އެމެރިކާއަށް ހަތިޔާރު އެކްސްޕޯޓްކުރުން ހުއްޓާލުމަށް ސުވިޒަލޭންޑް ސަރުކާރުން ނިންމައިފި
އަސްކަރީ ގޮތުން ވަކި ފަރާތަކަށް ނުޖެހުމަށް ގެންގުޅޭ ސިޔާސަތުގެ ދަށުން، އެމެރިކާއަށް ހަތިޔާރު އެކްސްޕޯޓް ކުރުމުގެ ހުއްދަތައް ދޫކުރުން ސުވިޒަލޭންޑުން ވަނީ ހިފަހައްޓާފައި. މި ނިންމުމާ ގުޅިގެން އީރާނާ ދެކޮޅަށް ކުރާ ހަނގުރާމައާ ގުޅުންހުރި އުދުހުންތަކަށް އެމެރިކާއިން އެދުނު ބައެއް ހުއްދަތަކަށް ވެސް އެ ގައުމުން ވަނީ އިންކާރުކޮށްފައި. ސުވިޒަލޭންޑް ސަރުކާރުން ބުނި ގޮތުގައި އިޒްރޭލަށް ހަތިޔާރު ފޮނުވުން ހުއްޓާލާފައިވާތާ މިހާރު ގިނަ އަހަރުތަކެއް ވެފައިވާއިރު، އެމެރިކާއަށް މުދާ އެކްސްޕޯޓް ކުރުމާ ގުޅޭ ކަންކަން މާހިރުންގެ ޓީމަކުން ދަނީ ގަވާއިދުން މުރާޖައާ ކުރަމުން.
އިރާންގެ ތެހެރާނަށް އިޒްރޭލާއި އެމެރިކާ އިން ދިން ހަމަލާތަކާ އެކު 2026 މާރިޗު 02 ވަނަ ދުވަހު އެ ސިޓީގެ ސަރަހައްދުތަކުން ދުން އަރަމުންދާ މަންޒަރު ފެންނަ ފޮޓޯއެއް. | ގެޓީ އިމޭޖަސް
އެމެރިކާއަށް ހަތިޔާރު އެކްސްޕޯޓްކުރުން ހުއްޓާލުމަށް ސުވިޒަލޭންޑް ސަރުކާރުން ނިންމައިފި އެވެ.
އަސްކަރީ ގޮތުން ވަކި ފަރާތަކަށް ނުޖެހުމަށް ގެންގުޅޭ ދިގު މުއްދަތުގެ ސިޔާސަތަށް ރިއާޔަތްކޮށް، އެމެރިކާއަށް ހަތިޔާރު އެކްސްޕޯޓް ކުރުމަށް ދޫކުރާ ހުއްދަތައް ސުވިޒަލޭންޑުން ހިފަހައްޓާފައިވާ ކަމަށް އަލްޖަޒީރާ އިން ވަނީ ރިޕޯޓުކޮށްފައި.
ސުވިޒަލޭންޑް ސަރުކާރުން ބުނި ގޮތުގައި، އީރާން ހަނގުރާމަ ފެށުނު ފަހުން އެމެރިކާއަށް ހަނގުރާމަވެރި ސާމާނު އެކްސްޕޯޓް ކުރުމުގެ އެއްވެސް އާ ހުއްދައެއް ދޫކޮށްފައެއް ނުވެއެވެ. އަދި އިޒްރޭލަށްހަތިޔާރު އެކްސްޕޯޓް ކުރުމުގެ އެއްވެސް ހުއްދައެއް ނުދޭތާ މިހާރު އެތައް އަހަރެއް ވެފައިވާ ކަމަށްވެސް އެ ސަރުކާރުން ބުނެއެވެ.
އެ ގައުމުގެ ސަރުކާރުން ހާމަކުރި ގޮތުގައި، ކަމާބެހޭ މާހިރުންގެ ޓީމަކުން އެމެރިކާއަށް މުދާ އެކްސްޕޯޓް ކުރުމާ ގުޅޭ ކަންކަން ގަވާއިދުން މުރާޖައާ ކުރަމުންދާނެއެވެ. އަދި ވަކި ފަރާތަކަށް ނުޖެހުމުގެ ގާނޫނުގެ ދަށުން އަޅަންޖެހޭ ފިޔަވަޅުތައް އެޅުމާ މެދު އެ ޓީމުން ގޮތްތައް ނިންމާނެއެވެ.
ނިމިދިޔަ ހަފުތާ ބަންދުގައި، އީރާން ހަނގުރާމައާ ގުޅުންހުރި އުދުހުންތަކަށް އެމެރިކާއިން އެދުނު ދެ ހުއްދައަކަށް ސުވިޒަލޭންޑުން ވަނީ އިންކާރުކޮށްފައެވެ. ނަމަވެސް، ވަކި ފަރާތަކަށް ނުޖެހުމުގެ ގާނޫނަށް ރިއާޔަތްކޮށް، އެހެން ތިން އުދުހުމަކަށް އެ ގައުމުން ވަނީ ހުއްދަ ދީފައެވެ. 2023 ވަނަ އަހަރު އެމެރިކާ އިސްވެ އޮވެ އިރާގަށް އެރި ހާދިސާއާ ގުޅިގެން ވެސް، ސުވިޒަލޭންޑުގެ ވައިގެ ސަރަޙައްދު ބޭނުންކުރުމާއި ހަނގުރާމައިގައި ބައިވެރިވި ގައުމުތަކަށް ހަތިޔާރު އެކްސްޕޯޓްކުރުން އެ ގައުމުން މަނާކުރިއެވެ. ނަމަވެސް ފަހުން އެ މަނާކުރުންތައް ވަނީ އުވާލާފައެވެ.
