އިސްވެރިންނަށް ހަމަލާދެމުން ދިޔަ ނަމަވެސް އިރާނުގެ ސަރުކާރު ބަލިކަށިވާތަނެއް ނުފެނޭ
އިރާނުގެ އިސްވެރިންނަށް އަމާޒުކޮށް ހަމަލާތައް ދިން ނަމަވެސް، އެ ގައުމުގެ ވެރިކަމުގެ ނިޒާމަކީ ވަރުގަދަ އަސާސްތަކެއްގެ މައްޗަށް ބިނާވެފައިވާ ނިޒާމެއް ކަމަށް އެ ގައުމުން ބުނޭ. މިފަދަ ހަމަލާތަކުގެ ސަބަބުން އިރާނުގެ އަސްކަރީ އޮޕަރޭޝަންތަކަށް އެއްވެސް ބުރޫއެއް ނާރާކަމަށާއި، ރޮކެޓާއި ޑްރޯން ހަމަލާތައް މެދުކެނޑުމެއްނެތި ކުރިއަށްދާކަން އެ ގައުމުން ފާހަގަކުރެވޭ.
އިޒްރޭލާއި އެމެރިކާއިން އީރާނަށް ދިން ހަމަލާތަކާ ގުޅިގެން، އެ ދެ ގައުމާ ދެކޮޅަށް އަޑުއުފުލުމަށް 2026 ފެބްރުއަރީ 28 ވީ ހޮނިހިރު ދުވަހު އީރާނުގެ ތެހެރާންގައި އެ ގައުމުގެ ރައްޔިތުން މުޒާހަރާކުރަނީ. | ގެޓީ އިމޭޖަސް
އިރާނުގެ އިސްވެރިން އަވަހާރަކޮށްލުމުގެ ސިލްސިލާ ހަމަލާތަކެއް ކުރިއަށްދިޔަ ނަމަވެސް، އެ ގައުމުގެ ސަރުކާރު ބަލިކަށިވެ ވެއްޓިދާނެކަމުގެ އެއްވެސް ނިޝާނެއް ނުފެންނަ ކަމަށް ރިޕޯޓުތައް ބުނެފި އެވެ. އަނެއްކޮޅުން އެމެރިކާއާއި އިޒްރޭލުން ގަބޫލުކުރާ ގޮތުގައި، މިގޮތަށް ދެވޭ ހަމަލާތަކުގެ ސަބަބުން މަޑުމަޑުން އިރާނުގެ ސަރުކާރު ރޫޅި، ނިމުމަކަށް އަންނާނެއެވެ.
ނަމަވެސް، އިރާނުގެ ވެރިން ތަކުރާރުކޮށް ވިދާޅުވަމުން ގެންދަވަނީ، އެފަދަ ހަމަލާތަކުގެ ސަބަބުން އެދެވޭ ނަތީޖާއެއް ހާސިލުނުވާނެ ކަމަށެވެ.
އެ ބޭފުޅުން ވިދާޅުވާ ގޮތުގައި، އިރާނުގެ ވެރިކަމުގެ ނިޒާމަކީ ވަރަށް ވަރުގަދަ އަސާސްތަކެއްގެ މައްޗަށް ބިނާވެފައިވާ، މުޖުތަމައުގައި ފުންކޮށް މޫލާފައިވާ ނިޒާމެކެވެ. އެހެންކަމުން، ކިތަންމެ ގިނަ ބަޔަކު މަރާލި ނަމަވެސް، އެ ނިޒާމަށް އެއްވެސް ގުޑުމެއް ނާރާނެ ކަމަށް އެ ބޭފުޅުން ވިދާޅުވެއެވެ.
ހަނގުރާމަ ފެށުނީއްސުރެ މިއަދާ ހަމައަށް ބަލާއިރު، އިރާނުގެ ސަރުކާރުގެ އޮނިގަނޑަށް ނުވަތަ ހަނގުރާމައިގެ އޮޕަރޭޝަންތަކަށް ބުރޫއަރާފަދަ އެއްވެސް ކަމެއް ފެނިފައެއް ނުވާ ކަމަށް އަލް ޖަޒީރާ އިން ރިޕޯޓުކޮށްފައިވެ އެވެ. އިރާނުން ކުރިއަށްގެންދާ ހަނގުރާމައިގެ ހަރަކާތްތައް އެއްވެސް މެދުކެނޑުމެއް ނެތި ދަނީ ކުރިއަށެވެ. އެގޮތުން ކޮންމެ ދުވަހަކުވެސް ރޮކެޓާއި، މިސައިލާއި، ޑްރޯން ހަމަލާތައް ފޮނުވަމުންދަނީ އެއްވެސް ބަދަލެއް ނައިސް، ކުރިއެކޭވެސް އެއްގޮތަށެވެ.
މަސްދަރު: އަލް ޖަޒީރާ
