ޓްރަމްޕްގެ ރުޅި ގަނޑު ނޭޓޯ އަށް، "ކަލޭމެން ތިއީ ފިނޑި ބައެއް، އަހަރެން އެކަން ހަނދާން ކުރާނަން!"

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި، ނޭޓޯގެ ޤައުމު ތަކުގެ އެއްބާރުލުން ނުލިބޭތީ އެމެރިކާގެ ރައީސް ޑޮނަލްޑް ޓްރަމްޕް ވަރަށް ބޯޑަށް ކޯފާވެއްޖެ އެވެ. 

ހުކުރު ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވަނީ، އެމެރިކާގެ އެހީތެރިކަމާ ނުލައި ނޭޓޯ އަކީ އެއްވެސް ބާރެއް ނެތް، ކަރުދާހުގެ މިނިކާވަގަކަށް ވެގެންދާނެ ކަމަށް ވިދާޅުވެފައި އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ދޭން ފެށި ހަމަލާތަކާ ގުޅިގެން މުޅި ދުނިޔޭގެ އިޤްތިޞާދަށް ވަނީ އެކަމުގެ އަސަރު ކުރަން ފަށައިފަ އެވެ. މި ހަނގުރާމަައިގައި އެތައް ހާސް ބަޔަކު މަރުވެފައިވާއިރު، މިލިއަނަށް ވުރެ ގިނަ މީހުން ވަނީ ހާލުގައި ޖެހިފަ އެވެ. މި ހަނގުރާމަ ފެށުމުގެ ކުރިން އެމެރިކާ އިން އެއްވެސް ޤައުމަކާ މަޝްވަރާ ކޮށްފައި ނުވި ނަމަވެސް، ހޮރްމޫޒް ކަނޑު އޮޅިން ދަތުރު ކުރާ އުޅަނދު ފަހަރަށް ސަލާމަތްތެރިކަން ކަށަވަރު ކުރުމަށް އެމެރިކާގެ ބައިވެރިންގެ އެހީތެރި ކަމަށް ޓްރަމްޕް ގެންދަވަނީ ބާރު އަޅުއްވަމުންނެވެ. 

ޓްރަމްޕް ވިދާޅުވީ، އީރާންއާ ދެކޮޅަށް ކުރާ ހަނގުރާމައިގައި ނޭޓޯގެ ޤައުމު ތަކުން ބައިވެރިވާން ބޭނުން ނުވާއިރު، ތެލުގެ އަގު ބޮޑުވުމުން އެކަމުގެ ޝަކުވާ ކުރަމުން އަންނަ ކަމަށެވެ. އަދި މިހާރު ހަނގުރާމައިގެ އަސްކަރީ ކާމިޔާބީ ލިބިފައިވާ ކަމަށާއި، އެ ޤައުމު ތަަކަށް އެއްވެސް ނުރައްކަލެއް ނެތް ޙާލަތެއްގައި ވެސް، ހޮރްމޫޒް ކަނޑު އޮޅި ހުޅުވުމަށް އެހީތެރި ނުވާތީ ޓްރަމްޕް ވަނީ ކަންބޮޑުވުން ފާޅު ކުރައްވައިފަ އެވެ. 

މީގެ އިތުރުން ޓްރަމްޕް ވިދާޅުވީ، ތެލުގެ އަގު ބޮޑުވުމުގެ މައިގަނޑު ސަބަބަކީ ހޮރްމޫޒް ކަނޑު އޮޅި ބަންދުވެފައި އޮތުމުން ކަމަށާއި، އެތަން ހުޅުވުމަކީ ވަރަށް ނުރައްކާތެރި ކަމާ އެކު ކުރެވިދާނެ އަސްކަރީ މަސައްކަތެއް ކަމަށެވެ. ނަމަވެސް އެކަން ކުރަން ނޭޓޯގެ ޤައުމު ތަކުން ފަސް ޖެހޭތީ، އެއީ ފިނޑި ބައެއް ކަަމަށް ޓްރަމްޕް ވިދާޅުވި އެވެ. އަދި އެމެރިކާ އިން އެކަން ހަނދާން ބަހައްޓާނެ ކަމުގެ އިންޒާރު ވެސް ޓްރަމްޕް ވަނީ ދެއްވައިފަ އެވެ. 

ހޮރްމޫޒް ކަނޑު އޮޅި ހުޅުވުމަށް އަސްކަރީ މަނަވަރު ފޮނުވުމަށް ޓްރަމްޕް ގޮވާލެއްވި ގޮވާލެއްވުމަށް، ގިނަ ޤައުމު ތަކުން ވަނީ ދެކޮޅު ހަދައިފަ އެވެ. އަދި އަސްކަރީ މަނަރުތައް ނުފޮނުވާނެ ކަމަށް ވެސް އެ ޤައުމު ތަކުން ވަނީ ބުނެފަ އެވެ.