އެމެރިކާއާއި އިޒްރޭލުން ގުޅިގެން ދިން ހަމަލާއެއްގައި އައިއާރުޖީސީގެ ތަރުޖަމާނު ޝަހީދުކޮށްލައިފި
20 މާރިޗު 2026 | ހުކުރު 13:51އެމެރިކާއާއި އިޒްރޭލުން ގުޅިގެން ދިން ޓެރަރިސްޓް ހަމަލާއެއްގައި އައިއާރުޖީސީގެ ތަރުޖަމާނު ބްރިގޭޑިއާ ޖެނެރަލް އަލީ މުޙައްމަދު ނާއިނީ ޝަހީދުކޮށްލުމާ ގުޅިގެން، އެ ޖަމާއަތުން އެކަން ހަރުކަށި އިބާރާތުން ވަނީ ކުށްވެރިކޮށް ބަދަލު ހިފާނެ ކަމަށް ބުނެފައި.
ބްރިގޭޑިއަރ ޖެނެރަލް އަލީ މުޙައްމަދު ނާއިނީ | ތަސްނީމް ނިއުސް އޭޖެންސީ
ބަރަކާތްތެރި ރަމަޟާން މަހުގެ ފަހު ވަގުތުކޮޅުގެ ތެރޭގައި، އެމެރިކާއާއި އިޒްރޭލުން ގުޅިގެން ދިން ނުރައްކާތެރި ޓެރަރިސްޓް ހަމަލާއެއްގައި، އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ރަސްމީ ތަރުޖަމާނު ބްރިގޭޑިއާ ޖެނެރަލް އަލީ މުޙައްމަދު ނާއިނީ ޝަހީދުވެފައިވާކަން އީރާނުން އިއުލާންކޮށްފިއެވެ.
އައިއާރުޖީސީން ނެރުނު ބަޔާނެއްގައި، ދައުލަތަކުން އިސްވެ އޮވެ ހިންގި މި ޓެރަރިސްޓް އަމަލަކީ ފިނޑި އަމަލެއްގެ ގޮތުގައި ކުށްވެރިކޮށްފައިވެއެވެ. އަދި މި ހަމަލާގެ ބަދަލު ހިފާނެ ކަމަށް ވަޢުދުވެ، އިސްތިއުމާރީ ބާރުތަކުގެ އުދުވާނާ ދެކޮޅަށް ކުރާ މަސައްކަތުގައި ސާބިތުވެ ތިބޭނެކަން އެ ޖަމާއަތުން ވަނީ އަލުން ކަށަވަރުކޮށްދީފައެވެ.
އައިއާރުޖީސީގެ ރަސްމީ ބަޔާނުގައި ބުނެފައިވަނީ:
"ބަރަކާތްތެރި ރަމަޟާން މަހުގެ އެންމެ ފަހު ދުވަހުގެ ފަތިހުގެ ވަގުތެއްގައި، އެމެރިކާއާއި ޒަޔަނިސްޓް ދުޝްމަނުން ދިން ލާއިންސާނީ ޓެރަރިސްޓް ހަމަލާގައި، މީޑިއާގެ ދާއިރާގެ ހިތްވަރުގަދަ މުޖާހިދު، އައިއާރުޖީސީގެ ޕަބްލިކް ރިލޭޝަންސްގެ ނައިބު އަދި ތަރުޖަމާނު ބްރިގޭޑިއާ ޖެނެރަލް އަލީ މުޙައްމަދު ނާއިނީ ޝަހީދުވުމާ ގުޅިގެން، ކޮމާންޑަރ-އިން-ޗީފަށާއި، ޝަހީދުގެ ޢާއިލާއަށާއި، އިސްލާމިކް ރިވޮލިއުޝަން ގާޑްގެ ހުރިހާ ކޮމާންޑަރުންނާއި ހިތްވަރުގަދަ ސިފައިންނަށާއި، މީޑިއާގެ މެންބަރުންގެ އިތުރުން ކާޝާން ސަރަހައްދުގެ ލޮބުވެތި ރައްޔިތުންނަށް ތައުޒިޔާ ރައްދުކުރަމެވެ.
