ސްރީ ލަންކާގެ ރައީސް ޑިސަނަޔަކެ ސާބިތު ކޮށްދެއްވީ، އެމެރިކާ އަށް ބޯ ނުލަނބާނެކަން

ސްރީ ލަންކާގެ ސިވިލް އެއާޕޯޓެއްގައި އެމެރިކާގެ ވައިގެ ދެ އުޅަނދު ޖެއްސުމުގެ ހުއްދަ އަކަަށް އެދިފައި ވަނިކޮށް، ލަންކާގެ ރައީސް އަނޫރާ ކުމާރަ ޑިސަނަޔަކެ އެ ފުރުސަތު ނުދެއްވަން ނިންމަވައިފި އެވެ. 

ހުކުރު ދުވަހު ލަންކާގެ ޤާނޫނު ހަދާ މަޖިލީހުގައި ވާހަކަ ދައްކަވަމުން އެ ޤައުމުގެ ރައީސް ޑިސަނަޔަކެ ވިދާޅުވީ، މާޗު މަހުގެ ހަތަރު ވަނަ ދުވަހުން ފެށިގެން، އަށް ވަނަ ދުވަހުގެ ނިޔަލަށް ސްރީ ލަންކާގެ ދެކުނުގައި އޮންނަ މައްތަލާ ރާޖަޕަކްސަން އިންޓަނޭޝަނަލް އެއާޕޯޓުގައި ވައިގެ އުޅަނދު ތަކެއް ޖެއްސުމުގެ ހުއްދަ އަށް އެމެރިކާ އިން އެދުނު ކަަމަށެވެ. 

އެމެރިކާ އިން އެ ހުއްދަ އަށް އެދިފައި ވަނީ ފެބްރުވަރީ މަހުގެ 26 ވަނަ ދުވަހު ކަމަށް ފާހަގަ ކުރައްވައި ޑިސަނަޔަކެ ވިދާޅުވީ، އެއީ އެމެރިކާ އިން އީރާންއާ ދެކޮޅަށް ހަނގުރާމަ ފެށުމުގެ އެންމެ ދެ ދުވަސް ކުރިން ކަމަށެވެ. އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފަށާފައި ވަނީ ފެބްރުވަރީ މަހުގެ 28 ވަނަ ދުވަހު އެވެ. 

ޤާނޫނު ހަދާ މަޖިލީހުގައި ޑިސަނަޔަކެ ވިދާޅުވީ، އެމެރިކާ އިން ބޭނުންވީ ޖިބޫތީގައި ހުންނަ އެމެރިކާގެ ބޭސް އަކުން އަށް ކަނޑު މަތީގެ މިސައިލް އެޅިފައިވާ ދެ ހަނގުރާމައިގެ ވައިގެ އުޅަނދު ގެންނަން ކަމަށެވެ. ނަމަވެސް، ސްރީ ލަންކާގެ ވަކި އަތަކަށް ނުޖެހޭ ސިޔާސަތު ދެމެހެއްޓުމުގެ ގޮތުން، އެ ހުށަހެޅުން ބަލައި ނުގަންނަން ނިންމީ ކަމަށް ޑިސަނަޔަކެ ވިދާޅުވި އެވެ. އެއާ އެކު، ޤާނޫނު ހަދާ މަޖިލީހުގެ މެމްބަރުން ވަނީ ޑިސަނަޔަކެ އަށް ވަރަށް ބޯޑަށް ތައުރީފު ކުރައްވައިފަ އެވެ. 

އެމެރިކާގެ ރައީސް ޑޮނަލްޑް ޓްރަމްޕް ވަނީ، ހަނގުރާމައިގައި އެކުވެރި ޤައުމު ތަކުން އެމެެރިކާ އަށް އެއްބާރުލުން ދޭން ޖެހޭ ކަމަށް ވިދާޅުވެފަ އެވެ. އެގޮތުން ހޮރްމޫޒް ކަނޑު އޮޅި ހުޅުވުމުގެ އަސްކަރީ އޮޕަރޭޝަން އަށް ޤައުމު ތަކުން މަނަވަރު ފޮނުވަން ޖެހޭ ކަމަށް ޓްރަމްޕް ވިދާޅުވި ނަމަވެސް، އެއްވެސް ޤައުމަކުން އެކަމަށް އިޖާބަދީފައި ނުވެ އެވެ. 

މީގެ ކުރިން ވެސް ލަންކާގެ ރައީސް ޑިސަނަޔަކެ ވިދާޅުވެފައި ވަނީ، ސްރީ ލަންކާގެ ސިޔާސަތަކީ ވަކި ފަރާތަކަށް ޖެހުމެއް ނެތް، މިނިވަން ސިޔާސަތެއް ކަމަށެވެ. ހަމަ އެއާ އެކު، ސްރީ ލަންކާ އިން އިންސާނިއްޔަތުގެ އަގުތަކާއި، އިންސާނިއްޔަތުކަން ދަމަހައްޓާނެ ކަމަށް ވެސް އެމަނިކުފާނު ވަނީ ވިދާޅުވެފަ އެވެ. މީގެ ކުރިން ވެސް އެ ޤައުމުން އަމަލު ކޮށްފައި ވަނީ ބައިނަލްއަޤުވާމީ މުއާހަދާ ތަކަށް އިޙުތިރާމް ކުރުމާ އެކު، ޤައުމުގެ އަބުރާއި ޤަދަރު ހިފެހެއްޓޭނެ ފަދަ ގޮތަކަށް ކަމަށް ވެސް ޑިސަނަޔަކެ ވިދާޅުވި އެވެ.