އީރާނުން އިޒްރޭލުގެ ތިންވަނަ އެފް-16 ޖެޓް ވައްޓާލައިފި

އީރާނުގެ މެދުތެރޭގެ ވައިގެ ސަރަހައްދުން އިޒްރޭލުގެ ތިންވަނަ ފައިޓަރ ޖެޓް ކަމަށްވާ އެފް-16 މަރުކާގެ ބޯޓެއް ކާމިޔާބުކަމާއެކު ވައްޓާލާފައިވާ ކަމަށް އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނެފިއެވެ.

ހޮނިހިރު ދުވަހު އައި.އާރް.ޖީ.ސީގެ ޕަބްލިކް ރިލޭޝަންސް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، އީރާނުގެ ސަރަހައްދަށް ވަދެގަތް އިޒްރޭލުގެ މި ފައިޓަރ ޖެޓަށް ހަމަލާދީފައިވަނީ ފަތިހުގެ ވަގުތެއްގައި ކަމަށެވެ. އަދި މި ބޯޓު ވައްޓާލާފައިވަނީ އީރާނުގެ ޒަމާނީ ވައިގެ ދިފާއީ ނިޒާމުތައް ބޭނުންކޮށްގެން ކަމަށްވެސް އެ ބަޔާނުގައި ފާހަގަކޮށްފައިވެއެވެ.

އެ ބަޔާނުގައިވާ ގޮތުން، ދުޝްމަނުންގެ 200 އަށްވުރެ ގިނަ އުޅަނދު މިހާތަނަށް ވަނީ ހަލާކުކޮށްލާފައެވެ. މީގެ ތެރޭގައި ޑްރޯންތަކާއި، ކްރޫޒް މިސައިލްތަކުގެ އިތުރުން ދުޝްމަނުންގެ ކުރިއަރާފައިވާ ފައިޓަރ ޖެޓްތައް ހިމެނޭއިރު، މިއީ އީރާނުގެ ވައިގެ ސަރަހައްދު ބެލެހެއްޓުމާއި ނުރައްކާތަކާ ކުރިމަތިލުމުގައި އައި.އާރް.ޖީ.ސީގެ ގާބިލުކަން އިތުރުވެފައިވާ މިންވަރު ހާމަކޮށްދޭ ކަމެއް ކަމަށްވެސް ބުނެފައިވެއެވެ.

އިޒްރޭލުގެ އެފް-16 މަރުކާގެ ބޯޓު ވައްޓާލުމަކީ، ބޭރުގެ އުދުވާންތަކުން އީރާނުގެ ވައިގެ ސަރަހައްދު ދިފާއުކުރުމަށް އެ ގައުމުން ވެފައިވާ ތައްޔާރީތަކާއި އަސްކަރީ ބާރުވެރިކަން ދައްކުވައިދޭ ކަމެކެވެ. މިކަމާ ގުޅިގެން އިޒްރޭލުގެ އަސްކަރިއްޔާއިން ވަނީ، އީރާނުގެ ދިފާއީ ނިޒާމުން ފޮނުވާލި ބިމުން ވައިގެ ތެރެއަށް އަމާޒުކުރާ މިސައިލަކުން އެ ގައުމުގެ ފައިޓަރ ޖެޓަކަށް ހަމަލާދީފައިވާކަމަށް އެއްބަސްވެފައެވެ.

އިޒްރޭލުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އެ ބޯޓަކީ އިޒްރޭލުން ހިފާފައިވާ ބިންތަކުގައި ހުރި އަސްކަރީ މަރުކަޒުތަކުން ފުރައިގެން އީރާނުގެ ވެރިރަށް ތެހެރާން ހިމެނޭ ސަރަހައްދުތަކަށް ވައިގެ ހަމަލާތަކެއް ދިނުމަށް ދިޔަ ބޯޓެއް ކަމަށެވެ.

މީގެ އިތުރުން، މި ހާދިސާގައި އެ ބޯޓު ދުއްވަން ތިބި ޕައިލެޓުން ސަލާމަތްވެފައިވާ ކަމަށްވެސް އިޒްރޭލުން ބުނެފައިވެއެވެ.

އެމެރިކާއާއި އިޒްރޭލުން އީރާނަށް އަމާޒުކޮށް ވައިގެ މަގުން އާ އުދުވާންތަކެއް ފަށާފައިވަނީ ފެބްރުއަރީ މަހުގެ 28 ވަނަ ދުވަހުއެވެ. މިއީ އެއްވެސް ކުރިމަތިލުމަކާ ނުލައި އެ ދެ ގައުމުން އީރާނަށް ދިން ހަމަލާތަކަށް އަށް މަސް ދުވަސް ފަހުން ދޭން ފެށި ހަމަލާތަކެކެވެ.

މި ހަމަލާތަކުގެ ރައްދުގައި އީރާނުން ދަނީ އިޒްރޭލުން ހިފާފައިވާ ބިންތަކަށާއި، ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ގިނަ އަދަދެއްގެ މިސައިލާއި ޑްރޯން ހަމަލާތައް ދެމުންނެވެ.