ސައުދީން އީރާނުގެ ޑިޕްލޮމެޓުން 24 ގަޑިއިރު ތެރޭ ފުރުމަށް އަމުރުކޮށްފި
ރިޔާޟްގައި ހުންނަ އީރާނު އެމްބަސީގެ ފަސް މުވައްޒަފަކު 24 ގަޑިއިރު ތެރޭގައި ގައުމުން ފޭބުމަށް ސައުދީ ސަރުކާރުން ވަނީ އަމުރުކޮށްފަ.
ތެހެރާންގައި ހުންނަ އީރާނުގެ ފޮރިން މިނިސްޓްރީގެ އިމާރާތުގެ ކޮންފަރެންސް ހޯލެއްގެ ދޮރުމަތީގައި، އީރާނުގެ ދިދައަކާއި ސައުދީ އަރަބިއްޔާގެ ގައުމީ ދިދައެއްގެ ކައިރީގައި ސައުދީގެ އޮފިޝަލަކު މަޑުކޮށްލައިގެން. މި ފޮޓޯ ނަގާފައިވަނީ 2023 ވަނަ އަހަރުގެ ޖޫން މަހުގެ 17 ވަނަ ދުވަހު. | ގެޓީ އިމޭޖަސް
ސައުދީގައި ހުންނަ އީރާނު އެމްބަސީގެ ބައެއް މުވައްޒަފުންނަކީ އެ ގައުމަށް ބޭނުންނުވާ "ޕާސޯނާ ނޮން ގްރާޓާ" މީހުންގެ ގޮތުގައި ކަނޑައަޅައި، 24 ގަޑިއިރު ތެރޭގައި ގައުމުން ފޭބުމަށް ސައުދީ އަރަބިއްޔާއިން ހޮނިހިރު ދުވަހު އަމުރުކޮށްފިއެވެ.
ސައުދީ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، ރިޔާޟްގައި ހުންނަ އީރާނު އެމްބަސީގެ މިލިޓަރީ އެޓޭޗޭ އާއި އޭނާގެ އެހީތެރިޔާގެ އިތުރުން، އެ ޑިޕްލޮމެޓިކް މިޝަންގެ އިތުރު ތިން މުވައްޒަފަކު ގައުމުން ފުރުމަށް އަންގާފައިވާ ކަމަށެވެ.
ސައުދީ އަރަބިއްޔާއަށާއި، ގަލްފް ކޯޕަރޭޝަން ކައުންސިލް (ޖީ.ސީ.ސީ) ގެ ގައުމުތަކުގެ އިތުރުން އަރަބި އަދި އިސްލާމީ ގައުމުތަކަށް އީރާނުން ދެމުންދާ "ބޮޑެތި ހަމަލާތައް" އެ ވުޒާރާއިން ވަނީ ކުށްވެރިކޮށްފައެވެ.
އީރާނުން މެދުނުކެނޑި ސައުދީގެ ބިންތަކަށާއި، އާންމު އުމްރާނީ ވަސީލަތްތަކަށާއި، އިގްތިސާދީ މަސްލަހަތުތަކުގެ އިތުރުން ޑިޕްލޮމެޓިކް އިމާރާތްތަކަށް އަމާޒުކޮށް ދެމުންދާ ހަމަލާތަކަކީ ބައިނަލްއަގުވާމީ ގާނޫނުތަކާއި، އަވަށްޓެރިކަމުގެ އުސޫލުތަކާއި، ގައުމުތަކުގެ މިނިވަންކަމަށް އިހުތިރާމްކުރުމުގެ އުސޫލުތަކާ ކަނޑައެޅިގެން ޚިލާފު ކަމެއް ކަމަށް ސައުދީ ޚާރިޖީ ވުޒާރާއިން ބުނެފައިވެއެވެ.
މިފަދަ އަމަލުތަކަކީ 2023 ވަނަ އަހަރު ޗައިނާ މެދުވެރިވެގެން ސައުދީ އާއި އީރާނާ ދެމެދު ގުޅުން ގާއިމުކުރުމަށް އެއްބަސްވި "ބެއިޖިން އެގްރީމަންޓް" އާއި، އދ. ގެ ސަލާމަތީ މަޖިލީހުގެ ގަރާރު 2817 (2026) އާ ޚިލާފު އަމަލުތަކެއް ކަމަށް އެ ވުޒާރާއިން ފާހަގަކުރިއެވެ.
އީރާނުން ދެމުންދާ ހަމަލާތައް ހުއްޓާނުލައިފިނަމަ، މަސްރަހު އިތުރަށް ގޯސްވެ، ދެ ގައުމުގެ މިހާރުގެ ގުޅުމަށާއި މުސްތަގުބަލުގެ ގުޅުމަށް އޭގެ ނޭދެވޭ އަސަރު ކުރާނެ ކަމުގެ އިންޒާރު މި މަހުގެ ކުރީކޮޅު ސައުދީ އަރަބިއްޔާއިން ވަނީ ދީފައެވެ.
އދ. ގެ ޗާޓަރުގެ 51 ވަނަ މާއްދާއިން ގައުމުތަކަށް ލިބިދޭ އަމިއްލަ ނަފްސުގެ ދިފާއުގައި މަސައްކަތް ކުރުމުގެ ހައްގުގެ ދަށުން، ސައުދީގެ ސިޔާދަތާއި، ސަލާމަތާއި، ބިމުގެ ނަޒާހަތްތެރިކަން ހިމާޔަތްކުރުމަށާއި، ރައްޔިތުންނާއި ގައުމުގައި ދިރިއުޅޭ މީހުންނާއި އިގްތިސާދީ މަސްލަހަތުތައް ރައްކާތެރިކުރުމަށް އަޅަންޖެހޭ ކޮންމެ ފިޔަވަޅެއް އެޅުމަށް "ފަސްނުޖެހޭނެ" ކަމަށް ޚާރިޖީ ވުޒާރާއިން ބަޔާންކޮށްފައިވެއެވެ.
ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިޒްރޭލު ގުޅިގެން އީރާނަށް ދިން ޣައިރު ގާނޫނީ ހަމަލާތަކެއްގައި އެ ގައުމުގެ އެންމެ މަތީ ލީޑަރު އަވަހާރަވުމާ ގުޅިގެން، އީރާނުން ބަދަލު ހިފުމުގެ ވަރުގަދަ ހަމަލާތަކެއް ދިނުމާ ގުޅިގެން މެދުއިރުމަތީގައި ވަނީ ނުރައްކާތެރި ހަނގުރާމައެއް ފެށި، އެކަމުގެ އަސަރު މުޅި ދުނިޔެއަށް ފެތުރިފަ އެވެ.
