އެސްޓަން ވިލާ ބަލިކޮށް، ޔުނައިޓެޑު ތިން ވަނަ އަށް

އިނގިރޭސި ޕްރިމިއާ ލީގުގައި އެސްޓަން ވިލާ އަތުން ހޯދި މުހިންމު މޮޅާ އެކު، މެންޗެސްޓަރ ޔުނައިޓެޑުން ލީގު ތާވަލްގެ ތިން ވަނަ މަގާމަށް ޖެހިލައިފި އެވެ.

ޔުނައިޓެޑުގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގެ ދެ ވަނަ ހާފުގައި ޔުނައިޓެޑުން ލީޑު ނަގާފައި ވަނިކޮށް، އެސްޓަން ވިލާ އިން ނަތީޖާ ހަމަހަމަ ވެސް ކުރި އެވެ. ނަމަވެސް، އިތުރު ދެ ލަނޑު ޖަހައިގެން ޔުނައިޓެޑު ވަނީ މެޗުން މޮޅުވެފަ އެވެ.

މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ޔުނައިޓެޑަށް ލީޑު ނަގައިދިނީ ކަސެމީރޯ އެވެ. އެއީ ކެޕްޓަން ބްރޫނޯ ފެނާންޑޭސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެެކެވެ. އޭގެ ފަހުން މެޗުގެ 64 ވަނަ މިނެޓުގައި އެސްޓަން ވިލާ އަށް ނަތީޖާ ހަމަހަމަ ކޮށްދިނީ ރޮސް ބާކްލޭ އެވެ.

މެޗުގައި ދެ ވަނަ ފަހަރަށް ޔުނައިޓެޑުން ލީޑު ނެގީ 71 ވަނަ މިނެޓުގައި މަތުއުސް ކުންހާ ޖެހި ލަނޑުންނެވެ. އެ ލަނޑު ޖަހަން އޭނާ އަށް ވެސް ފުރުސަތު ތަނަވަސްކޮށްދިނީ ފެނާންޑޭސް އެވެ. އޭގެ ފަހުން މެޗުގެ 81 ވަނަ މިނެޓުގައި ބެންޖަމިން ސެސްކޯ ވަނީ ޔުނައިޓެޑުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. 

މޮޅާ އެކު ޔުނައިޓެޑު ތިން ވަނައިގައި އޮތީ، މިހާތަނަށް ލީގުގައި ކުޅެފައިވާ 30 މެޗުން 54 ޕޮއިންޓާ އެކު އެވެ. ޔުނައިޓެޑު އަތުން ބަލިވި އެސްޓަން ވިލާ އޮތީ 30 މެޗުން 51 ޕޮއިންޓާ އެކު ހަތަރު ވަަނައިގަ އެވެ.