ތެލުގެ އަގުބޮޑުވެ ބޮޑުކަންނެލި މަސްވެރިކަން ހުއްޓިއްޖެ

މެދުއިރުމަތީގައި މިހާރު ކުރިއަށްދާ ހަނގުރާމައިގެ ސަބަބުން ތެލުގެ އަގު ރިކޯޑު މިންވަރަކަށް ބޮޑުވެ، މި މަސައްކަތުން ދެކޮޅު ނުޖެހޭތީ  ރާއްޖޭގައި ބޮޑުކަންނެލީގެ މަސްވެރިކަން ހުއްޓިއްޖެކަމަށް މަސްވެރިން ބުނެފި އެވެ. 

ރާއްޖެ އެމްވީ އަށް މައުލޫމާތު ދިން ބޮޑުކަންނެލި މަސްވެރިން ބުނީ، ބާނާ ކަންނެއްޔަށް އެކަށީގެންވާ އަގެއް ނުލިބޭ އިރު މިހާރު ބާޒާރުގައި މިހުރި އަގުގައި ތެޔޮ އަޅައިގެން މަހަށް ނިކުތުން ދެކޮޅުނުޖެހޭނެ ކަމަށެވެ.

ރާއްޖޭގައި ބޮޑުކަންނެލީގެ މަސްވެރިކަމުގައި ހަރަކާތްތެރިވާ 100 އައް ވުރެ ގިނަ ދޯނީގެ މަސައްކަތް މިހާރު ހުއްޓިފައިވާ ކަމަށް މަސްވެރިން ބުނެފައިވެ އެވެ. މަސްދޯނިފަހަރުގެ ދަތުރުތައް ހުއްޓުމަކީ މަސްވެރި އާއިލާތަކަށް ލިބޭނެ ބޮޑު ނިކަމެތިކަމެއް ކަމަށް މަސްވެރިން ފާހަގަކުރެ އެވެ.

ތެލުގެ އަގަށް އައި ބޮޑު ބަދަލާ ގުޅިގެން ބޮޑުކަންނެލި މަސްވެރިންގެ ޔޫނިއަން އިން ވަނީ ކަންބޮޑުވުން ފާޅުކޮށްފަ އެވެ. އެ ޔޫނިއަން އިން ބުނީ ޑީސަލް ލީޓަރެއްގެ އަގު 28 ރުފިޔާ އާ ގާތްކުރާ އަދަދަކަށް އުފުލިފައިވާއިރު، ކަންނެލި ކިލޯއަކަށް 55 ރުފިޔާ ލިބުމަކީ މަސްދޯނިފަހަރުގެ ދަތުރުތައް ހުއްޓި، މަސްވެރި އާއިލާތަކަށް ލިބޭނެ ބޮޑު ނިކަމެތިކަމެއް ކަމަށެވެ. އަދި މަސްވެރިކަން ހުއްޓާނުލައި ކުރިއަށް ގެންދެވޭނެ މަގެއް ހޯދައިދިނުމަށް ސަރުކާރުގެ ކަމާބެހޭ ފަރާތްތަކަށް އެ ޖަމިއްޔާ އިން ވަނީ ގޮވާލާފަ އެވެ.

އެސްޓީއޯ އިން ތެލުގެ އަގު ބޮޑުކުރުމާ އެކު ބޮޑުކަންނެލި މަސްވެރިންނަށް ހެޔޮ އަގުގައި ތެޔޮ ވިއްކާނެކަމުގެ ޔަގީންކަން ސަރުކާރުން ދީފައިވެ އެވެ. ނަމަވެސް، ކަންނެލީގެ މަސްވެރިންނަށް އަދިވެސް ތެޔޮ ލިބެނީ އަގުބޮޑުކޮށް ކަމަށް މަސްވެރިން ބުނެ އެވެ.

ފާހަގަކޮށްލެވޭ ގޮތުގައި، 100 ރުފިޔާ އާއި 80 ރުފިޔާ އާ ދެމެދު ބޮޑުކަންނެލީގެ އަގު ހިފެހެއްޓުމާއި ބޭސް ރޭޓުގައި ބޮޑުކަންނެލި މަސްވެރިންނަށް ތެޔޮ ފޯރުކޮށްދިނުމަކީ ރައީސް މުއިއްޒުގެ ރިޔާސީ ވައުދެކެވެ.