ޗެކް ރިޕަބްލިކް ގައި ހުންނަ އިޒްރޭލުގެ ހަތިޔާރު ފެކްޓަރީގައި ރޯކޮށްލައިފި

އިޒްރޭލުގެ ހަތިޔާރު އުފައްދާ އެންމެ ބޮޑު ކުންފުނި ކަމަށްވާ އެލްބިޓް ސިސްޓަމްސްއާ ގުޅުން ހުރި، ޗެކް ރިޕަބްލިކްގައި ހުންނަ ފެކްޓްރީއެއްގައި ރޯކޮށްލައިފިއެވެ. މި ހަމަލާގެ ޒިންމާ އަަންޑަގްރައުންޑް ގްރޫޕަކުން މިހާރު ވަނީ އުފުލާފައެވެ.

މި ހާދިސާއާ ގުޅިގެން ޗެކް ރިޕަބްލިކްގެ ކަމާބެހޭ އިދާރާތަކުން ތަހުގީގު ފަށާފައިވާއިރު، ފުލުހުން ބުނީ މިއީ ޓެރަރިޒަމާ ގުޅުން ހުރި އަމަލެއްތޯ ބަލަމުންދާ ކަމަށެވެ.

ހުކުރު ދުވަހުގެ ފަތިހުގެ ވަގުތެއްގައި ދިން މި ހަމަލާގައި، ޗެކް ރިޕަބްލިކްގެ ކުންފުންޏަކާއި އިޒްރޭލުގެ އެލްބިޓް ސިސްޓަމްސް ގުޅިގެން ހިންގާ އެ ސަރަހައްދުގައި ހުރި ބައެއް އިމާރާތްތައް ވަނީ އެއްކޮށް އަނދާ ހުލިވެފައެވެ.

އެލްބިޓް ސިސްޓަމްސްއަކީ އިޒްރޭލުން ޣައްޒާ އާއި އީރާނާ ދެކޮޅަށް ކުރަމުންދާ ހަނގުރާމަތަކުގައި ބޭނުންކުރާ އެއްގަމާއި ވައިގެ ހަތިޔާރު ފޯރުކޮށްދޭ މައިގަނޑު ކުންފުންޏެވެ.

މި ހަމަލާގެ ޒިންމާ އުފުލި "ދަ އާތުކުއޭކް ފެކްޝަން" ނަމަކަށް ކިޔާ ގްރޫޕަކުން ޓެލެގްރާމްގައި ބުނީ، އެ ސަރަހައްދަކީ އިޒްރޭލުގެ ހަތިޔާރު އުފައްދާ އެންމެ ބޮޑު ކުންފުނިން ޔޫރަޕްގައި ހިންގާ އޮޕަރޭޝަންތަކުގެ މަރުކަޒު ކަމަށާއި، މިހާރު އެތަން ވަނީ އަނދާހުލިވެފައި ކަމަށެވެ.

އެ ގްރޫޕުން އިތުރަށް ބުނީ، އިޒްރޭލުގެ އަމަލުތަކަށް އެހީތެރިވާ ބައިނަލްއަގުވާމީ ސަރުކާރުތަކުގެ ކިބައިން އާދޭސްކުރާނެ ވަގުތެއް މިހާރު ނެތް ކަމަށާއި، މީހުން މެރުމަށް އެ ފަރާތްތަކުން ބޭނުންކުރާ ވަސީލަތްތައް ނައްތާލުމަށްޓަކައި އަޅަންޖެހޭ ފިޔަވަޅުތައް އެ ގްރޫޕުން އަޅަމުންދާނެ ކަމަށެވެ.