އީރާން އަލުން އާރާސްތު ކުރަން 10 އަހަރު ނަގާނެ، ވެރިކަން ބަދަލު ކުރާކަށް ނޫޅެން: ޓްރަމްޕް

އެމެރިކާ އާއި އިޒްރޭލުން އީރާނަށް އަމާޒުކޮށް ދެމުން އަންނަ ހަމަލާ ތަކުގެ ސަބަބުން އެ ޤައުމު އަލުން އާރާސްތު ކުރުމަށް 10 އަހަރު ދުވަސް ނަގާނެ ކަމަށާއި، އީރާންގެ ވެރިކަން ބަދަލު ކުރުމަކީ އެމެރިކާާގެ އަމާޒެއް ނޫން ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ހުކުރު ދުވަހު ޓްރަމްޕް ވިދާޅުވެފައި ވަނީ، އެމެރިކާ އިން އިތުރަށް އީރާނުގައި ތިބެއްޖެ ނަމަ، އަދި އެ ޤައުމަށް ދެމުން އަންނަ ހަމަލާތައް ދެމުން ގެންދާ ނަމަ، އީރާން އަލުން ބިނާ ކުރުމަށް 10 އަހަރު ދުވަސް ނަގާނެ ކަމަށެވެ. އަދި އީރާން އަލުން ބިނާ ކުރުމަކީ ކުރަން ފަސޭހަ ކަމަކަށް ނުވާނެ ކަމަށް ވެސް ޓްރަމްޕް ވިދާޅުވި އެވެ. 

ޓްރަމްޕް ވިދާޅުވީ އީރާންގެ ވެރިކަން ބަދަލު ކުރުމަކީ އެމެރިކާގެ މައިގަނޑު އަމާޒެއް ނޫން ކަމަށެވެ. އެންމެ މުހިންމު ކަމަކީ އީރާން އަށް ނިއުކްލިއާ ހަތިޔާރެއް ހޯދުމުގެ ޤާބިލުކަން ނެތި ކުރުން ކަމަށް ވެސް ޓްރަމްޕް ވަނީ ވިދާޅުވެފަ އެވެ. ނަމަވެސް، އީރާންގެ ވެރިކަން ކޮންޓްރޯލް ކުރަމުން އަންނަ ފަރާތް ތަކަށް، އެމެރިކާ އިން ނުފޫޒު ފޯރުވޭނެ ކަމަށް ޓްރަމްޕް ވިދާޅުވި އެވެ. 

އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން ސުވާލު ކުރުމުން ޓްރަމްޕް ވަނީ، ކުރިން ވެސް އޭނާ ވިދާޅުވާ ވާހަކަ ތަކުރާރު ކުރައްވައިފަ އެވެ. އެގޮތުން އީރާނުގެ ނިއުކްލިއާ ޕްރޮގްރާމް އެއްކޮށް ނައްތާލެވިފއިވާ ކަމަށް ޓްރަމްޕް ވިދާޅުވި އެވެ. އެކަމަކު، އަދި ވެސް އީރާންގައި ނިއުކްލިއާ ހުރި ކަމަށް ޓްރަމްޕް ފާހަގަ ކުރެއްވި އެވެ. 

އީރާނުގެ ވެރިކަން ބަދަލު ކުރުމަކީ އެމެރިކާގެ އަމާޒެއް ނޫން ކަމަށް ޓްރަމްޕް ވިދާޅުވި ނަމަވެސް، މީގެ ކުރިން އޭނާ ވަނީ އީރާންގެ ވެރިކަން ބަދަލު ކުރުމާ ގުޅޭ ގޮތުން ވާހަކަ ދައްކަވައިފަ އެވެ. އަދި އީރާނުގެ ވެރިކަމުގައި ހުންނަން ޖެހޭނީ އެމެރިކާ އާއި އޭނާ ވެސް ރުހޭ މީހެއް ކަމަށް ޓްރަމްޕް ވިދާޅުވެފައިވެ އެވެ. 

އީރާނުގެ ރޫހީ ލީޑަރުގެ މަޤާމަށް މުޖުތަބާ ޚާމަނާއީ އައްޔަން ކުރެއްވުމާ އެކު ވެސް، ޓްރަމްޕް ވަނީ އެކަމަށް ފާޑު ވިދާޅުވެފަ އެވެ. އެގޮތުން އެމެރިކާ އިން ޤަބޫލު ނުވާ މީހަކު ރޫހީ ލީޑަރުގެ މަޤާމަށް އައްޔަން ކުރި ނަމަވެސް، އެ މީހަކަށް މާ ގިނަ ދުވަހު މަގާމުގައި ނުހުންނެވޭނެ ކަމަށް ވެސް ޓްރަމްޕް ވިދާޅުވެފައިވެ އެވެ.