އެފްއޭ ކަޕް: މެންސްފީލްޑް ޓައުން ބަލިކޮށް އާސެނަލް ކުއާޓާ ފައިނަލް އަށް

އިނގިރޭސި އެފްއޭ ކަޕްގެ ގަދަ 16 ވަނަ ބުރުގައި މެންސްފީލްޑް ޓައުންއާ ދެކޮޅަށް ކުޅުނު މެޗުން މޮޅުވެ، އާސެނަލް އިން މުބާރާތުގެ ކުއާޓާ ފައިނަލްގެ ޖާގަ ހޯދައިފި އެވެ.

ހޮނިހިރު ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 2-1 އިންނެވެ. މެޗުގައި އާސެނަލް އިން ލަނޑު ޖަހައި ކުރި ހޯދާފައި ވަނިކޮށް، މެންސްފީލްޑް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަހައިގެން އާސެނަލް ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް އާސެނަލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އާސެނަލް އަށް ޖަހައިދިނީ ނޯނީ މަޑުއޭކޭ އެވެ. އެއީ ގަބްރިއެލް މާޓިނެލީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި މެންސްފީލްޑް އިން ނަތީޖާ ހަމަހަމަ ކުރީ ވިލް އިވާންސް ޖެހި ލަނޑުންނެވެ. ނަމަވެސް އާސެނަލް އިން ވަނީ ރަނގަޅަށް ކުޅެ ދެ ވަނަ ލަނޑެއް ޖަހައިގެން މެޗުން މޮޅުވެފަ އެވެ. މެޗުގެ 66 ވަނަ މިނެޓުގައި އާސެނަލް އަށް އެ ލަނޑު ޖަހައިދިނީ އެބްރެޗީ އެޒޭ އެވެ.

މޮޅާ އެކު އާސެނަލް އިން މުބާރާތުގެ ކުއާޓާ ފައިނަލްގެ ޖާގަ ހޯދިއިރު، މި ސީޒަންގައި އާސެނަލް އިން އަންނަނީ ރަނގަޅު ކުޅުމެއް ދައްކަމުންނެވެ. އެގޮތުން އިނގިރޭސި ޕްރިމިއާ ލީގު ތާވަލްގެ އެއް ވަނައިގައި އާސެނަލް އޮތްއިރު، ޔުއެފާ ޗެމްޕިއަންސް ލީގުގެ ގަދަ 16 އިން ވެސް އެ ޓީމު ވަނީ ޖާގަ ހޯދައިފަ އެވެ.