އިންޑިއާގެ އެއާލައިންތަކުން ތެލުގެ އަގު ބޮޑުވުމާ ގުޅިގެން ބައެއް ދަތުރުތައް ހުއްޓާލަން ޖެހިދާނެ ކަމުގެ އިންޒާރު ދީފި
މި ހާލަތުން އަރައިގަތުމަށްޓަކައި ޓިކެޓްގެ އަގުތަކަށް ކަނޑައަޅާފައިވާ މަތީ ލިމިޓް އުވާލުމަށް އެދިފައިވާއިރު، ތެލުގެ އަގަށް އަންނަ ކޮންމެ ބަދަލަކާއެކު އެއާލައިންތަކުގެ އޮޕަރޭޝަނަލް ޚަރަދުތައް އެތައް މިލިއަން ޑޮލަރަކުން އިތުރުވަމުންދާކަން އެ ފަރާތްތަކުން ފާހަގަކުރޭ.
ޔުނައިޓެޑް ކިންގްޑަމްގެ ލަންޑަން ހީތުރޯ އެއާޕޯޓުގެ ރަންވޭއަށް ޖެއްސުމަށްޓަކައި އެއާ އިންޑިއާގެ އެއާބަސް A350-900 މަރުކާގެ ބޯޓެއް ދަތުރުކުރަނިކޮށް ނަގާފައިވާ ފޮޓޯ އެއް. | ގެޓީ އިމޭޖަސް
އިންޑިއާގެ އެއާލައިންތަކުން ތެލުގެ އަގު ބޮޑުވުމާ ގުޅިގެން ބައެއް ދަތުރުތައް ހުއްޓާލަން ޖެހިދާނެ ކަމުގެ އިންޒާރު ދީފިއެވެ.
އިންޑިގޯ، އެއާ އިންޑިއާ އަދި ސްޕައިސްޖެޓް ތަމްސީލުކުރާ ފެޑަރޭޝަން އޮފް އިންޑިއަން އެއާލައިންސް އިން ވަނީ، ތެލުގެ އަގު އިންތިހާއަށް އުފުލެމުންދާތީ ބައެއް މަންޒިލްތަކަށް ކުރާ ދަތުރުތައް ހުއްޓާލުމާއި، އައު ބޯޓުތައް ފްލީޓަށް އިތުރުކުރުން ލަސްކުރަން ޖެހިދާނެ ކަމަށް ބުނެ އިންޑިއާ ސަރުކާރަށް އިންޒާރު ދީފައެވެ.
އެ ފެޑަރޭޝަނުން ސަރުކާރަށް ފޮނުވި ސިޓީއެއްގައި ވަނީ، މިދިޔަ ޑިސެމްބަރު މަހު ސަރުކާރުން ކަނޑައެޅި ޓިކެޓްގެ އަގުތަކުގެ މަތީ ލިމިޓް ނުވަތަ "ފެއާ ކެޕްސް" އުވާލުމަށް އެދިފައެވެ.
ރޮއިޓާސް އިން ރިޕޯޓްކޮށްފައިވާ ގޮތުގައި، އިންޑިއާގެ އެއާލައިންތަކަށް އާމްދަނީގެ ގޮތުން ބޮޑެތި ގެއްލުންތަކެއް ވަމުންދާއިރު، އޮޕަރޭޝަނަލް ޚަރަދުތައް ވެސް ވަނީ ވަރަށް ބޮޑަށް އިތުރުވެފައެވެ.
ރޮއިޓާސްއަށް ފެނިފައިވާ އެ ސިޓީގައި ބަޔާންކޮށްފައިވާ ގޮތުގައި، މިހާރު އޮތް ހާލަތު މިގޮތަށް ކުރިއަށްދާނަމަ އެއާލައިންތަކަށް މާލީ ގޮތުން ބޮޑެތި ގެއްލުންތަކަކާ ކުރިމަތިލާން ޖެހޭނެއެވެ. އަދި މީގެ ސަބަބުން ބައެއް އެއާލައިންތައް ހިންގުމަށް ދަތިވެ، އެ ކުންފުނިތަކުގެ ދެމިއޮތުމަށް ވެސް ނުރައްކާވެދާނެ ކަމަށް އެ ސިޓީގައި ފާހަގަކޮށްފައިވެއެވެ.
އެޗް.އެސް.ބީ.ސީގެ އެނަލިސްޓުން އަންދާޒާކުރާ ގޮތުގައި، ތެޔޮ ފީފާއެއްގެ އަގަށް އަންނަ ކޮންމެ 1 ޑޮލަރުގެ ބަދަލަކާއެކު، އިންޑިގޯ އެއާލައިންގެ އަހަރީ ތެލުގެ ޚަރަދު ގާތްގަނޑަކަށް 3 ބިލިއަން ރޫޕީސް (32 މިލިއަން ޑޮލަރު) އަށް އިތުރުވެގެންދާނެއެވެ.
