އީރާންގެ ވަފާތެރި އެކުވެރިއެއްގެ ގޮތުގައި އޮންނާނެ ކަމުގެ ޔަޤީންކަން ޕުޓިން ދެއްވައިފި

ރަޝިޔާ އަކީ އީރާންގެ ވަފާތެރި އެކުވެރިއެއްގެ ގޮތުގައި ދެމި އޮންނާނެ ކަމަށާއި، އީރާން އަށް ކުރިމަތިވެފައިވާ ދަތި އުނދަގޫ ދަނޑިވަޅުގައި އެ ޤައުމާ އެކު ސާބިތުކަމާ އެކު ރަޝިޔާ އޮންނާނެ ކަމުގެ ޔަޤީންކަން، ރަޝިޔާގެ ރައީސް ވްލަޑިމިއަރ ޕުޓިން ދެއްވައިފި އެވެ. 

ރަޝިޔާގެ ރިޔާސީ ގަނޑުވަރު، ކްރެމްލިން އިން ހޮނިހިރު ދުވަހު ހާމަ ކުރެއްވި ގޮތުގައި ޕުޓިން އެހެން ވިދާޅުވެފައި ވަނީ އީރާންގެ އައު އަހަރުގެ މުނާސަބަތުގައި އެ ޤައުމުގެ ލީޑަރުންނަށް ފޮނުވި މެސެޖުގަ އެވެ. 

އީރާންގެ ރޫހީ ލީޑަރު މުޖުތަބާ ޚާމަނާއީ އަށާއި، އީރާންގެ ރައީސް މަސްއޫދު ޕެޒެޝްކިއާން އަށް ފޮނުއްވި މެސެޖުގައި ޕުޓިން ވިދާޅުވީ، އީރާންގެ ރައްޔިތުންނަށް ކުރިމަތިވެފައިވާ ހަރުކަށި އިންތިހާނު ތަކުން އަބުރުވެރިކަމާ އެކު އަރައިގަނެވޭނެ ކަމަށް އުންމީދު ކުރައްވާ ކަމަށެވެ. އަދި މި ނާޒުކު ދަނޑިވަޅުގައި، ރަޝިޔާ އަކީ އީރާންގެ އިތުބާރު ހުރި ބައިވެރިއެއްގެ ގޮތުގައި ދެމި އޮންނާނެ ކަމަށް ވެސް ޕުޓިން ވަނީ ވިދާޅުވެފަ އެވެ. 

މެދު އިރުމަތީގެ މަސްރަހާ ގުޅޭ ގޮތުން ރަޝިޔާ އިން ބުނެފައި ވަނީ، އެމެރިކާ އާއި އިޒްރޭލް އިން އީރާން އަށް ދެމުންދާ ހަމަލާ ތަކުގެ ސަބަބުން މުޅި ސަރަހައްދު ބޮޑު ނުރައްކަލެއްގެ ތެރެއަށް ވެއްޓިފައިވާ ކަމަށެވެ. އަދި އެކަމުގެ ސަބަބުން ދުނިޔޭގެ ހަކަތައިގެ ބާޒާރަށް ބޮޑު ލޮޅުމެއް އަރާފައިވާ ކަމަށް ވެސް ރަޝިޔާ އިން ބުނެފައިވެ އެވެ. މީގެ އިތުރުން، އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހަރާ ކޮށްލުމަކީ ދަށު ދަރަޖައިގެ އަމަލެއްގެ ގޮތުގައި ރަޝިޔާ އިން ވަޏީ ސިފަ ވެސް ކޮށްފަ އެވެ. 

މި ދަނޑިވަޅުގައި ޕޮލިޓިކޯ ނޫހުން ރިޕޯޓު ކޮށްފައިވާ ގޮތުގައި، ޔޫކްރެއިން ހަނގުރާމައާ ގުޅޭ ޖާސޫސީ މައުލޫމާތު އެމެރިކާ އިން ފޯރުކޮށްދިނުން ހުއްޓާލައިފި ނަމަ، ރަޝިޔާ އިން އީރާން އަށް ދޭ ޖާސޫސީ މައުލޫމާތު ހުއްޓާލާނެ ކަމުގެ ހުށަހެޅުމަށް ރަޝިޔާ އިން ވަނީ އެމެރިކާ އަށް ހުށަހަޅައިފަ އެވެ. ނަމަވެސް، އެމެރިކާ އިން އެ ހުށަހެޅުން ޤަބޫލު ކޮށްފައި ނުވާ ކަމަށް ބުނެފައިވާއިރު، ރަޝިޔާ އިން ބުނެފައި ވަނީ އެއީ ދޮގު ރިޕޯޓެއް ކަމަށެވެ. 

ރަޝިޔާ އާއި އީރާން އަކީ ގާތް ގުޅުމެއް އޮންނަ ދެ ޤައުމު ކަމަށްވާއިރު، ދެ ޤައުމުން ވެސް އަންނަނީ އެ ގުޅުން ބަދަހި ކުރުމަށް މަސައްކަތް ކުރަމުންނެވެ. އެމެރިކާ އާއި އިޒްރޭލް އިން އީރާންއާ ދެކޮޅަށް ދޭން ފެށި ހަމަލާތައް ކުށްވެރި ކުރި ޤައުމު ތަކުގެ ތެރޭގައި ރަޝިޔާ ހިމެނޭއިރު، ރަޝިޔާ އިން ވަނީ އެ ޤައުމު އޮތީ އީރާންއާ އެކު ކަމަށް މީގެ ކުރިން ވެސް ހާމަ ކޮށްފަ އެވެ.