ހަކަތައިގެ ތަންތަނަށް ހަމަލާ ދިނުމަކީ ހެދި ބޮޑު ގޯހެއް، ރައްދުގައި ދޭ ހަމަލާތައް އަދި ނުނިމޭ: އީރާން
އެ ހަމަލާތައް އަލުން ތަކުރާރު ކުރާ ނަމަ، ދުޝްމަނުންނާއި އެމީހުންގެ އެކުވެރިންގެ ހަކަތައާ ގުޅުން ހުރި ތަންތަން މުޅިން ހަލާކުވަންދެން ހަމަލާތައް ދޭނެ ކަމަށާއި، އަދި އެ ހަމަލާ ތަކަށް ހުއްޓުމެއް ނާންނާނެ ކަމަށް ވެސް ވިދާޅުވެފައިވޭ.
އީރާންގެ އިސްފަހާން އަށް ދިން ހަމަލާ ތަކެއްގެ ސަބަބުން އުފެދިފައިވާ ދުންގަނޑެއް. | އޭއެފްޕީ
އީރާންގެ ހަކަތައާ ގުޅުން ހުރި ތަންތަނަށް ހަމަލާ ދިނުމަކީ ހެދި ވަރަށް ބޮޑު ގޯހެއް ކަމަށާއި، އޭގެ ރައްދުގައި ދެމުން އަންނަ ހަމަލާތައް އަދު ނުނިމޭ ކަމަށް، އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ.
އައިއާރުޖީސީގެ ޚަތަމް އަލް އަންބިޔާ މަރުކަޒުގެ ތަރުޖަމާނު ވިދާޅުވީ، އީރާންގެ ހަކަތައާ ގުޅުން ހުރި ތަންތަނަށް ހަމަލާ ދިނުން ތަކުރާރު ވެއްޖެ ނަމަ، އެކަމުގެ ރައްދުގައި ދޭ ހަމަލާ މާ ބޮޑަށް ހަރުކަށި ވާނެ ކަމަށެވެ.
ތަރުޖަމާނު ވިދާޅުވީ އީރާންގެ ހަކަތައާ ގުޅުން ހުރި ތަންތަނަށް ހަމަލާ ދިނުމަކީ ދުޝްމަނުން ހެދި ވަރަށް ބޮޑު ގޯހެއް ކަމަށާއި، އެކަމާ ގުޅިގެން އެމީހުންނަށް އިންޒާރު ދޭ ކަމަށެވެ. އަދި އެ ހަމަލާތައް އަލުން ތަކުރާރު ކުރާ ނަމަ، ދުޝްމަނުންނާއި އެމީހުންގެ އެކުވެރިންގެ ހަކަތައާ ގުޅުން ހުރި ތަންތަން މުޅިން ހަލާކުވަންދެން ހަމަލާތައް ދޭނެ ކަމަށާއި، އަދި އެ ހަމަލާ ތަކަށް ހުއްޓުމެއް ނާންނާނެ ކަމަށް ވެސް ވިދާޅުވެފައިވެ އެވެ.
އައިއާރުޖީސީގެ މި އިންޒާރު ނެރެފައި ވަނީ ސަރަހައްދީ ޙާލަތު ވަރަށް ބޮޑަށް ގޯސްވެ، ނުތަނަވަސްކަން ބޮޑުވެފައިވާ ދަނޑިވަޅެއްގަ އެވެ. އީރާންގެ ހަކަތައާ ގުޅުން ހުރި ތަންތަނަށް ދިން ހަމަލާ ތަކަކީ އެ ޤައުމުގެ އިޤްތިޞާދަށާއި، ރައްޔިތުންނަށް ދިރިއުޅުމަށް ބޮޑު އަސަރެއް ކުރާނެ ކަމަށް ބެލެވެ އެވެ.
އީރާންގެ ސައުތު ޕާސް އަށް އަމާޒުކޮށް އިޒްރޭލް އިން ދިން ހަމަލާ ތަކުގެ ރައްދުގައި އީރާން އިން ވެސް ވަނީ ހަމަލާ ދޭން ފަށައިފަ އެވެ. އެގޮތުން އީރާން އިން ވަނީ ޤަތަރާއި، ސައުދީ އަރަބިއްޔާ އަށް އަމާޒުކޮށް ހަމަލާ ދީފަ އެވެ.
މަސްދަރު: އަލް ޖަޒީރާ
