ބޯންމައުތުން ޔުނައިޓެޑާ އެއްވަރު ކޮށްފި

އިނގިރޭސި ޕްރިމިއަރ ލީގުގައި ބޯންމައުތާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު އެއްވަރު ވެއްޖެ އެވެ. 

ބޯންމައުތުގެ އަމިއްލަ ދަނޑުގައި ހުކުރު ދުވަހުގެ ރޭ ދަންވަރު ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ޔުނައިޓެޑުން ދެ ފަހަރެއްގެ މަތިން ލީޑު ނެގިއިރު ވެސް، ބޯންމައުތުން ވަނީ ނަތީޖާ ހަމަހަމަ ކޮށްފަ އެވެ. މެޗުގައި ދެ ޓީމުން ވެސް ލަނޑުތައް ޖެހީ ދެ ވަނަ ހާފުގަ އެވެ.

މެޗުގެ ދެ ވަނަ ހާފުގެ 61 ވަނަ މިނެޓުގައި ޔުނައިޓެޑަށް ލިބުނު ޕެނަލްޓީ ކާމިޔާބުކޮށް އެ ޓީމަށް ލީޑު ނަގައިދިނީ ކެޕްޓަން ބްރޫނޯ ފެނާންޑޭސް އެވެ. އެއީ ބޯންމައުތުގެ އޭރިޔާ ތެރެއިން ޔުނައިޓެޑުގެ މަތެއުސް ކުންހާ އަށް ކުރި ފައުލަކާ ގުޅިގެން ދިން ޕެނަލްޓީ އެކެވެ. ނަމަވެސް އޭގެ ހަ މިނެޓު ފަހުން ބޯންމައުތަށް ނަތީޖާ ހަމަހަމަ ކޮށްދިނީ ރްޔާން ކްރިސްޓީ އެވެ.

މެޗުގެ 71 ވަނަ މިނެޓުގައި ދެ ވަނަ ފަހަރަށް ޔުނައިޓެޑަށް ލީޑު ލިބުނީ ބޯންމައުތުގެ ޑިފެންޑަރު ޖޭމްސް ހިލް އަތުން ބައި ކޮޅަށް ވަތް ލަނޑުންނެވެ. އެއީ ޔުނައިޓެޑަށް ލިބުނު ކޯނަރެއްގައި ފެނާންޑޭސް ނެގި ބޯޅަ އޭނާގެ ބޮލުގައި ޖެހި ގޯލަށް ވަދެގެންނެވެ. ދެ ވަނަ ފަހަރަށް ބޯންމައުތުން ނަތީޖާ ހަމަހަމަ ކުރީ މެޗުގެ 81 ވަނަ މިނެޓުގައި ލިބުނު ޕެނަލްޓީ އިންނެވެ. ޕެނަލްޓީ ކާމިޔާބުކޮށް އެ ޓީމަށް ނަތީޖާ ހަމަހަމަ ކޮށްދިނީ އެލި ޖޫނިއާ ކްރޫޕީ އެވެ.

މެޗުން މޮޅުވެ ތިން ވަނައިގައި ލީޑު ފުޅާ ކުރުމުގެ ފުރުސަތު ޔުނައިޓެޑަށް އޮތް ނަަމަވެސް، މެޗު އެއްވަރުގެ ތިން ވަނައިގައި އެ ޓީމު އޮތީ މިހާތަނަށް ކުޅެފައިވާ 31 މެޗުން 55 ޕޮއިންޓާ އެކު އެވެ. ޔުނައިޓެޑަށް ވުރެ އެއް މެޗު މަދުން ކުޅެގެން ހަތަރު ވަނައިގައި އެސްޓަން ވިލާ އަށް ލިބެނީ 51 ޕޮއިންޓެވެ.