ވުލްވްސްއާ އެއްވަރުވެ، އާސެނަލް އަށް ލީޑު ފުޅާ ނުކުރެވުނު
މިވަގުތު އެއް ވަނައިގައި އާސެނަލް އޮތީ 27 މެޗުން 58 ޕޮއިންޓާ އެކު. އާސެނަލް އަށް ވުރެ އެއް މެޗު މަދުން ކުޅެގެން ދެ ވަނައިގައި މެންޗެސްޓަރ ސިޓީ އަށް 53 ޕޮއިންޓު ލިބޭއިރު، މެޗުގެ އަދަދު ހަމަކޮށް ދެ ޕޮއިންޓަށް ފަރަގު ކުޑަ ކުރުމުގެ ފުރުސަތު ސިޓީ އަށް އޮންނާނެ.
މެޗުގައި ލަނޑު ޖެހުމަށް ފަހު ވުލްވްސްގެ ކުޅުންތެރިން އުފާ ފާޅު ކުރަނީ | ރޮއިޓާސް
އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ކުޅުނު މެޗުން އެއްވަރުވެ، ލީޑު ފުޅާ ކުރަން ލިބުނު ފުރުސަތު އަނެއްކާ ވެސް އާސެނަލް އިން ނަގާލައިފި އެވެ.
ވުލްވްސްގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި އާސެނަލް އިން ދެ ލަނޑު ޖަހައިގެން ކުރި ހޯދާފައި ވަނިކޮށް، ވުލްވްސް އިން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.
މެޗު ފަށައިގެން ފަސް ވަނަ މިނެޓުގައި އާސެނަލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އާސެނަލް އަށް ޖަހައިދިނީ ބުކަޔޯ ސަކާ އެވެ. އެއީ ޑެކްލަން ރައިސް ތަނަަވަސްކޮށްދިން ފުރުސަތެއްގައި ސަކާ ޖެހި ލަަނޑެކެވެ. އޭގެ ފަހުން މެޗުގެ ދެ ވަނަ ހާފު ފަށައިގެން އެގާރަ ވަނަ މިނެޓުގައި އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ޕިއެރޯ ހިކަންޕީ އެވެ. އެއީ ގަބްރިއެލް މަގާޅައެސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
އާސެނަލް އިން ދެ ވަނަ ލަނޑު ޖެހިތާ ފަސް މިނެޓު ފަހުން ވުލްވްސް އިން ވަނީ ފުރަތަމަ ލަނޑު ޖަހައި ފަރަގު ކުޑަ ކޮށްފަ އެވެ. އެ ލަނޑު ވުލްވްސް އަށް ޖަހައިދިނީ ހޫގޯ ބުއެނޯ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ވުލްވްސް އަށް ނަތީޖާ ހަމަހަމަވީ އާސެނަލްގެ ރިކާޑޯ ކަލަފިރޯތީ އަތުން ބައި ކޮޅަށް ވަތް ލަނޑުންނެވެ. މެޗުގައި ކަލަފިއޯރީ ކުޅެން ނިކުތީ ވެސް މެޗުގެ ފަހު ވަގުތުގެ ތެރެގަ އެވެ.
މެޗު އެއްވަރުވެ، އެއް ވަަނައިގައި އާސެނަލް ދަމަހައްޓަމުން އައި ލީޑު ވަނީ ކުޑަވެފަ އެވެ. މިވަގުތު އެއް ވަނައިގައި އާސެނަލް އޮތީ 27 މެޗުން 58 ޕޮއިންޓާ އެކު އެވެ. އާސެނަލް އަށް ވުރެ އެއް މެޗު މަދުން ކުޅެގެން ދެ ވަނައިގައި މެންޗެސްޓަރ ސިޓީ އަށް 53 ޕޮއިންޓު ލިބޭއިރު، މެޗުގެ އަދަދު ހަމަކޮށް ދެ ޕޮއިންޓަށް ފަރަގު ކުޑަ ކުރުމުގެ ފުރުސަތު ސިޓީ އަށް އޮންނާނެ އެވެ.
