އީރާންގެ ވަރުގަދަ އިންޒާރެއް އިނގިރޭސިވިލާތަށް

އިނގިރޭސިވިލާތުގެ އަސްކަރީ މަރުކަޒުތައް ބޭނުން ކޮށްގެން އެމެރިކާ އިން އީރާން އަށް ދޭ ކޮންމެ ހަމަލާ އަކީ، އިނގިރޭސިވިލާތުން އީރާންއާ ދެކޮޅާށް ހިންގާ އުދުވާނެއްގައި ބައިވެރިވުން ކަމަށް ބަލާނެ ކަމުގެ އިންޒާރު، އީރާންގެ ފޮރިން މިނިސްޓަރު އައްބާސް އަރާގްޗީ ދެއްވައިފި އެވެ. 

ހުކުރު ދުވަހު އީރާންގެ ފޮރިން މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، އީރާންގެ ފޮރިން މިނިސްޓަރު އަރާގްޗީ އެހެން ވިދާޅުވީ އިނގިރޭސިވިލާތުގެ ފޮރިން ސެކްރެޓަރީ އިވެޓް ކޫޕާއާ ފޯނުން ގުޅުއްވައި ދެއްކެވި ވާހަކައިގައި ކަމަށެވެ. ނަމަވެސް، އެ ފޯނު ކޯލު ކުރައްވާފައި ވަނީ ސީދާ ކޮން ދުވަހެއްގައި ކަމެއް ބުނެފައި ނުވެ އެވެ.

އިނގިރޭސިވިލާތުގެ ފޮރިން ސެކްރެޓަރީއާ ވާހަކަ ދައްކަވަމުން އަރާގްޗީ ވިދާޅުވީ، އިނގިރޭސިވިލާތުގެ ބޭސްތައް ބޭނުން ކޮށްގެން އެމެރިކާ އިން އީރާން އަށް ހަމަލާ ދިނުމުގެ ފުރުސަތު ދިނުމަކީ އުދުވާނެއްގައި ބައިވެރިވުން ކަމަށް ކަނޑައެޅިގެން ބަލާނެ ކަމަށެވެ. އަދި މިފަދަ އަމަލު ތަކަކީ ދެ ޤައުމުގެ ދެ މެދުގައި އޮންނަ ގުޅުމުގެ ތާރީޚުގައި ނުބައި ސިފައެއްގައި ރެކޯޑު ކުރެވިގެންދާނެ ކަންކަން ކަމަށް ވެސް އަރާގްޗީ ވިދާޅުވެފައިވެ އެވެ. 

އީރާން އިން މިފަދަ އިންޒާރެއް ދީފައި މި ވަނީ، އެމެރިކާ އާއި އިޒްރޭލް އިން އެ ޤައުމާ ދެކޮޅަށް ހިންގާ ހަނގުރާމައުގައި އިނގިރޭސިވިލާތުން އެހީތެރިވާ ކަމުގެ ތުހުމަތު ތަކެއް ކުރެވެމުންދާ ވަގުތެއްގަ އެވެ. ޚާއްސަކޮށް ސަރަހައްދުގެ ހަމަ ނުޖެހުންތައް އިތުރުވެފައިވާ މި ދަނޑިވަޅުގައި، އީރާންގެ އިސްލާމީ ޖުމްހޫރިއްޔާއާ ދެކޮޅަށް އެއްވެސް އަސްކަރީ އަމަލެއްގައި ބައިވެރިވުމަކީ ބަލައި ގަނެވޭނެ ކަމެއް ނޫން ކަމަށް، އީރާން އިން ދަނީ ތަކުރާރުކޮށް ބުނަމުންނެވެ. 

މި ފޯނު ކޯލާ ގުޅޭ ގޮތުން އިނގިރޭސިވިލާތުގެ ފޮރިން އޮފީހުން އަދި ސަރުކާރުން ވެސް ރަސްމީކޮށް އެއްޗެއް ބުނެފައި ނުވެ އެވެ.