ވޭތުވެދިޔަ ސާޅީހަކަށް އަހަރު ދުވަހުގެ ތެރޭގައި އިސްލާމީ އިންގިލާބު ދިފާއުކުރުމުގައި މި ހިތްވަރުގަދަ ކޮމާންޑަރު ކޮށްދެއްވި އިޚްލާޞްތެރި ޚިދުމަތްތަކަކީ ފާހަގަކޮށްލެވޭ ފަދަ ޚިދުމަތްތަކެކެވެ. ޚާއްޞަކޮށް އަށް އަހަރު ދުވަހަށް ދެމިގެންދިޔަ ހަނގުރާމައިގެ ދުވަސްވަރު 'ސެކްރެޑް ޑިފެންސް' ގެ ކަންކަން ލިޔެކިޔުމުން ބަލަހައްޓައި، ހާމަ ކުރުމުގަ އާއި، ވޭތުވެދިޔަ ދެ އަހަރު ދުވަހު އައިއާރުޖީސީގެ ތަރުޖަމާނުގެ ހައިސިއްޔަތުންނާއި، 'އޮޕަރޭޝަން ޓްރޫ ޕްރޮމިސް' 2، 3 އަދި 4 ގެ ތެރޭގައި އޭނާ އަދާކުރެއްވި ދައުރުގެ ސަބަބުން، ޖިހާދާއި ގުރުބާނީގެ ތާރީޚުގައި އޭނާގެ ނަން އަބަދަށް ފަވާލެވިގެންދާނެއެވެ.
'ސޮފްޓް ވޯ' ނުވަތަ ފިކުރީ ހަނގުރާމައިގެ ދާއިރާގައި އޭނާ ގެންގުޅުއްވި އާދަޔާޚިލާފު ވިސްނުންތަކާއި ނަމޫނާތަކަކީ، ކިބުރުވެރި ބާރުތަކާ ދެކޮޅަށް ފިކުރީ ހަނގުރާމަ ކުރާ އިންގިލާބީ ގާޑުންނާއި އޮފިސަރުންނަށް ހުރި މަގުދައްކައިދޭނެ އުސޫލުތަކެކެވެ.
އެ ހިތްވަރުގަދަ އަދި އިޚްލާޞްތެރި ކޮމާންޑަރުގެ ސާފު ފުރާނައަށް އަޅުގަނޑުމެން ސަލާމް ފޮނުވަމެވެ. އޭނާއާއި އޭނާގެ ޝަހީދުވި އަޚާ ދެއްކެވި ނުގުޑާ ފަދަ ހިތްވަރަށް އިހުތިރާމް އަދާކުރާ ހާލު، ޓެރަރިސްޓް މުޖުރިމުންނާ ދެކޮޅަށް، ޚާއްޞަކޮށް ފިކުރީ ހަނގުރާމައިގެ މައިދާނުގައި އެބޭފުޅުން ފެއްޓެވި ސާބިތު މަގުގައި ކުރިއަށް ދިއުމަށް އަޅުގަނޑުމެން އަޒުމް ކަނޑައަޅަމެވެ. އަދި ރައްޔިތުންގެ މައްޗަށް ބިނާވެފައިވާ އައިއާރުޖީސީގެ ވަރުގަދަ އަޑު މުއުމިނުންގެ ހިތްތަކުގައި ކަނޑުވައިލުމަށް ފުރުސަތެއް ނުދޭނެ ކަމަށާއި، އައިއާރުޖީސީގެ ފިކުރީ އަދި ރޫހާނީ ބާރަށް އެއްވެސް އުނިކަމެއް އައުމަށް ފުރުސަތު ނުދޭނެކަމުގެ ޔަގީންކަން އަރުވަމެވެ."
