އީރާން އިން އޮތީ ނިއުކްލިއާ ހަތިޔާރު އުފެއްދުމާ ދެކޮޅަށް 2004 ވަނަ އަހަރު ފަޠުވާއެއް ނެރަފައި، އެއާ ޚިލާފުވި ކަމުގެ އެއްވެސް ހެއްކެއް ނެތް: ޖޯ ކެންޓް
އެ ފަތުވާ އަކީ އީރާންފެ ދައުލަތުގެ ސިޔާސަތުތައް ބައްޓަން ކުރުމުގައި ވަރަށް މުހިންމު ދައުރެއް އަދާ ކުރާ އެއްޗެއް ކަމަށް ވެސް އޭނާ ފާހަގަ ކުރެއްވި. އެއާ އެކު އޭނާ ވިދާޅުވެފައި ވަނީ، އީރާން އިން އެ ފަޠުވާއާ ޚިލާފުވެފައިވާ ކަމުގެ އެއްވެސް ހެއްކެއް އަދި އިންޓެލިޖެންސްއެއް ވެސް ފެންނަން ނެތް ކަމަށް.
އެމެރިކާގެ ކައުންޓަ ޓެރަރިޒަމް ސެންޓަރުގެ ކުރީގެ އިސްވެރިޔާ ޖޯ ކެންޓް | ގެޓީ އިމޭޖަސް
ނިއުކްލިއާ ހަތިޔާރު އުފެއްދުމާ ދެކޮޅަށް، 2004 ވަނަ އަހަރު އީރާން އިން އޮތީ ފަޠުވާއެއް ނެރެފައި ކަމަށާއި، އެ ޤައުމުން އެއާ ޚިލާފުވެފައިވާ ކަމުގެ އެއްވެސް ހެއްކެއް ނެތް ކަމަށް، އެމެރިކާގެ ކައުންޓަ ޓެރަރިޒަމް ސެންޓަރުގެ ކުރީގެ އިސްވެރިޔާ ޖޯ ކެންޓް ވިދާޅުވެއްޖެ އެވެ.
އީރާން ހަނގުރާމައާ ދެކޮޅު ހެދުމުގެ ގޮތުން މިދިޔަ އަންގާރަ ދުވަހު ކެންޓް ވަނީ މަގާމުން އިސްތިއުފާ ދެއްވައިފަ އެވެ. އޭގެ ފަހުން މަޝްހޫރު ނޫސްވެރިޔާ ޓަކާ ކާލްސަން އާއެކު ކެންޓް ވަނީ ޕޮޑްކާސްޓެއްގައި ބައިވެރިވެ ވަޑައިގެންފަ އެވެ. އެ ޕޮޑްކާސްޓުގައި ކެންޓް ވިދާޅުވީ އީރާންގެ ދީނީ އަދި ސިޔާސީ ނިޒާމުގެ ތެރެއިން، ނިއުކްލިއާ ހަތިޔާރު އުފެއްދުމަކީ މަނާ ކަމެއްގެ ގޮތުގައި ވަނީ ކަނޑަ އަޅައިފަ އެވެ.
މީގެ އިތުރުން ކެންޓް ވިދާޅުވީ، 2004 ވަނަ އަހަރު އީރާންގެ ދީނީ އިލްމުވެރިން ނެރުއްވާފައިވާ ފަތުވާއެއްގެ ދަށުން ނިއުކްލިއާ ހަތިޔާރު ތަރައްޤީ ކުރުމަކީ މަނާ ކަމެއްގެ ގޮތުގައި އޮތީ ބަލަން ފަށައިފަ އެވެ. އަދި އެ ފަތުވާ އަކީ އީރާންފެ ދައުލަތުގެ ސިޔާސަތުތައް ބައްޓަން ކުރުމުގައި ވަރަށް މުހިންމު ދައުރެއް އަދާ ކުރާ އެއްޗެއް ކަމަށް ވެސް އޭނާ ފާހަގަ ކުރެއްވި އެވެ. އެއާ އެކު އޭނާ ވިދާޅުވެފައި ވަނީ، އީރާން އިން އެ ފަޠުވާއާ ޚިލާފުވެފައިވާ ކަމުގެ އެއްވެސް ހެއްކެއް އަދި އިންޓެލިޖެންސްއެއް ވެސް ފެންނަން ނެތް ކަމަށެވެ.
އެމެރިކާގެ ކައުންޓަ ޓެރަރިޒަމްގެ ކުރީގެ އިސްވެރިޔާ އަދި އެ ޤައުމުގެ ރައީސް ޑޮނަލްޑް ޓްރަމްޕްގެ ވަފާތެރި ސަޕޯޓަރެއްގެ ގޮތުގައި ހުންނެވި ކެންޓް މިހެން ވިދާޅުވެފައި ވަނީ، އީރާން އިން ނިއުކްލިއާ ހަތިޔާރު އުފެއްދުމުގެ ޤާބިލުކަން ހޯދަމުން އަންނަ ކަމަށް ބުނެ ހުޅަނގުގެ ޤައުމު ތަކުން ކަންބޮޑުވުން ފާޅު ކޮށްފައި ވަނިކޮށެވެ. ނަމަވެސް ކެންޓް ވިދާޅުވެފައި ވަނީ، މިހާތަނަށް އީރާން އިން އަމަލު ކުރަމުންދާ ގޮތަށް ބަލާއިރު، އެ ޤައުމުން ނިއުކްލިއާ ހަތިޔާރު އުފެއްދުމުގެ އެއްވެސް މަސައްކަތެއް ކުރަމުންދާ ކަމުގެ ހެއްކެއް ފެންނަން ނެތް ކަމަށެވެ.
ކެންޓް އަކީ އެމެރިކާގެ ޤައުމީ ސަލާމަތާ ބެހޭ ކަންކަމުގައި ގިނަ ދުވަސް ތަކެއް ވަންދެން މަސައްކަތް ކުރައްވާފައި ހުންނެވި ބޭފުޅެކެވެ. އަދި އޭނާ އަކީ ޓެރަރިޒަމްއާ ދެކޮޅަށް ކުރާ މަސައްކަތުގެ ތަޖުރިބާކާރު ބޭފުޅެކެވެ.
