ މަސައްކަތް ކުރިއަށްދާއިރު، އީރާނުގެ ސިވިލް ޑިފެންސްގެ މެންބަރަކު އެ ސަރަހައްދުގައި ހަލާކުވެފައިވާ ތެޔޮ އުފުލާ ލޮރީއެއްގެ ކައިރިން ހިނގާފައި ދަނީ. | ގެޓީ އިމޭޖަސް
އީރާނާ ދެކޮޅަށް އެމެރިކާ އާއި އިޒްރޭލު ގުޅިގެން ފެށި ޣައިރު ގާނޫނީ ހަނގުރާމަ އިތުރު 10 ދުވަހަށް ދެމިގެން ހިނގައްޖެ ނަމަ، ދުނިޔޭގެ ބާޒާރުގައި ސާފު ނުކުރާ ތެޔޮ ފީފާއެއްގެ އަގު 150 ޑޮލަރަށް އުފުލިދާނެ ކަމަށް އީރާނުގެ ހަކަތައާ ބެހޭ މާހިރަކު ލަފާކުރައްވައިފިއެވެ. މިކަން ހާމަކުރެއްވީ އީރާނުގެ އިންސްޓިޓިއުޝަން އޮފް އިންޖިނިއަރިން އެންޑް ޓެކްނޮލޮޖީގެ ސީނިއާ އެނާޖީ ސްޓްރެޓެޖިސްޓް މަހްދީ އަރަބްސާދެގް އެވެ.
އީރާނުގެ ފާރްސް ނިއުސް އެޖެންސީއަށް ދެއްވި ބަސްދީގަތުމެއްގައި އަރަބްސާދެގް ވިދާޅުވީ، "ދުޝްމަނުންގެ އުޅަނދުފަހަރަށް" ހޮރްމޫޒް ކަނޑުއޮޅި އީރާނުން ބަންދުކުރުމާ ގުޅިގެން، ދުވާލަކު 21 މިލިއަން ފީފާގެ ތެޔޮ އުފުލުމަށް ހުރަސް އެޅިފައިވާ ކަމަށެވެ. ހަނގުރާމަ ފެށުނީއްސުރެ މި ފިޔަވަޅު އަޅާފައިވުމުގެ ސަބަބުން، ދުނިޔޭގެ ބާޒާރަށް ތެޔޮ ސަޕްލައިކުރުމަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް އޭނާ ފާހަގަކުރެއްވިއެވެ.
އަރަބްސާދެގް އިތުރަށް ވިދާޅުވީ، ހޮރްމޫޒް ކަނޑުއޮޅި ބަންދުކުރުމުގެ ކުރިން ތެޔޮ ފީފާއެއްގެ އަގު ހުރީ 65 ޑޮލަރުގައި ކަމަށެވެ. ނަމަވެސް، ތެލުގެ އަގު ދަށްކުރުމަށް އެމެރިކާއިން ގިނަ މަސައްކަތްތަކެއް ކުރަމުންދަނިކޮށް، މިހާރު ތެލުގެ އަގު ވަނީ 119 ޑޮލަރަށް އުފުލިފައެވެ.
ތެލުގެ އަގު ކޮންޓްރޯލް ކުރުމަށް އެމެރިކާއިން ކުރަމުންދާ މަސައްކަތްތަކުގެ ތެރޭގައި، އީރާނުގެ ތެޔޮ ގަތުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް 30 ދުވަހުގެ މުއްދަތަކަށް ލުއިދިނުމަށް ޑޮނަލްޑް ޓްރަމްޕްގެ ސަރުކާރުން ނިންމި ނިންމުން ހިމެނެއެވެ.
