މުޖުތަބާ ޚާމަނާއީގެ މެސެޖެއް: އީރާންގެ ދުޝްމަނުން ދަނީ ބަލިވަމުން

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި، ދުޝްމަނުން ދަނީ ބަލިވަމުން ކަމަށް ވިދާޅުވެ އީރާންގެ ރޫހީ ލީޑަރު މުޖުތަބާ ޚާމަނާއީ ވަރުގަދަ ބަޔާނެއް ދެއްވައިފި އެވެ. 

ނައުރާޒާ ދުވަހާ ގުޅިގެން މުޖުތަބާ ޚާމަނާއީ ފޮނުއްވި މެސެޖެއްގައި ވިދާޅުވީ، އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި އިސްލާމީ ޖުމްހޫރިއްޔާގެ ދުޝްމަނުން ދަނީ ބަލިވަމުން ކަމަށެވެ. މިއީ އެމެރިކާ އިން ދިން ހަމަލާ ތަކެއްގައި މުޖުތަބާ ޚާމަނާއީގެ ބައްޕާފުޅު އަދި އެ ޤައުމުގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަވީ ފަހުން، މުޖުތަބާ ޚާމަނާއީ ދެއްވި ދެ ވަނަ މެސެޖެވެ. ނަމަވެސް، ކުރިން ފަހަރެކޭ އެއްގޮތަށް މިފަހަރު ވެސް އާންމުންނަށް މުޖުތަބާ ޚާމަނާއީ ފެނިފައި ނުވެ އެވެ. 

ހުކުރު ދުވަހު އާންމު ކުރި މެސެޖުގައި މުޖުތަބާ ޚާމަނާއީ ވިދާޅުވީ، ދީނީ، ފިކުރީ، ސަގާފީ އަދި ސިޔާސީ ގޮތުން ތަފާތު ތަކެއް ހުރި ނަމަވެސް، އީރާނުގެ ރައްޔިތުންގެ މެދުގައި އުފެދިފައިވާ ވަރުގަދަ އެއްބައިވަންތަކަމުގެ ސަބަބުން ދުޝްމަނުން މިހާރު ބަލިވެފައިވާ ކަމަށެވެ. އަދި ހަނގުރާމައިގެ ތެރޭގައި އީރާނުގެ ރައްޔިތުން ދުޝްމަނުންނަށް ވަރުގަދަ ހަމަލާ ތަކެއް ދީފައިވާ ކަމަށް ވެސް އޭނާ ފާހަގަ ކުރެއްވި އެވެ. 

އީރާންގެ ރައްޔިތުން ދައްކުވައިދިން ސާބިތުކަމާއި، އެއްބައިވަންތަ ކަމުގެ ސަބަބުން ދުޝްމަނުންނަށް "ބޯ އަނބުރާލާ ފަދަ" ބޮޑު ހައިރާން ކަމެއް ލިބިފައިވާ ކަމަށް ވެސް ރޫހީ ލީޑަރު މުޖުތަބާ ޚާމަނާއީ ވަނީ ވިދާޅުވެފަ އެވެ. އިތުރަށް އޭނާ ވިދާޅުވީ، އެކަމުގެ ސަބަބުން ދުޝްމަނުން މިހާރު ދައްކަމުން ދަނީ އެއް ގަލަކަށް ނާރައި، އެއްވެސް މާނައެއް ނެތް ވާހަކަ ތަކެއް ކަމަށެވެ. 

މީގެ އިތުރުން ހަނގުރާމައިގެ ތެރޭގައި އޮމާން އާއި ތުރުކީ އަށް ދެވުނު ހަމަލާ ތަކުގެ ފަހަތުގައި އީރާން އާއި އެ ޤައުމަށް ތާއީދު ކުރާ ސަރަހައްދީ ބާރު ތަކުގެ އެއްވެސް އަތެއް ނުވާނެ ކަމަށް ވެސް މުޖުތަބާ ޚާމަނާއީ ވިދާޅުވި އެވެ. މުޖުތަބާ ޚާމަނާއީ ތުހުމަތު ކުރެއްވި ގޮތުގައި އެ ހަމަލާ ތަކަކީ އިޒްރޭލް އިން އޮޅުވާލުމުގެ ގޮތުން ހިންގާފައިވާ އަމަލު ތަކެކެވެ. 

މިއީ ރޫހީ ލީޑަރުގެ މަޤާމާ ހަވާލުވެ ވަޑައިގަތް ފަހުން މުޖުތަބާ ޚާމަނާއީ ދެއްވި ދެ ވަނަ ބަޔާނެވެ. ފުރަތަަމަ ބަޔާން ދެއްވާފައި ވަނީ ދައުލަތުގެ މީޑިއާ މެދުވެރިކޮށެވެ.